Jinghpo hpaji景颇文化

101 SHARE NINGHKRING MAHO LA TSAI

101景颇突击队

时间:2020-07-22 15:41:29 来源:德宏团结报

  Shata 7 pro 8 ya na do)

  Shata 9 hta Jinghpo hpyen dap daju ko nna Myitkyina mayan ko nga ai Japan dap ni hpe aja awa htim gasat sana re majo, dap hpung shagu ra gadon ai lam ni hpe lajang shajin na matu matsun shana wa masai. Sat lawat yu yang, shong de gasat lai wa ai hta shadon shadang grau gaba grau laja lana ai majan poi gaba shang ra ai lamyik hpe mu nga sai, gasat ginra mung layang pa mayan de rai na, si si hkrung hkrung anut hkat na hku rai nga sai. Shadon shadang grau gaba ai gasat poi shang na re hpe chye ai shaloi, gabu n-gun lu ai mung nga ai, nu wa ni hte go n hkrum lu sana nhten lo! Buga de go bai nhtang wa lu sana n re ngu myit tsang shajang nga ma ai.

  Maho La Tsai bai tsun ai, Jinghpo dap na Htingnu No ngu ai wa htuk ai Rongteng gasat dap ni a mahkon langai, ning ngu hkon ai da: Levi dap nu, bum mayan na pru, Myitkyina layang ga de du, rot ga lo! Rot ga lo! Hpyen dabang de htim Japan bong hpe rim, guigui hte htim, abong lolo rim. Rot ga lo!

  Rot ga lo! Hkau myi mut la ni ntsa hpaida got, Japan hpaida hpe shakrot, Ngai brang ram lago lam hku rot, magrau grang atsam hpe sharot. Japan bunghku hpe adot, guigui hte hpyen shagrot.

  Nhkai bum a dingdung maga ko hka grai gaba ai Hpung yin hka ngu ai langai nga ai, kawa hpong ni lajang shangut ton ai hpang, 1944 ning shata 8 nhtoi 10 ya shani gasat dap gaba ni matut manoi rai shani tup dai hka hpe rap lai nga ma ai.

  Zinghang Tang ni a hpung na marai langai mi hka ko hkrat si mat ai, hka rap ngut ai hte dap hpung shagu yong, Myitkyina myu makau de du mat wa shajang sai.

  Myitkyina gasat na matu Indiya mung de na Amerigan dap, Miwa dap, Jinghpo dap ni yong Myitkyina grup yin na bum mayan ni ko du bang masai. Japan ni mung Myitkyina grupyin na bum maron kong shagu ko dap jahkrat nna aja awa shingdo gasat na hkyen nga ma ai.

  No Seng dap ni du bang wa ai hte Japan nbungli ni wunong wuwa rai pyen sa nna shanhte a dap ni hpe shani shana bom jahkrat bun, jak sanat hte gap ahprup rai gasat poi hpang sai. Nbungli shana wan gaba hkan htong nna gap ahprup jang, No Seng ni mung aga ko nna dat wan gaba hte htong ton nna pyen wa ai nbungli hpe gap, lahkong maga de nna gap dat ai amyok machyu wan tong gaba ni mung mya mya rai pyen lai nna shani zon she htoi nga sai. Modo lam hte pa layang maga de hto sa hto wa modo hte agang modo, teng modo a wan ni mung htoi gala nga ai, gaja wa yu tsom ai poi shana zon nan rai nga ai. Inglik hte Amerigan ni a nbungli mung, nhtoi htoi ai hte lamu ntsa de nna Japan nbungli hpe htim ajot gayin gap ai, Japan dap dabang hpe htim ajot gasat ai, bom jahkrat ai Japan dap dabang ko wa hkrat ai bom gaba gapo ga nsen mung, lamu ga pyi ga ayai mat na zon nga ngoi gadu nga ai. Myok mota gapo ai numhpu wanhkut ni, gahtong mare hkru ai wan hkut ni, ajan shata hpe pyi n mu mat hkra dun to nga ai. Bom jahkrat ai hpun shalong gaba ni, hkyen kau ai yi dabang zon she krin mat sai. Japan dap ni mung shara magup grai no la nga ai, aten nkau No Seng dap ni Japan a lapran de gasat shang mat wa, aten nkau hta go Japan dap ni mung Jinghpo hpyen la ni a lapran de matep shang nna bai nhtang htim gasat wa rai, gayau gaya gap chyi hkat ai gade lang rai sai pyi n chye sai.

  Dai shaloi na lang rai nga ai, masha ni go“No Seng go Japan ni gap dat ai machyu hkap rim sha kau kau rai nna, shi hpe gara hku gap tim n chye si ai”nga nna tsun gari to nga masai. Maho La Tsai mani sha sai sai rai tsun to nga nu ai. Shi bai matut tsun ai go: No Seng hkum nan go hpa hkala nba n byin yu ai, dai majo“No Seng hpe sanat gap n jung ai”ngu tsu shajang ma ai. Gasat poi ko Japan ni mana maka gap ahprup bun ai, bom lo lo hte jahkrat bun ai ko n hkala ai nga yang, gaja wa nan“Gap n jung ai”rai nga ai. Amerigan dap hte Miwa dap, Jinghpo Kachin dap na nkau mi, Myitkyina hpe shata lahkong jan wang ton nna gasat ai, Jinghpo dap ni lo malong go Myitkyina a sinpro hkran de rap nna hkrau gasat shajang ai. No Seng a dap hpung hpe Manhkring ko nna Mali hka hpe shong rap mat wa shangun ma ai, dai hpang kaga dap ni mung bai rap shajang ma ai. Guihtu, Waushong, Pauhkang gahtong, Wura gahtong, Zaimo gahtong, Pausung gahtong, Waimo, Wohpo zon re shara ni hta gasat poi matut ndi rai laja lana byin sai. Ndai aten ni hta si hkala ai Japan ni grai lo wa sai, lam makau hkan, nam shalong hkan Japan mang grai yat manam jong nga sai. Shara nkau go Japan bunghku ko bom gaba wa hkrat gapo nna Japan bo ni, ahkum achyen achya re ni grai grai tso ai hpun ndung hkan she wa mara jong nga ai. Wan n-gun nau ja la ai hpe n hkam lu nna Japan nkau go tinang hkrai sat si mat ai, bom gaba gapo ganan hkra nna manya angok byin mat ai, wang ton ai ko na ahpung hte ahpung rai htu wo hprong pru wa ai ni mung nga wa sai, ndai nhtoi ni hta sha, Manmyen a sinpro maga shanhte hte nau n tsan ai ko Miwa dap ni hte Japan ni lana mi tup gasat chyi hkat nga ai.

  Hprong pru wa ai Japan wunong mi ting hpe, No Seng a Rongteng hpung ni e abong hku lu rim la masai. Rongteng hpung ni e hkrau chyu hkrau gap gayin sat ai majo, Japan ni hprong lam n nga mat nna, Miwa dap ko laknak wa jahkrat ai mung grai grai nga wa sai.

  Ndai zon rai Myitkyina mayan na Japan dap ni hpe gasat shamyit mat wa nna, 1944 ning shata 8 hta Myitkyina nbungli dabang madu la lu ai ko nna go, Japan ango angam ni mung dingda maga de hprong htingnut yu mat wa masai.

  N GUN PONG LA AI HPANG

  Maho La Tsai bai tsun ai:

  Mying gumhkong ai Jinghpo dap(Shong do hta D-101 dap) hpyen hpung hpo hpang ai shaloi, shong na Jinghpo hpyendap na ngam nga ai nkau mi hte balik dap na ngam nga ai ni hpe gumhpon dat sai. D-101 hpo ninghtan ai hpe 1942 ning shata 10 hta hpang jahtum hpungdim kau nna, Amerigan ni hte lata gindun nna shong nnan Sinlum Bum grupyin ginra ni hta gasat poi bai shang hpang wa saga ai.

  Ndai zon jinghpo hte Amerigan ponghpon gasat poi ni grai ongdang lai wa sai. Jinghpo ni go hpyen wa a jarik jaga hto shalai ai hkrunlam ni Shingdang matut di kau ya ai, hpung go hkap sumwup gasat ladat hte hpyen wa hpe sharu shatsang lu ai, bai nna 1943 ning hta Lido lammo gaba wo na lam ginjang tam nga ai Britisha, Amerigan hte Miwa hpyen hpung ni hpe grup grup ko nna sin makop ya lu ai. Laksan hpo ninghtan da ai. Rongteng hpyen hpung go laklai ai htim gasat zai ladat shakyang da ai ni rai nna mungrum hpyen hpung yong a matu grai garum jo ya lu nga ai. Dai Rongteng hpyenhpung go gadai ni wa rai ta? Jinghpo hpyen dap hte Jinghpo balik dap ni rai nga ai.

  Dai hta Kachin Leve dap hte Kachin Rangers dap ni go Japan hpyen ni a htim gasat zai ladat hpe chye kau ya sai sha n-ga, hpyenhpung shagu a masat hti hkum yong hpe tsun dan sai nga ai. Shanhte a laknak dum gara ko ton da ai mung anhte nan chye da chyalu rai nga ai. Bai nna Jinghpo hpyendap ni go mungrum hpyen hpung yong a matu hkrun lam madun ya ai hta nachying kungkyang manu dan ai ni mung rai nga ai.

  Ahpang do ten e Myen mung de du lom mayu ai ni hpe jarik jaga arung arai laknak, tsi mawan ni alo alam hte hpon bai shagun sa jat dat sai. Dai hpang nbung jong n lang ra hkra nbungli gaji hkrat mai ram ai ndungli gut htu gawat wo la lu sai.

  1943 ning hta hpyenla nnan bai lahkon jat nna Japan hpyen ni hpe mayun sumwup lai ladat hte gasat shatsang ai lam galo ai. Duhkra lado a majo bum tso hpe pyen lai yak ai nbungli, ra ahkyak gan hkrat hkring lu na shara makau grup yin hpe shim lam la ya lu ai. 1944 ning shata 2 hta go Jinghpo hpyenla ni lam madun woi nna lam n hku ai maling dingram hku mayun dok lai di nhtom Myitkyina nbungli gut hpe gasat di la na matu rot sa wa masai.

  Jinghpo hpyenla ni lam shagu hta ma- hkrum madup grai lo, chye chyang kung wa sai majo lata san da ai Kinyu bungli galo ai ni mung grai tup hkrak atang du ai hku shiga jo ya lu saga ai. Ndai bungli go Maho La Tsai arong mi alu anhte hpe tsun dan ai rai nga ai.

  Shong do 1942 ning laman hta Lidu lam mung ngut hkrang kau sai. Jinghpo hpyenla ni mung n-gun grau grau gaba wa nna Japan hpyen ni grai sum machyi hkra gasat shaden lu ai majo lani hte lani Japan ni grau grau myit htum hkrit tsang wa masai. Dai majo Japan hpyen uphkang hpung ko nna ndau shabra dat ai lam langai go: Jinghpo hpyenla (Dap ma) langai mi lu rim yang kumhpa gumhpro Rupe 2500 jo na; woi on ningbo ai masha langai lu rim yang Rupe 25000 kumhpa jo na, ngu ai rai nga ai. Hugong hka mayan hta Jintghpo hpyen hpung ni Japan hpe ading ding gasat ai lang grai lo wa ai majo Japan ni go ningbo gaba Sati Wui hpung ni a hpyen man hpe pyi n hkap shingdang gasat ai sha htingnut mat wa masai.

  1944 ning shata 5, 6 laman, Jinghpo dap ni e Myitkyina na Japan ni a dapdung ginra hpe shamu nlu wang shingkop sin ton manu ai. Nhkai bum, Dauda bum, Naura pa maga de go, du gaba Zinghtung no yan Meili Sim, Yau De Si hpareng ai Jinghpo Myihprap hpung ni shadut shang wa, Hugong maga de go Sati Wui hpareng ai 101 Jinghpo si gui dap ni htu shadut bang wa, Si mo, Hubyin maga de go Chindit dap ni wanleng lam hku nna htu shadut hkrat wa rai, ganghkau ntsa de nna Amerigan Rongpyen hpung ni a nbungli hte majoi joi sa gapo gamong rai nna, Myitkyina ko wang shingdang ton sai Japan hpyen ni gara hku hkap gasat tim ndang mat, masha go lani hte lani si sum mat wa rai nga manu ai. Myit htum ai ni a jum ju rai, Japan hpyenla ni go kawa won gyit la nna shana de jan shang ai hte, hkala hkrum ai hpyenla ni hpe kawa won ko shadung nna, Mali hka hku shayong kau dat nhtom, Manmo na Japan hpyendap na ni hpe hkap tau la nna tsi shangun na hku galo ma ai re, kawa won Myitkyina pyi garai n lai lu yang, Ringja Jinghpo dap ni e langai hte langai hkan gap shingte sat kau manu ai.

  Lam mi hku n mai byin jang lam mi bai gado bang wa masai. Kawa won ko shadun yang shingte rai tai mat ai majo, shanhte go hkala hkrum ai masha ni hpe kawa won gata maga bai gyit shakap nna shayong dat ai hpe mung, Jinghpo hpyenla ni a myi hpe lu magap ya ai n rai, myok hte hkan gap gapo dat jang, Japan mang go nga chyasi zon, hka ntsa de tsot pru wa gajang sai. Manmo de nna garum lungwa a Japan hpyen ni hpe lam ko hkap shingdang kau rai, Myitkyina ko sin ai Japan hpyen ni go hkrai shingtai rai mat nna, hpyendu wa Genmyi Zuga Mi go shi hkrai galun si mat nu ai. 1944 ning shata 8 pro 2 ya shani, Myitkyina ko sin nga ai Japan hpyen 200 hpe Manmo de hprong mat wa ai lam ko hkan sat shamyit kau lu sai. (Bai matut hti ga)