Byvo toq laigva akang(laigva saitoq akang)paqzhvi myidvu dang

著作权(版权)知识小问答

时间:2016-08-11 10:13:37

  Hai ri gi byvo toq laigva dvira hung e dat unuq zhak ronjen ga le?

  《Dat unuq zhak ronjen hung zhvum kat》mai misat dvo ma chang, 《Byvo toq laigva akang dvira》hung e dat unuq zhak ronjen gi dat unuq zhak mu azo ngam zui e qo eq sengang laigva ri ga le.

  Byvo toq laigva ako dvira hung e ronjen kabve ma ang ra le?

  《Dat unuq zhak ronjen hung zhvum kat》mai misat dvo chang, byvo toq laigva akang wo e ronjen a-o ma iqo ma ang ra le:

  (1)Ronjen gi yvumsing bau e diqa zong bo ra le.Dai le ngvut zhang gi, byvo toq laigva akang wo e dat unuq zhak ronjen gi sai toq su yvumsing bau gvut toq e loqzo ongshi, subve e ronjen kau lo e angvut.Ronjen gi sai toq su yvumsing bau za gvut toq lo e ngvut zhang gi, subve ronjen eq lazvui lazo za qumlvum ngvut gvilvang, byvo toq laigva akang ma hung byi ra le.Yvumsing bau gvut toq ra e qo gi byvo toq laigva akang hung e lalvum mi- dung changgan ngvut le.

  (2)Ronjen gi lazhung zong bo e ze ma duiging dvap dvo le.Dai le gi hung e gvapan ze zong bo e, ge dum sai dvap yu angvut mu ge chung e ze ma duiging dvap dvo le.《Byvo toq laigva akang dvira》mai misat dvo ma chang, lazhung zong bo e ze ge dum sai dvap yu e gi zenwum ongshi byvo toq laigva akang hung e midung ngvut le,hau mu lui, “duiging dvap dvo be”gi ronjen gvapan ze eq gabve byvo yoq laigva akang hung e gvapan ze gingkaq diqa dut lvum qo ngvut le.

  Anum myang wu e ronjen kau gvut e qo gi kabve ngvut le?

  Ronjen mu zui qo ma, azhung zhung e gvongcijiezhi toq bum lo mu, dum ge sai dvap yu e zhimu myvangdvoq lui eq datbyvung ringzhat lawan mu lui, ronjen kau gvut e qo ri advan dvan zhoq ra, bvong dai gvat zhang gi, midung ngvut zhang gi zhe tang chung byu yvum kau gvut e qo、yingpan yuzhvong kau gvut e qo、datbyvung kau gvut e qo eq gai ma wui ung e kau gvut e gvongpan myizhung ngvut ra.

  Yingpan yuzhvong kau gvut e qo gi dat unuq ung bang dat unuq ma hi mai haq gvat dvo byi e chung pungzhvung angvut mu gi lawan chung e ronjen, xigi anum dai e ronjen yuzhvong ga be. Asu e, laqma hi gvat dvo byi e ronjen gi ako hun mu yu lo e angvut zhang gi, ze ung bang yvumsing dvira ma ri a ang e dum sai dvap yu e ngvut zhang, hau zhang gi ronjen dvira ma a ang e yuzhong dut be.

  Datbyvung kau gvut e qo gi nganvung anum myang e lawam datbyvung wap apau ayu e angvut mu ngun toq mu yu qo e ronjen gi, laqma xibve ronjen dvira ma a ang e ako hun zhang gi, xibve ronjen yu qo zhang gi dvira ma a ang e yu qo ngvut le.Xisu gvut shidaq datbyvung ma dvira ma a ang e ako hun lvum e ronjen gabang ri yu qo nvang gvut e qo gi datbyvung kau gvut e qo dut be.

  Gai ma wui ung e gvongpan kau gvut e qo gi anum myang wu e gvongpan sai ung kau gvut e qo ngvut le.Xisu gvutsai ung kau gvut e gbongpan gi tup dvap ze atu angvan, wu se lui dik le, mirop wang myang lui le.

  Zhe tang chung byu yvum kau gvut e qo gi zuitoq ze ringzhat qo ma lvoqsum gvo dik e kau gvut zong ngvut le.Danggve mai: chung byu ge e ronjen lalvum wui zhang gi, chung byu gi dat unuq lalvum ma xilvum ronjen chung e ako zhvum byi be.Laqma chung byu xiyuq ilvum atoq dat unuq ma ronjen xilvum chung zhang gi, ako ma zang sum byi be.(Yunnan ming laigva toq rung mai byvojvo) (Puqgva su Muiho Mugvai)