Jinghpo hpaji景颇文化

Yoilu Shingran

舂米摇篮

时间:2020-11-13 10:25:18 来源:德宏团结报

  Yoilu Shingran

  Kasan Bum A Shingnyi

Jongma ni htunghking htongka  sharin shaman shakyang nga ma ai.  (Dem ai: Tangbau Sharoi)

  Gatsi pyo dik ai Jinghpo bum ga,

  U lat hpunggam goi wa,

  Samram nhtoi htoi wa sai.

  Yoi sa, yoi sa,

  Yoi sa lu, yoi sa lu,

  Nta shagu nu num ni a mam htu yoilu nsen ngoi ai na,

  Yoi sa, yoi sa,

  Yoi sa lu, yoi sa lu,

  Shagong shagu hkon zet shayi ni a mam htu yoilu mahku sho gara wa sai.

  Ndai zon kyet shop ai Jinghpo nu num hkon zet shayi ni wa,

  Tinang a lata atsam hte sha,

  Dum nta masha yong hpe shat kan n ko si hkra mam htu shaja,

  Jinghpo bum ga hta,

  Asut su agan lu nna nga ngui nga pyo wa.

  Ngai a kro dung masin salum gata hta,

  Mam htu yoilu nsen tut e ahtu hkra,

  Yoilu shingran tut e pra pra mu nga.

  Ya daini anhte a Jinghpo bum ga shara shagu,

  Bot bot mado shoi she shoi,

  Mam rin jak, hpun do jak mung ngoi she ngoi,

  Dat jak amyu myu wu she wu.

  Manap jau jau e yoilu mahku nsen n na lu,

  Nu num hkon zet ni mung hpaji hparat grau kung jat,

  Magam bungli lam shagu hta mung grau chye jasat nna nga nga masai.

  Goi lo,

  Anhte myu sha ni,

  Gumgai dingla n nga,

  Mahkon shabrang n ginhka,

  Dai mam htu yoilu atsam ningja hpe kasi la, kanan sa,

  Mam hpe n-gu tum pru hkra shakut ai zon,

  Yi-ngam bungli shagu hta,

  Myit lom kangka let shakut shaja sa wa ga oi