Pyinli sik chang zhvoibyvaq lupshang 2020zan Sakung mau lupshang hipom laigva

传递新风 文明祭祀 2020年德宏州清明祭祀倡议书

时间:2020-04-03 09:32:00

  Maugom ma e ganbu mingbyu wui:

  Akui u gi lacung lazan e nyuqnyun yoq lo zhe gvat lui, lupshang yam ri dum lo zhe gvat be. Lupshang yoq gi nganvung pyipau ri kungga、shi bang ri myitbun、ajvu chom dung lvum gvun e tungking bvoi ngvut le. Kizan le lupshang yoq gi maugom mai myitzhup wumzhup gvut xingon zvut wumno lvom jin gvung dvo u ma lo ang dvo ra, wumno xi zhe wo lvom ge、 yuqdu zhup byudu ngap e gvang zhe wo migum ge ra midvu, zhoang zhvoiyung dong lupshang yung chomchung, yakkak e pyinli du byvam mu luiyo e pyinli chom chung, ge e pyinli sik chom dvu shap shang ga lui, Mau wunmyin ban mai maugom ma e ganbu mingbyu wui ri, chom gvut zhe shang ga e hipom laigva byvotoq gvat gvo gi:

  Zvut wumno lvom ge, rapra dong jvang byi. Ganbu mingbyu wui xingon zvut wumno lvomzing qo ri imyit age mu shi, yvumsing gung migum ge mai lailui, buinum zhinve ri migum ge shang, sengang doqdan laigva ma tantan chang zhe, lupshang zhang ma byudu lvoq shau, yvumsing imyit ma bo mu nvutngvop ngvop, buinum aso hui、byupung apung、byuzing azing, zangbvong abvong zo, nyi we dvo bang gi yvumsing yvummau buinum wui ri shangnvang shum nvang gvut shang, zvut wumno xi za awoi ri, byin we atoq, yvummau shut abyam dvau lo gvut shang.

  Pyinli sik chang, zhvoiyung dong jvang byi. Yvumbyu ri azhum zhum gvut gam lui lupshang e angvut zhang myitbun laigva gva byi e mai bvai gvun, wangloq mai shang byi shumbyi、yvum ma jvang byi、banbo dvo byi、sikzo mvanzo ho byi gvut e yung chomchung shang, byumoq a e bvai、zhang yvang ma a e bvai, zhang yvang ma e mu e shum byi ze e jvang byi gvut qo ri imyit mai jvang byi qo lvik gvut yu, xingon zvut wumno doq lvum qo lvomzing ge, zhvoiyung dong jvang byi e shinggan pyinli sik chom chang lvum lo shang.

  Zhvoiyung tungking chang, shen mu jvang byi. Zhungfa amyvu e zhvoiyung tungking chom chang, mangzo ri paudvap、mangzo ri kungga、mangzo ri zhvitdap、mangzo ri girum e pyinli sik chung lui, nyi dvo mangzo ri lago kubau, shi dvo su ri lui yo dong yvum byvam gvut e myit sik chung lvum lo shang. Nyi dvo shi mangzo ri myo kungga, shi be su ri jvang byi ri qinglvum dong agvut shang. Mangyvum ri azhi kik、lupshang ri agun ago agvut, shenchung dong mai iyon yon gvat, shi lo su ri myit mu nvang, nyi dvo bang ri wum ashun nvang ra dong gvut shang.

  Cangpun ri migum, kilaq abo e jvang byi. Azhvoi yung e jvang byi yung gi chom du byvam lo shang, mili migum imyit ra bo, pauzhang age bvuq ga qo eq cangpun mili migum qo chom chang, byu so qo、gongchang、gungyen、mvanyo、byunyi zhowo ma mausau ngun、ngunjvap bve age nyve ga e yoq chang, shinggan mili alvoq jvoi、subve zo ri alang jvo, zhvoiyung sanseng e myuqkau mili chom migum ge shang.

  Yvumsing yvang bichang,wangzan dong jvangbyi. Dangyen ganbu gi yakkak e pyinli lai byvam mu luiyo pyinli chang shit bang eq pyinli sik chang hi shit ra bang ngvut le, lago chang shit, yvumsing mai hi gvut zhe shit mu, buinum zhinve eq gungyam ma mingbyu wui ri zhvoiyung wangzan dong jvang byi yung kojvo lo ra le. Zhvoiyung wangzan、kilaq abo e jvang byi pyinli chang shit byu、kojvo byu eq chang gvut zhvamshit byu bve lu gvut qinglvum shang.

  Ganbu mingbyu wui, zhvoiyung dong lupshang shit qo gi shinggan gom bang wo ngvut le. Nganvung banshoq bang laqom za dvoqyap lui, yvumsing mai gvut hi shit, tungking laili coq chang byu、zhvoiyung e lupshang hi u she byu、zvut wumno lvomzing mu bizui byu bve lu gvut qinglvum lui, zhvoiyung e mau myuqwa ganzvang myvang ra midvu kungga paudvap e Sakung mau gvut qo ma bo dvo wum o chom gvat toq shang.

            Sakung mau wunmyin ban

            2020zan lvomo 3qap 26nyi

            (Puqsu Doqshi Labau)