Laigva buk qin mu wu

读书要选好书读

时间:2018-01-12 17:35:44

Paqzhvi laigva mvoq bang laigva wu ri paudap e laigva qin wu ra dut le, gegau lai- gva age wu. Byu laigva wu le gi paqzhvi wo mvoq se chung ra midvu ngvut le. Sedat sara mo bve gva toq dvo gvo laigva buk ma yvumsing hi gvut ge yu ra qo, yvumbyu wui eq buinum wui hi gvut byi ra qo, showa mu eq ming ma e mu bi wun zui lo ra qo bve zhaq gva toq shit bum le. Hamai zuisai zhimu mvoq se chung ra qo, zhe gvo bang ri kungga paudvap ra qo, zhe dviq bang ri     zhvitdap shojo ra qo, nyiyap qo ma langjvo e pyinli pyinshuq lai byvam ra qo, xi bve ri  qangqang gva toq shit bum le, hau gi byu dut ma dut se ra dut e byuze byuyap paqzhvi ngvut le. Myiwa sangqang: paqzhvi laigva mvoq su welam ma kasu ga dai yan bum gvo dang ki lum jo, imyit zhvungzum lui laigva buk ma myo wu mvoq aq ga. Laigva gi byu ri zhino tong su ngvut le, ngvut gvilvang laigva gi qin mu wu ra dut le. Shingra ma byu ri wo mvoqjving ge yu e paudap laigva zhoq le, byu ri wo mvoq pyoq ten e gegau laigva ri zhoq le. Akui bve zhe byu ri wo mvoqpyoq mvoqten e gegau laigva zhoq myin bum lo mu, zang yu wu bang e imyit ban byoq ten lo nyi bigvo. Akui hau ngunqe lum wam qe gvun bang, hoq juq jvum wam ase bang, chibila gegau wam gvut gvun bang gi, paudap laigva amyang wu, gegau laigva za zang wu mu dat ngvut le. Gvo bang wui zoshang wui ri paudap laigva qin wu ra qo lago dvunshit byi ra dut ra, zoshang wui paudap laigva myang wu zhang sheq, myitbun zhe bong lo, unuq ri zhe zen lo, dingman byuze ra qo zhe dat myit se lo la mu le. Gegau byu bve gva toq dvo gvo gegau laigva gi shingra gom mai chom dvung byvam ra dut le. Za anvgut ri, zoshang wui asu quq aquq ngvut angvut gu gegau laigva zang wu zhang, yvangmoq yvumsing gung yvumsing zhaq se be su ngam bun lui, gvo bang wui ri hai ja angam, shigvong shilam, dvegon dvewa, hoq ase juq ase, gumrvong gumdvung hai nau hai wam gvut lo le. Gegau laigva gi natdu dede natgang mo, o loq ma bo dvo zhang ori dat kilaq byvam le, xisu yubak mirop atoq ra midvu gi, gvo bang ri ge zoshang ri ge, laigva wu ri byuze yuqyo qo dvunshit e paudap laigva za yu wu ra dut le.  (Puqgva su:Pauqi Mudvom)