Miyu ma gvut man e adat ban zho

开水烫餐具 饭菜凉了再放冰箱…… 很多小习惯可能都错了

时间:2019-12-30 10:24:21

  Miyu igvun kau ma, nganvung ori zhaq zang gvut man bum le, wu dvo ri gi zhaq sanseng nvo za gvut, asu e haudong gvut ri adat ban zho. Laqma: Welam ma zang kat zo wun zhang ma, zangzo ra hi ma wuibu eq koqzo koizve shoq byvom byvam; Zangmyit bve cham zhang sheq byinxang ma gvat dvo; Au wo chiseng eq zhang amyvi myvi......xibve banban gi logidat paqzhvi eq seng le dvi?

  Wuibu eq koqzo koizve shoq byvom chi ri nobau awo sat

  Nganvung lawam welam ma zangzo wun e kun, nyenye e paqlap wing angvut zhang wuibu eq koqzo koizve ladam shoq byvom byvam gvut e zhaq bo le, xidong gvut zhang nobau wo sat byvam nvo ngam. Asu e, nobau sat ri ximyvo alui.

  Miyu ma nobau sat e nyesoq gi 70-80℃ myvang le, zvomra minit gvo ra le. Zangseng ma dvo byi e paqlap wing、wuibu ri 70-80℃ gi nye le, asu e chamcham e koqzo koizve ma shoqbyvom gvat zhang gi, nyesoq likdik zhang nyvum byuq be, 50-60℃ gvo za nye alo, nobau sat wum gi roq yvang aluq loq.

  Kasu ga gvilvang, wui eq ladam zokoq ze byvom byvam ri, myoshau nobau wui mai zang shoq toq byvam le.

  Sunzang cham zhang byinxang ma gvat ri nobau zhe toq lui le

  Yvumkau dong ma sunzang zomyvit zhang, nganvung ori byinxang ma dat gvat lvung dvo le. Ka u gvat ri zhe ang le dvi? Nganvung ori ra myit le gi, sunzang cham gu sheq byinxang ma ge lvung le, hau angvut zhang byinxang dat lvoq ten le ga myit bang myomyo bo le. Sunzang cham gu e byin xang ma gvat lvung zhang, nobau zhe toq lui le. Sunzang zhvoq nyoq tang ma, nyesoq nyvum byuq ri gi nobau wang lung be. Zoze 60℃ nyvum zhe be mai gi, nobau toq lo be; nyesoq 40℃ mai 30℃ nyvum jo zhe be mai gi, nobau zhe yvang toq gvung be; 7℃ nyvum zhe zhang nobau myopyang num lo byuq le. Haumu, zoze nyesoq 7℃ ao ngam zhang sheq, nobau ri wo tangzing byvam le, hauzhang sheq zoze hai ara lamu le. Xigi nga- nvung ri zoze hanhan yvang byinxang ma gvat lvung aq ga e lazhvum be.

  Aumyvi myvi amyvi ra e ka myit uqi

  Layuq yuq dai le gi, au banchi eq zhang hanhan yvang aumyvi myvi ra le, ka pong ha byvam dvo, hau angvut zhang nobau wang lui le ga.

  Amu xigi zhiwo ri dvu ra le. Laqma zanggok ashau sanseng zhang gi aumyvi pong ha dvo gvilvang hai ara. Tang ma dum chung zhang wui eq ladam dum byvom byvam mu chung ri, nobau dap dvo gvilvang dat wo nyve sat byvam bira ngvut le. Laqma zhiwo ade sanseng angvut mu myangmyang achung zhang gi, aumyvi myvi dvo ri zhe ge le. (Puqsu Mulat)