Jinghpo hpaji景颇文化

NGAI HPE JINGHPO LAI KA SHARIN YA AI SARA

我的老师

时间:2020-11-13 10:38:20 来源:德宏团结报

  NGAI HPE JINGHPO LAI KA SHARIN YA AI SARA

  Ja Ro

  Ngai Yinkyang ginwang lahta tsang bungli hpaji jong lung ai ten hta, Jinghpo laika sharin ya ai sara Maru Mai hpe myit dum dat shagu shingran pra pra mu ai lo. Shi a hkumgong shing-yan lapran le rai loi lasi ai, myiman hpro nsam atu asan rai, shinggan myisha hta galoi mung ntsin ing nga ai zon, sailem nten ntsa e prat langai mung tu ai, shi go na-chying mani kam la ai sara langai re. Ngai lu matsing da ai sara Mai hpe nnan mu ai ko nna, sara a mani sumsai myiman hte shaga jahta ai nsen ni hpe ya du hkra myit shai dat shagu shingran pra pra no mu lu ai, sara hpe mu dat shagu nye a jidui hpe mu ai zon nga myit hta gabu la ai.

  Ngai adum nga ai, galang mi na jahpot jong lung ai ten hta, bo pyi hpro sai dingla langai mi jong gok de shang wa ra ai, nye myit hta dingla ndai go gadai rai wa sai kun? Ngu no mau nga yang, sara go jonggok du ai hte: “Jongma ni jonglung saga! Yong zim rai dung ga.” Nga let, sumnung shingdi rai yong hpe mada shara yu nna, “Ngai go nanhte hpe Jingpo laika sharin ya na matu du sa ai sara re, ngai go Lahto gasha re, shaga mying go Maru Mai nga ma ai, jo ang ai hku shachyen shaga la ga.” Nga tsun ai hte nye myit hta: Acha i! Kara pyi ndai daram hpro sai dingla mi, anhte hpe Jinghpo laika sharin na nga ai go, mai byin na kun? Ngu lagu myit to nga ai. Ngai Jinghpo laika gachyi mi pyi n kam sharin ai re, rai yang, yo shada da ai hku nrai mat ai majo, Jinghpo hpung jongjok ko sa dung nga nhtom, shani shagu jong gok e sa yup nga dung nga nga rai nngai, laika mung n kam hti, n kam ka ai nga shalai kau sai. Ten go myi grip mi sha re zon nga yang laning mi lai mat wa sai, hpa laika mung n chye la ai lai mat wa sai, sara Mai go anhte hpe shani shagu mayu pyi krop na daram hti sharin, ka sharin, anhte go magui a man e doro dum ai hpa, hpa mung n lu madat bang la nga ai, raitim sara myit n do ai sha shani shagu aten tup tup anhte hpe Jinghpo laika ding yang sa sharin ya nga u ai.

  Lahpot mi na jong lung ten hta, sara Mai tsun ai hpe ngai atsom myit yu nna, dum hprang wa sai, sara tsun ai: “Anhte Jinghpo jongma ni tinang amyu hpe tsora, tinang amyu a laika hpe atsom sharin la ra ai, Jinghpo laika go myit lom ai ni chye la n yak ai, myit n lom yang gade ning sharin tim n chye hkro ai, Jinghpo laika hte tinang amyu a htunghking labau lara maumui mausa ni ka da lu ai, Jinghpo laika hpe jai lang asung jashon mai ai lam lo lo nga ai. ” Nga tsun ai hpe ngai myit sumru yu nna, Jinghpo laika chye hkra sharin la na ngu myit da-ting da sai. Sara ngai hpe nga pra lam madun ya ai hte maren, dai shani kon ngai Jinghpo laika atsom sharin na myit rong wa ai hta n-ga, ding yang hti shakut ka shaman nga ni ai.

  Sara Mai anhte hpe tsun dan ai, shi go Yinkyang sharin shapan rung ko magam gun ai 30 ning hpring nna, hkringsa let byinsin sha rai nga mat sai re. Rai yang, ndai jong ko Jinghpo laika sharin na sara ra gadon ai majo, hkiba ai hpe n nga, tinang amyu a laili laika sharin shachyam lu hkra ngu shakut ai re nga tsun ai hpe myit yu nna, sara asak dai daram gaba sai pyi shakut ai ngu myit dum let Jinghpo laika sharin la na myit n-gun lu la sai, sara go anhte hpe si mani azin ayang rai sharin ai, jongma ni hpe mung grai chye gon hkang ai, sara Mai go anhte hkungga ging ai, tsora dik ai sara re. Mateng daini du hkra ngai hpe myit n-gun jo ya ai, Jinghpo laika hpe sharong ong chye wa shangun ai sara re.

  Yinkyang ko 3 ning Jinghpo laika sharin la nna, Mangshi sara jong de bai wa ma- tut sharin la ni ai. Ngai nnan e Jinghpo laika hti yang n hti n htang gading gadon nga ai ko nna, ya re re lu hti mat wa ai hta n-ga, laika ka yang laye tsom hkra lu ka sai, laika hpe n shut hkra mung chye ka sai, Yinkyang ko sara Maru Mai sharin ai ten hta Jinghpo htunghking labau lara, maumui mausa ni lo lo lu sharin la ai nhkan e, Jinghpo laika hpe grau nna sharong nga ni ai.

  Masha a nga pra lam go galu la ai hkrum lam re. Ngai hpe nga pra hkrun lam hta myit ung ang nga ai, nchye nko rai nga ai ko na shara ndum hkra shadum jahprang la ai sara Maru Mai hpe ngai chyeju dum ai hta lai nna, tsora hkungga nngai lo.

  Aten go n dum shami hka lui ai zon lai mat wa sai, sara tsun hkai dan ai Jinghpo maumui pyi garai n lo madat ai zon nga yang, Sakhkung sara jong de htot mat wa ra sai. Anhte jong yu na shaloi sara tsun ai: “Ya ngai chye ai maumui pyi garai n hkai dan ma yang, nanhte jong htot ra mat sai, hpang de aten lu jang bai hkrum ga.” Nga tsun ai hte ngai ladi hkri hkri nga wa ai, grai n ja let hka bra wa saga ai.

  Sara Mai jong gok de abui sha rai shang wa ai shingran hpe amu nga na sai oi.

  Ngai tsora hkungga dik ai sara Maru Mai tut e hkam gaja nga u ga lo!