Bvantau xidong chi ra dut le

砧板应该这样清洗

时间:2019-09-20 09:11:01

  Bvantau gi zanggok ma age shau e chungze lahu ngvut le, chungmyang zhang ladvong dvong ma noq angvut zhang qengqeng gvut dut lo mu, nobau toq lui, mvungko dap dvo le. Haumu, bvantau chi xung nobau sat qo age dvomyvi.

  Zhum gu eq nyoq gu hum ra bvantau wo gamkoq ri gi zhe ge le

  Igvun kau ma chung e gi sik bvantau eq sujau bvantau 2hu myo chung le. Myo ma myo gi sik bvantau chung le. Sik bvantau gi siktan eq siknyvom bo le, sidiq ra e gi aukoq chi ze eq za chi ri awo chi zhvoi, aukoq chi ze(xijejin) sik bvantau agvang ma wang lo zhang, aqing myang ri gi sik bvantau mvung lo lui asan seng dut byuq le.

  Miyu ma chung e kun, yvum igvun kau ma bvantau 2lvum hen dvo lui, zhum gu eq nyoq gu gamkoq hum ri zhe ge le. Nyiwui bvantau chung tang ma, sutchi ze eq lago zhvoizhvoi yvang chiseng byvam ra le. Latung zo bo zhang, sun hum sham eq bvantau qek chi byvam angvut zhang sik tui ze tuibau eq labyvam roq tui byvam ri ge le.

  Laqma bvantau shocu shilvai shoq dap gu e lazhang byvam ra ngvut zhang, wuinye eq anum sutchi byvam ra le. Laqma ngozo、sho bve ngirang shing dap dvo zhang, chinchi wing angvut zhang aukoq chi wing ma izhum gvat nyvun lui sut chi, angvut zhang zhvinwing lazvui zo gvat e mai, wuizhvoi ma lago sansan chi byvom zhvoi yu e mai, bui ma lvaphui yu ri ge le.

  Laqma bvantau ma aron ma ga nam dvo zhang, huqong angvut zhang changzhum eq bvantau ladam sut byvam lui, wuinye eq shoqjun sut chi zhang namshing wo boi byvam le.

  Bvantau nobau xidong sat le

  Bvantau goqko dong angvut zhang advok dvok zo noq ko dong zhang gi bvantau sik tai byvam ra dut be. Haului, miyu ma nobau lago sat ge ra dut le.

  Wuinye eq shoqjun chi, layiban ladam jangjang gu e shazi eq azhvap alap ma hi sut chi byvam mu, kingking nye wuibu eq ladam dum shoqjun chi byvam lui, izhum wing ma nayi isum qing nyvun e mai, ce hui dvo zhang, nobau za wo sat byvam le angvut, bvantau goq lo ra qo lvang wo gam mu, bvantau ri zhe wo chung myang le.

  Ziwaixen eq nobau sat

  Buikau ma ziwaixen eq nobau sat ri gewang gvo le, bvantau achung kun buizvo zhveqzhveq ma nayi 30minit lai shoq lvap byvam zhang, nobau za wo sat byvam le angvut, bvantau huihui za dut mu, nobau wang ra qo ri wo lvoq yom byvam le.

  Izhum eq xau soda 1:1 nyvo lui, izhvam lazvui zo gvat lui bvatbvat za eq bvantau ma but dvo lui, nayi laqing gvo ma dum chi zhvoi byvam gvilvang ge le.

  Sujau bvantau gi zhaq tan le mu, chi lui, nobau gam tan, nye wo tang, mvung bau wang qo bve wo gam lui, igvun kau ma olvang ra ngui le.

  Sujau bvantau migum yung gi zhe lui le. Wuizhvoi eq chi zhvoi e mai lailui, lvomo laqap ladam izhum eq zhvinwing nyvo lui wuinye eq but chi byvam zhang zhe ge le. Gvut ra yung gi izhum eq zhvinwing(linmung wing) nyvo lui, bvantau ma shoqjun mu, wuinye eq sut chi zhvoi byvam zhang ge le. Lailui, pyaubo wing ma nayi 15-20minit nobau nyvun sat byvam mu, wuizhvoi eq chisan byvam zhang ri ge le. (Puq gvasu Mulat)