Qongvoq ngvoq

那一年,他丢失了指南针

时间:2020-03-27 09:17:58

  Sakram zo xiyuq gi yoso shobik gvam dik su ngvut le, zanwui ri yvang gi aqing ho mu yose shobik e gvun ra, lada da gi yvang bau za e, myo su gi yvang numnang wui eq laha e ra ga.

  Lazan ma ri, sakram zo xiyuq gi yvangkau eq lunglvum mu, shobik e ra pyege lvum dvo bigvo. Yvangnvik gi zo ra shuq ra son wun chung e mai, modo gvon lui buitoq qap shut sikmo yo qo shobik dvoq so bigvo ga.

  Sikmo yo xigi myoqwu aban e sikbvung mo yvang ngvut ra, yuqzhvoi bum e sikgam gi yvangnvik toq asak gvo gu gu zhvat ngvut ri ga, sikbvung kau ma gi bangdvai、ngvoqzhvit ngvoqzo 、ngvoqqik bve yoso dusat ashau yvang nyi ri ga, haumu sikbvung awui ayam ma gi le nyigvun lamgvun bang ri myo dik be ga.

  Hau zhiwo ma bang dai ri, sikbvung mo xima gi lo、wamkui bve byu ri dat yuzo e dusat ri nyi ri, haumu xishut shobik e ra ngvut ri numnang lung chung mu e ra dut ri ga.

  Sakram zo xiyuq gi yvangkau eq laha sikbvung kau shut shobik chom so wang lo bigvo.Yvangnvik sikbvung kau shut wang lo e sumnyi ngvu e nyi, ngvoqqik ladu myvang bik waq bigvo, haumai bangdvai ladu ri dum myang lui chom kat na shi gvi zhang, zhe kat zhe we lui kihe so wang lo bigvo lvang ase lo ga.

  Zvomra myvang dum chang kat zhang, yvangnvik gi din moi mu awo chang kat lo gvo, haumai yvangnvik gi laqing no gvat lui hi mai sowang lo e qochang chang dum dvau lo bigvo ga.Nyigung zhe lo be, asu yvangnvik gi kimyvo so ri re nyi zhang ma awo so zhe, son gvat wu ri gi noq mai yvang nyi zhang ma so zhe ra aqing ngvut be ga.

  Yvangnvik sikbvung kau ma e e lolo, hi ri kamai so wang le lo e lago za sai myit wu mu dum sai so gvo ri re, yvangnvik e nyizhang cuq dvo zhang ma awo so zhe dut bigvo, yvangnvik gi sikmo yo ma qongvoq songvoq bigvo ngvut ra.

  Mau gi chut lo le laplap, yvangnvik gi myitjuq lo le ashau. Yvangnvik e zoze shuqze eq byinzvung shit ap zhak gi, banban nyi zhang cuq dvo e tungmo ma gvat byvam dvo bigvo ga.Xisu e sikmo yo ma, byinzvung shit ap zhak hau awo ri gi, wo sotoq lo ra ashau yvang wui dik be ga.

  Mauchut myoq amyang lo, yvangnvik gi sikmo gam wang ma zung jo lo lui, sikmo yo ximai kisu sotoq lo ra saison saimyit wu bigvo.Haukun, yvangnvi e gungdap ze gi, napsun nyi zhang mai toq lo kun yu wun chung e izhvam layuq ladvau za ga, sikmo yo ximai sotoq lo ra ngvut ri, izhvam xi ri za lum dvo alo ga.

  Tang nvapjvo myoq myang lo eq, yvangnnvik gi bui kashut mai toq lo e ri wu lui byinzvung shut dvoqso bigvo ga, yvangnvik sonse le gi, byinzvung shut so zhang sheq sikmo yo ximai wo sotoq lo mu yvumshut la wo lo ra ngvut le ga.

  Sonyi sonyi zhang, nyigung dum zhe dvo lang be, yvangnvik gi zomut le wuishit le dut na shi mu, laqing no gvat lui izhvam lanvut chom shuq no bigvo.Yvangnvik myang awam no gvun, laqing zungno gvat e mai dum dvoqso gvi zhang, yvangnvik hi ma chikchik noq e hai ze laq leng dvo e lo myang gvat bigvo, haumai zaizai so e mu lago e sai wu gvi zhang, byupo layuq sheq maleq dvo e ri e myang bigvo ga.

  Byupo hauyuq asak gi yvangnvik e yvangwa jvo, myoq ri zhaq nyvung gu mangzo ngvut ra, mangzo hau ri zomut wuishit lui abe, myoqchum dvingdving gvut lui sikgam wang ma ngeleq dvo ra ga. Haumai sakram zo nvik mangzo po e nvo ma e sop wu gvozhang, mangzo po hau soqshe bo ashi, ashi shi ngvut ri ga.

  “Mangzo po xiyuq ri nganvik su shoho qongvoq so ngvoq su abe ngvut ra, yvang gi zomut wuishit lui maleq dvo su.”ga sakram zo yvangkau ri lik daijvo izhang, yvang izhvam mangzo po ri e byi shuq ra son eq, yvangkau:“Izhvam hau yvang ri age byi shuq byvam, nganvik e izhvam amyo lo, kimyvo nyi za wo lai alo ri ase.Dum ngvu ri mangzo xi eq nganvik yvu ase lvum, yvang gi haibyu ngvut le ri ase, laqma nganvik eq yvang ri wo qi yu zhang, yvang eq nganvik ri lvang dum sat lo ri kisu gvut ra? Sasa, rau la so goq!”ga yvangkau gi yvang ri lang she lui dvoqso bigvo.

  Sakram po gi yvangkau dang ri jo gvat wu ri zhozho za ga mu, bi dvoqso be.Asu yvang gi lagvam so gvat ri mangzo po e isam yvangmoq ma za le dap dvodvo, labye so gvat ri myit ma zu no e su ga nyi be.

  So nyi so nyi zhang, sakram po gi awo zhan lo, haumai yvangkau ri:“Akau e, nganvik gi mangzo po hau ri la e qiyu goq, nganvik yvang maleq dvo e myang gu aqi yu zhang gi nganvik eq yvang ri satbyvam e su dut be.”ga dai zhang, yvangkau gi:“Nganvik sikmo yo ximai wo toqlo awo toqlo lvang aban se, laqma mangzo hau ri qiyu zhang yvang nganvik ri asat gvilvang qiloq lang mu qoso lvoqjvo le, hauzhang zhe banshoq bang shi ra za langvut alo.”ga dai zhang, sakram po gi:“Laqma nganvik su mangzo hau ri a e qiyu zhang, nganvik su sikmo yo ximai wo toq lo gvilvang labyvat myit angon, ngo gi mangzo hai ri e qiyu ra!”ga dum dai zhang, yvangkau gi:“Mangzo hai ri e qiyu ra ngvutzhang nang bau e aq, ngo gi a e.”ngvu ga.

  Sakram po zo gi yvangkau ri lamyoq dvu wu gvat lui, dvau e lo be, yvang gi mangzo po hai ri e myang ho e mai yvoyvo e dvudvoq mu, yvang wun dvo e izhvam lanvut nvutzo gvut e huq nyi be. Zvomra myang ma, mangzo po gi yvoyvo mai bun lo be, yvang myoqzo pong gvat mu sakram po ri ajvu bun myoqsam eq wu dvo be.

  Akun mangzo po xigi sikmo yo xima shobik le su angvut, lamgvun bang ri qoshit su ngvut ri ga, yvang adviq za mai xi zhowo ma nyigvo lo mu, sikmo yo xi ka gi ka ashau se su, haumu yvang gi ada da maumyi zhepwu bang、shobik lam gvun bang ri qo shui shit wu su ngvut ri ga. Sikmo yo xilong ma byinzvung shit ap zhak achung e wo shui sotoq lo su gi, mangzo po xiyuq za ngvut le, lai lui kayuq lvang awo shui toq ga.

  Mangzo po xiyuq wo bunjing lo e mai, sakram zo ri luilui za sikmo yo ximai wo shui toq lo be ga, asu yvangkau za labyvat sikmo yo hau ma lungbyvam dvo be abe, tangma yvang ri o ri amyang wu lo ga.

  Mvomyi zo ximai daijvo nau e gi, byu layuq e myitzhvoi myityung gi byinzvung shit ap zhak ngvut be, myitzhvoi myityung gi byu layuq ri myoqmyang buttoq shut wo shui so lo le, kanyi kabui ngvut gvilvang qongvoq adat ngvoq, so e qo ri dat nyang le. (Puq lazhang su Kongno)