Jinghpo hpaji景颇文化

101 SHARE NINGHKRING MAHO LA TSAI

101景颇突击队

时间:2020-03-27 15:47:17 来源:德宏团结报

  “Agu, Japan majan ten hta nang zon chyinghtok galo ai masha go nanhte hpung kon kaga n nga sai kun?” Teng sha tsun ga nga yang, Jinghpo la ni go chyinghtok mu ko badang grai ong ai hku re lam hpe na yu ai majo san ai re.

  “Dai ten hta Japan hpyen dap de shi sok hkom ai masha marai manga shi jan du ai rai yang, Japan majan ngut kre ai shaloi dan dong mat ai go marai masum sha re, marai mali shi sanit hpe gadai mung n chye ma ai. Anhte dai shana jang hprong lot mat wa nna, hpang shani go Zaiung ko ngai tsa wa a nta e bai du pru wa saga ai. Ngai tsa wa anhte hpe mu ai hte, anhte a hkum na buri hte chyui ai bu hpun ni hpe hkap mu nna, gajong kaja rai hkap yu mau mat nu ai.”

  Maho La Tsai tsun ai go, gatsa wa shanhte hpe hkap mu ai hte gahtet gamot hku san ai: “Aga! La Tsai rang, ya nanhte go mohpyi zon san mat ai, shata gade pyi n rai yang me, buri bu hpun she lang mat ai go, ganing re tsin-yam wa hkrum wa masa ta? Japan ni a lata gatsing gatut sha ai re ni?” Ngu hkap san manu ai.

  Dai shaloi shi go:“Nanhte nta kon pru mat wa ai hpang, anhte Manmo de yu hkrat wa ai, Kunglo hka mahkrai ko Japan ni e hkap rim la nna kuli galo shangun ai shata masum rai sai, anhte hpe Japan ni e Yin- kyang Janda pa de bai woi mat wa ai, lama Japan hpung dai ni hpe Miwa hpro hpyen ni e n hkap gap anyin sat yang go, anhte lu lot na n rai nga ga ai. Masum ya masum na ting majan gasat ai ko, Japan ni hka n lu rap ai ai laman, anhte hprong pru mat wa ai re.” Ngu nna tsun dan nu ai. Shaloi she gatsa wa go:

  “Rai sa rai sa, lot lu jang rai sai. Ya nanhte gara hku son nga myit ta?”Nga nna bai san jang, shi go:

  “Anhte wa ba ni nta de no wa na, rai no wa la rai na ga ai.” Ngu jang, gatsa wa nta masha ni hpe shanhte mali a matu labu palong tam ya, shat lu sha lawan lajang jo shangun nu ai. Shanhte shat sha la nna, Gauri de bai wa nna, makoi da shangun ai rai sha wa la gun rai, num sun lam hku nna Kunglo kon Myutsit de du hkrat wa masai.

  “Bai bai, Myu tsit ko myu shinggan e bum palo gasha mi nga ai, dai bum ko hpun grai tu ai, shong de go balik ni nga ai shara re, ya go Japan ni e nat kau ya nna, akrin a- kru she rai mat sai, ngai manang ni hpe kumshu yi ko makoi nga shangun nna, ngai hkrai sha bum palo dai de gyem lung wa yang, ndum shami du gaba Lazum Tang Ja mung ayat hking hking kau nna, shingkang shingwang rai bum pungding ko maja makran let she n tsap nga la ni! Ngai shingdu maga hku nna shi hpe wa salam dat jang, shi yin rai: Aga! La Tsai, nanhte hpe Japan ni rim mat wa sai nga ai shiga na ai hte, shani shana nanhte a shiga sha la nga ai, shata masum ting du tim hpa shiga n lu la ai majo, Japan ni a ta ko hkrat sum mat sam sai she ngu yang me, nanhte ganing rai bai lot lu ai re ta? Nga nna gabu let, nye ta pyi ahkye di kau ya na zon nga hkra shakram ahkye san u ai.” (Bai matut hti ga)

  Shan shakram ngut ai hpang san htai hkat ai lam go”

  “Anhte hpe Shadan krung kon Janda pa hkan kuli hku woi hkom mat wa ma ai, majan lama n byin yang go lu hprong lot na pyi n tai ai.”

  “Mani nanhte gara ko hkring ai rai?”

  “Alobum Zaiung ko wa hkring ga ai.

  “Ya na manang ni go rang? Yong go lu lot myit ni?”

  “Anhte mali tup rai ga ai, shanhte kumshu yi ko makoi nga ta sai ngu tsun dan ni ai. Ngai go manang ni hpe kumshu yi ko makoi nna kumshu hkum lagu sha ngu htet kau da nngai.”

  “Ngai go du gaba Gumja No ni a nta ko hkring nngai, daina anhte nlang shi a nta e bai sa hkring sa ga, ya ten n jau sai, na manang ni hpe shaga la nna rai mat wa saga.” Lazum Tang Ja shatin dat nna, shi mung kumshu yi e lagyim nga ta ai manang ni hpe sa shaga la nna, Gumja No ni a nta de wa manam mat masai.

  Maho La Tsai loi mau la nna bai tsun ai go: “Alo bum go bum lahkong re, bum langai go loi tso, langai go loi nyem ai, masha ni tsun yang shong de dai Alobum ko Utong manau nau yu ai nga ma ai, go teng ai kun. Grau tso ai bum hta go Inglik hpyen ni hpyen dap jung da ai shara re, dai shara go Miwa ga de hkrang ai lam madung rai nga ai. Bum pungding ko grai ra tsom ai, bum gaang ko chyingto hpun gaba langai tu ai, dai shara ko hpyen dap langai jung na re nga nna, hpyen du gaba Sati Wen, du wa Gumja No, du wa Zau Seng, du wa Lazum Hka, bai langai mi go Amerigan hpyen du re, shi go chyinghtok shaman na matu hpyen lahkon ai re da, shi tsun yang, shong shani masha marai sanit shi jan lu lahkon sai nga ai.”

  “Agu, Alo bum go Miwa mung Maru chyinghtong kon lai hkrat wa yang du ai shara re, nang tsun ai Zaiung go Alo bum no lai yang she du ai n re ni?” Ngai mung loi mi na mau mat sai, shi tsun ai ga loi mi n hti n htang nga wa nna, ga do do nna bai jahkring kau ya se ai.

  Sak latsa jan ning re dingla hpe shara dai ni tsun n jo wa re nga ai ngu nna tsun na mung n gui rai, shi tsun ai hku bai matsing la ai go ning da:

  “Ngai hpe Utong bum de sa wa na hku tsun ma ai, ngai go Miwa ga hku nna sa yang go ngai lam chye ai, ndai gata maga de nna sa na matu ngai n chye ai, n lai yu ai ngu jang, shanhte ngai hpe ningwa ba ni a nta de wa san la nna sa masu nga ma ai. Dai majo mali ya ngu na shani anhte wa ba ni ko bai nhtang wa n htom, Utong bum de lung nna, dai shara hta Amerigan hpyen hpung 101 ni nga ma ai, dai ko chyinghtok masha shaman ai shara re nga ma ai.”

  “Agu nanhte Yindiya ko pyi shaman la sai mi, dai ko na 101 ko no wa shaman na hku kun?”

  “Anhte dai shara ko du yang she, hpyen du langai mi hkrai Jinghpo hpyenla marai 37 hpe shaman shakyang nna nga nga la ai. dai ko du jang she, anhte hpe mahtang hpyen wa shaman ya na matu shaga ai re hka. Gara hku shaman a ni nga yang, hpyen ni hte hkrum jang gara hku sadi maja na, sanat hpe ganing di lang na, hpyen wa hte gara hku yan hkat na, sanat pala n ma ai sha hpyen wa hpe sat kau na, sanat run nna bai shachyo la na hpaji re ni sharin ngut ai hte, du No Seng du pru ra ai, shi mung Shadan krung maga de nna sa wa ai re, shi go Na hpo Lohkum kon sa wa ai rai nga ai, No- Seng go shi a Fasi rengja hpyen ni hte Ame- rigan lewui hpyen ni ma gapyon nna, Gatta kon Myitkyina du hkra gasat shang wa ai re. No Seng go majan hta amat grai lu ai wa re, shi hpe gadai gap tim n hkra ai da, pala pyi shi she rim sha kau ai re nga nna grai tsun shagrau ma ai, Japan ni hate gasat hkat ngu nna,Amerigan ni hpe masha gade sat kau sai ngu wa tsun dan yang, sakse nmu ai nga nna n kam ma ai majo, hpang hkan Japan lu gap jang nhpye ko Japan hpyen la ni a na gadoi di gun wa nna wa ru agat dan jang she, Amerigan hpyen du ni grai mau shagrau mat ma ai.

  Anhte mali go Tat rengja hpung ko rai ga ai, Tat rengja go Siti Wun nan woi hpareng ai ni re. Lazum Tang Ji go anhte hpe du gaba Sati Wun hpe shachyan ya u ai, shi tsun ai, ndai hpyenla marai mali go Yindiya ko hpaji hkum hkra shaman shakyang la nna du wa ai ni re, chyinghtok mu go shanhte hpe nan mai kam ai, ya ngai nan nang hpe gyau ya sai ga re, nang gara hku lang ra yang gara hku hpareng lang u, nga tsun nna ap da ya kau nu ai.” Shi a ga hkraing ai hte, nayi yu dat yang n jau sai.

  Hpyen la dingsa wa a mayu mung nau shaga kau nna krop wa sai, shat kan mung kya wa re ten rai sai majo, n tsun saga, hpot ni bai matut tsun ga ngu tim, shi bai tsun jat ai go: Anhte Mungmyit gutong kon nna Balong Loilung de sa wa saga ai,dai lang anhte hte rau hkom ai chyinghtok hpung ko, ma la gasha langai lom ai, shi hpe go Ngai Tong ngu ai re. Shanhte go ngai hpe Ngai Tong hpe atsom sha woi hkom na hku gyau ya ma ai. Shi go ma no re majo, gadai nau n sadi nna, Japan shiga grai lu sok la lai wa sai wa re. Anhte Balong Loilung ko du ai shaloi, shi hpe hkrai dat nna hpyen shi sa sok shangun ai ko, Balong ni e rim la nna, la machyo gadoi di kau ya nna si mat sai. Balong Sam ni go Japan hpe n gasat ma ai.” Shi shing nga tsun ai lam go, ndai laika nnan ka hpang wa ai ko ngai tsun bang sai. Shanhte Ngai Tong hpe sa tam ai shaloi, nsa hti mat nga la sai da.

  “Agu rang, Ngai Tong hpe sat ai masha ni hpe ganing n di? Matai n htang la rang?”

  “She htang le, du gaba Lazum Tang Ji ngai hpe nan sa lajang shangun nna, ngai nan Balong gahtong de sa nna, la sanit shi lahkong hpe rim la n htom, shanhte a la machyo ma hkra gadoi di kau ya nna si mat shangun sai.” (Bai matut hti ga)

  “Masin mi asi di sai i!”

  “She di ra le, Ngai Tong chyinghtok galo nna lu wa ai shiga hte, Japan hpyen dap gade hpya kau, Japan hpyen gade sat kau ya sai rai nga yang me.” “Agu, daini ndai ko no ton kau saga, hpot ni bai matut tsun hkai na re, ya go shat sha hpalap lu rai no hkring sa la saga, nang mayu grai krop mat sai.”

  “Mai sa mai sa, nang sha lu madat yang ngai chyau go no lu tsun ai go e.”Maho La Tsai shi a myit hta, moi na majan prat hpe dum dat jang, shabrang sing sing no rai dum sam ai, grai no hkai matut mayu nu ai re, ngai jak ni la kau di shakre kau saga ai.

  Shana shat go Mesai hka hkinggau ntsa e galo ton ai shat seng ko sa sha ga ai. Shat seng shingdu maga go Myen mung hte Htai mung a jarit mahkrai rai nna, mungdan lahkong a donghkon jung ton ai ko, hpaga yumga masha ni wa wa sa sa rai at nga ma ai. Mesai hka go Myen mung hte Htai mung lapran na pa gaang hku lui ga lai mat wa ai majo, hka lam deng mi daram ko mahkrai langai ngai hkrai da nna, wa wa sa sa re mungdan lahkong na mung masha ni hpe manu shangun nga manu ai. Mesai go Myen mung maga de re, Mesai myu de go nbungli dabang mung nga ai, Mesai kon nna Myenmung Yanggung, Mandale de, shing n rai Htai mung Bankok de nbungli dung nna sa ai ni, dai ko hkrai sa dung ai rai nga ai.

  Ninghkring Maho La Tsai go anhte hte shat seng de shat n sa sha ai, shi hpe go no ku jong na hpungtau sara ma Maho Matsai sa shadu jo ai. Hpa majo nga yang, Maho La Tsai go dat namhpun bang ai simai simo n sha, dat wushat jo ai Wa shan U shan ni n sha, U di hte namlap shadu ai simai sha sha nu ai, dai ko gahpri re sha lu ai majo, shi hpe shat n lu woi sha kau dat nna myit grai n dik kau ni ai.