WUNPONG文蚌

Indiya ga hparang sa di

印度田园风光

时间:2017-05-14 10:33:48

    Brang Nan anhte hpe shi a daido buga de wa woi chyai na nga tsun ai shani kon, grai na gabu ai hte myit mada da nga ga ai.

 

  17 ya jahpot, manap shat lau lau sha shajin la rai, Brang Nan a buga de bai rot mat wa saga ai. Brang Nan a buga hpe Nnau ga nga ma ai, shi a gawa hpe Nnau Htingnan Nong ngu ai re, Nnau ga mung Indiya na dingdung maga de re hpe sha chye ni ai, ntsa lam hku sha tak la ai, ndai lapran ting lunglung yuyu sasa wawa chyu rai, wamwam damdam, lam numshe pyi nchye wa re ni ai, hkauna pa dam ai hte, hpa-lap yi dam ai sha matsing mat ni ai, dingdung dingda sinpro sinna masat pyi nchye wa re ni ai oi, ngai hpe shadam kau da yang, grai loi na hku byin mat sai, Inglik ga nchye nga ai ko, Gala ga grau bai nchyoi rai, lam dam ai hte mat na sha re, lamu ting wanshi mong ai zon chyu nga, gara de mada dat tim asan awan rai tsit ai lamu n mu mat, mut mut sha anga nga sai.  

  Layang pa langai hta htap lahkong re hprihpro nta langai hpe mu mada sai, wang grai gaba ai, shang wa ai wang pai maga de byinlang hpun ni sen sen rai tu tsom abya nga ai, hkra maga de modo jahkring da na ginsum gap da nga ai, loi tsan ai shara hta manau shadung langai sharot da ai hpe mung mu mada ai, manau shadung dai 2007 ning e go da ai re nga, dai shaning manau galang dum yu ai hpe chye lu ai.

   Nhku gata de shang wa ai hte grai gatsi pyo ai hpe hkam sha lu ai, lakang shakum hku kap ai datbung ni hpe mada dat ai shaloi mu ai, Brang Nan a ganu yan gawa go Miwa ga de du yu sai hpe yu shapro nga ai, Hkunmyin Shilin nlung bum hkan dem ai datbung ni noi da ai. Anhte marai 26 ko dareba Gala la marai manga bai jat rai, nta langai ko sha manam sumshi jan galang ta ru bang wa ai go, Brang Nan a ganu yan gawa hpe myit bai shapu na hkyem saga ai, tsun ga nga yang, ya sha myit shapu ai nrai, anhte manau shang lom na matu Brang Nan a gawa shong kon garum la ai lam grai nga sai, chyeju ga lahkun larang hte sha tsun ma ai bo nrai sa, laika ndai ka nna sha htang ma na mung n rai nga sai. Nta htap lahkong na gok shagu hta anhte hpung ni hkrai gaboi hpring nga saga ai, nhku gata ko sha re nga tim, magyi mago rai hkom yang she shat gok pinra maga de gayin pru wa lu sai, pinra kon simai simo hkai sun, rap rap di galo da ai mamdum lahkong hte grau tsan ai shara de na hpa-lap sun ni hpe mu mada nga ai rai.

 Brang Nan ni a shat sha pinra hta tup ai mu hkra dung garen to nga saga ai, gatsi bungli sisi nga pyo la ai shara rai nga ai, marit maroi ya du hkra grai no lu nngai, tsun ai hte myiman hta shingran pra pra mu lu ai oi, anhte du shang wa ai hte Brang Nan a ganu yan gawa go Jinghpo htunghking hte ro, shat lit bai hkap hkungga ap ma ai, shada tsora hkungga myiman madun hkat ai go ndai hta nan rai sai, dai lapran shat lit lahkong masum hpya sha ai kon, ndai ga na shat lit bo ai htung lai hpa-ji hpe mung jat la lu ni ai. Lu sha lajang jo na matu Brang Nan a ganu go lawu lahta jinghku jingyu ni hpe shaga la nhtom, lu sha woi shajin da sam ai, hpogoi hpo hte shat simai ni hpe aningtsing tsing di makai da u ai, lahpo hte makai ai lu sha hpe mu ai hte, ya jang hpo sha mayu ai myit rong ai, lahpo a n ngot bat hpe marit ai, lahpo hte makai da ai shat lu sha hpe sharong la nngai, galoi mung lahpo hte n hka lu ai, ngai sha nrai anhte Jinghpo ni yong lahpo hpe manu shadan let jai lang chye ga ai.

  Brang Nan a ganu go Sam amyu re, raitim Jinghpo htunghking grai chye u ai, anhte hpe Jinghpo malu masha hte hkap tau la ai hta n-ga, magri jarung ko magri hka bu ra, hka bu hta ta gashin na hka bang da ai, hka bu hpe magri hka-wan hte bai magap kau hkra, marai mi hpra hpra hkyem lajang jahtuk da ya u ai, hka-wan hte hka bu na ntsin ru la nhtom, magri jarung ko ta shin kau rai, ta hte malu masha hta sha ga ai, Htaphtuk ai lusha poi shang ai hku she rai nga sai, dai re go, Miwa ga kon sa ai ni galoi mung adun ko dung hputba let shat n sha man ai majo, loi chyum kau ga ai, shatkan hpumsau gaba ai ni chyahtam grau, lago tsu ai n dang sharang, latson mayu, maidang hpe n-ga mi de gayin ganyet dung dung rai ga ai.

  Dung jahta ngut ai hpang, pyo lam bai gado mat wa saga ai, masha kau mi nga hkui sa, kau mi hkauna pa de hparang sa di rot mat wa sai. Brang Nan ni a nta ndo tsingdu pa loi tsan ai shara hta, Gala ni gat dut poi galo ma ai, hpaida da ai ginsum makau hku lai wa ai shaloi, alak mi nga bat manam hkrum ai hpe Gala bat re ngu myit la ni ai, gatsi bungli shalot hkom let Brang Nan a ganu hkai da ai sanun yi makau hku lai kau da, san tsom ai Jeng htu hka hpe bai rap lai rai, dam lada ai Brang Nan shanwa ni a hkauna pa hta hparang di gachyo bang wa sai。

 Ya yang na anhte hpe tsan tsan kon yu dat yang, sumla soi ninghkring ni soi da ai sumla zon she rai nga ai, ahkye gaba lo ai sinna ja jan lago a gata e, mada nhpra ai hkauna pa hta,

Jinghpo buhpun palong hpun sumro da ai chyinghkai nu num ni hte ningtsing wa la ni, amut mut re yihku hpe ahpre gale kau kau rai, tsit lali hkalung tsom ai hparang ni hpe mawat noiji de di bang di bang rai nga ai, labu shalun dingdung kau ai mung lom, chyingjom let di,

gum let di, tsap let hparang tsan, mani sum rai ngai hpang de hkring mi yu dat ya rit nga datbung dem ai kau mi, ndai de she grau tsom nga lo nga, manang ni hpe shaga maron ai go shaga, nadap ting prang jong nga sai, hkauna pa makau ko ginsum lahkong masum nga ai, ginsum ndo ya hta la langai kawa tong gala ga let tsap nga ai, Indiya ga du yang she hparang ndai daram tsom ai sa mu di ai hpe yong grai yu sharong ong ga ai, shingnoi tup hkra di gun wa lu saga ai.