Jinghpo hpaji景颇文化

La shalen hpaji

微型小说:男人和女人

时间:2020-07-22 15:39:23 来源:德宏团结报

  Shadang la langai mi ja gumhpro manu ai hta n-ga, hkum pungzan lamyi laman mung grai preng tsom nga ai. Dai zon re shadang la ko shayi num ni grai nyi ai. Shayi num langai mi shi hpe grai ra machyi yu saku to nga ai. Lani mi na nhtoi shayi num jan shadang la wa hpang de chye-nan hte shi jahkon dat u ai, shayi num jan tsun ai: Myitsu sut du wa e, ngai hpe n matsing sani? Ngai go nang hpe grai no matsing ai, nang go la gaja nan rai ndai. Shadang la dai shiga htang sai. Shadang la dai san ai: Nang gadai rai nta? Shayi num tsun ai: Nang ngai hpe gaja nan n matsing sani? Ngai go Marip Hkon San re, ya hte sha shat jom sha ga ai. Shadang la wa bai htang ai: Grai tongban sai, n matsing mat ni ai. Shayi num jan tsun ai: Hpa n ra ai, nang bungli nau chyat nna rai na re. Shadang la wa bai htang ai: E gaya gahpa she rai sai.

  Marip Hkon San dai hpang ko nna shadang la wa hpe chye-nan hte shiga loi n hkring shalai ya u ai. Shayi num jan tsun ai: Hpa majo rai kun, ngai nang hpe tut e myit dum nngai. Shadang la wa htang ai: Go teng ai re ni? Shayi num jan tsun ai: She teng le, ganing re rai kun na, nang hte shat jom sha nna hkrum hkat ai shani ko nna, nang hpe dingyang adum to nga nngai. Shadang la wa tsun ai: Ngai nang hpe gaja nan n lu matsing mat sai, nang yi tsom ai rai? Tsom shayi re ni? Marip Hkon San tsun ai: Ngai tsom n tsom go ngai hkrai shagrau tsun la ai bo n re, ngai hpe mu yu sai ni yong nang go tsom la ndai nga ma ai. Shadang la wa tsun ai: Reng go an galoi raitim galang mi hkrum shaga yu ga le. Marip Hkon San tsun ai: Grai na gabu sai, ngai ya jang nang hpe mu mayu ai.

  Shadang la wa hkrum hkat ga ngu ai de n sa wa ai. Lani mi Shadang la wa Marip Hkon San a shi bai mu hti sai: Jom hkrum shaga chyai ga she ngu yang, hpa rai nna n sa ai rai? Shadang la wa tsun ai: Ya hte ngai bungli grai kyin ai. Marip Hkon San tsun ai: Nang hte n mu hkrum nna, myit hta gaman gaman chyu nga ai. Shadang la wa tsun ai: Go nre dong? Marip Hkon San tsun ai: Re le, ngai shani shana nang hpe hkrai myit dum nngai. Laika ko tsun yang, hkying ten shagu masha langai mi hpe hkrai myit dum jang go, tsora myit kap mat sai ga re da. Shadang la wa tsun ai: Shade loi ai go n rai na re, an galang sha she mu hkat ai wa, nang ganing rai nna ngai hpe yu ra mat na rai? Marip Hkon San tsun ai: Hpa majo nang hpe n chye yu ra na rai, masha n kau shani shana rau jom nga tim shada myit n chye kap hkat ai, nkau go shada mu hkat ai hte myit dun mat sai. Shadang la wa tsun ai: Mu ai hte tso myit rong chye a ni? Marip Hkon San tsun ai: She rai le, ngai nang hpe mu ai hte sumtso balen jung mat sai. Shadang la wa tsun ai: Ndum ndam shum nga.

  Hpang e Marip Hkon San shadang la wa hpe chye-nan hte shi grai shalai ya ai, raitim shadang la wa Marip Hkon San hte n sa hkrum shaga yu ai.

  Shadang la wa Marip Hkon San hte htinglet hkat nga ai hte rau, Shayi num kaga langai hte mung htinglet hkat ai. Num dai hpe Maji Hkon ngu ai re. Maji Hkon shadang la wa hpe shi hton dat ai: Tsi sha na hkum malap. Shadang la wa ganing re wa kun ngu shi nhtang u ai: Nang gadai re. Maji Hkon tsun ai: Grai tongban sai, ngai nye wa hpe tsun ai she re, nye wa galoi mung tsi sha malap nu ai. Shadang la wa tsun ai: Nang go grai kyet ai gasha she rai nga ndai, nang go la re ni. Maji Hkon tsun ai: Ngai chyom la tai mayu ai re, num she sa pra mat sangai.

  Hpang e shadang la wa Maji Hkon hpe hkrai dum u ai, hpang e Maji Hkon hte hkrum hkat yang, mu ai hte yu tso mat sai. Shadang la wa Maji Hkon hpe tsun dan ai: Num langai mi ngai hpe tso ai nga nu ai, ngai hte hkrum hkat mayu ai nga nna grai tsun ai raitim, ngai n sa jahkrum ai. Maji Hkon san ai: Hpa rai nna n sa jahkrum ai rai. Shadang la wa tsun ai: Num dai ngai ko kap nan na hkrit nna n sa ai.

  Maji Hkon myit hta lagu tsun ai: La sangok nang go, Marip Hkon San hte Maji Hkon go masha langai sha re, nang hpe shalen la na matu gado ai hpaji re.

  Ya shi myit ai ko du sai.