Nang nga myit ri sonse ri gi kimyvo g era wa

你知道我的心情该多好

时间:2018-06-01 10:32:34

O ri myit ma tungzhvun lalvum dat bo le,
Yvumsing awo sotoq lo,subve ri awo zhvinwang lo.
Ngo awo daitoq e ungkau dang hau ma haq dvo le.
Nang nga myit ason se,nang e shut angvut.
 
O ri damko ladam dat dap le,
Nik gu ri bo anik gu ri bo,bvan e ngvop dvo zhang,abo lo su myit mvau.
Ngo zamzam ne gu sui hau ma but dvo le.
Nang nga myit ason se,nang e shut angvut.
 
O ri byu layuq ri dat zhvit wu le,
Zhvitmyit bo、zhvitdang bo、wum-o bo、myitngon eq myityon ri bo.
Ngo kingking nye gu imyit hau ma haq dvo le.
Nang nga myit ason se,nang e shut angvut.
 
O ri ngaubyi ladam dat yui le,
Zhvuizhvui ngam gu izhvam shuq gat gvilvang,kingking nye gu ngaubyi lo wo dut ra.
Ngo myit ma byviqbyviq zhvin gu mu eq dang hau ma zving dvo le.
Nang nga myit ason se,nang e shut angvut.
 
O ri zhvitdang lada gi dat sangtoq le,
Myit ajam ajvo ngvut gvilang,
Dvingdvup myit gi gege yvang bo le.
Ngo zhe ngon e zhvitdang hau ma chung byvam be.
Nang nga myit ason se,nang e shut angvut.
 
Nang labyvat ngo nang ri zhvit e adat myang,
Ngo gi nang ri amyang e kun za,nang ri zhe zhvit zhe myit le.
Lazhung za be,nang ri ngo myityon e kun adat myang,
Ngo gi nang ngo ri amyang e kun za zhe nyiwui zhe zvimzvim ga le.
 
Ngo gi yvumsing e myityon zhe dat haq ri kai.
Ngo gi yvumsing ri myit zhe dat lvoq ngon ri kai.
Mauwo yoq mai buiyung qap so zhe,ngo qogoi qo-nyaq so wu laingam laising so hui wu.
Laqo e so lo ri,nang nga myit la son se ri gi kimyvo ge ra wa.
                                                                 Puqgva su: Gvoqzhva