Jinghpo hpaji景颇文化

U NI MANAU MANAU AI LAM

鸟类目瑙的起源

时间:2020-02-11 17:01:25 来源:德宏团结报

Ka ai: Htoi Man

  Amoi

  Hkrang Sin-yang Hku Shatung e,

  Gatzi Asi Gatrai Asi wa si ai da.

  Gatzi Asi wa ngai,

  Gatrai Asi wa krai yang,

  U namji namchyoi unong numroi,

  Umyin sumhpa ni go,

  Hkrang Sin-yang Hku Shatung e,

  Gatzi Asi mahkon,

  Gatrai Asi shington ma ai da.

  Nnyi nyet u go:

  “Gatzi Asi hpe nyet nna la ga,

  Gatrai Asi hpe nyet nna sha ga.”nga.

  Shakrai u go:

  “Gatzi Asi hpe tsun garai nna sha ga.”nga.

  Shingtu u go:

  “Gatzi Asi hpe,

  Shingtung Aju e she mahkon sha ga,

  Shinggam Manau manau nna she,

  Hkri-on sha ga!”nga sai da.

  Umyin sumhpa sha ni go:

  “Shingtung Aju e Gatzi Asi mahkon sha,

  Shinggam Manau manau nna she,

  Gatrai Asi shington sha ga!”nga masai da.

  “Ju madu gadai tai?

  Manau numba gadai rai?”nga yang,

  Shingtu u go:

  “Ju madu ngai rai,

  Manau numba ngai tai na!“nga sai da.

  ”Ju Jaili gadai rai?

  Shinggam Manau Jaiwa gadai tai?“nga yang,

  Ningngon Ra-nyem ura go:

  ”Ngai tai na!“nga sai da.

  Ningngon Ra-nyem ura wa Ju Jaili mai,

  Shinggam Mnau Jaiwa tai sai da.

  Mateng ya du:

  ”Oh...oh katau ri“nga nga ai da.

  ”Shingtung Aju Hkringwa gadai rai?

  Shinggam Manau Dumsa gadai mai?“nga yang,

  Chyangngau Tang ula go:

  ”Shingtung Aju Hkringwa ngai mai,

  Shinggam Manau Dumsa ngai tai na.“nga sai da.

  ”Lamu Mahkon gadai lung?

  Madai Hkinjong gadai dung?

  Shingtung Aju Hkinjong gadai mai?

  Shinggam Manau Hkringlai gadai tai?“nga yang,

  Dinghkok u go:

  ”Madai HKinjong ngai mai,

  Shinggam Manau Hkringlai ngai tai na.“nga sai da.

  Mateng ya du:

  ”Kok kok kok kok.“nga shaga nag ai da.

  Shingtung Aju chyin num wa,

  Shinggam Manau maka go she hkum wa sai da.

  ”Nau shong gadai shong?“nga yang,

  Ugo Hkungrang wa go:

  ”Nau shong ngai shong na?“nga sai da.

  Ugo Hkungrang wa nau shong shong wa yang,

  Sut rumdung sa gorang yu yang,

  Lamun Unong wa n nang,

  Latsa Utong wa n shang ai da.

  ”Ugo Hkungrang wa nau shong shong n mai ai.“ngu sai da.

  Shaloi Ugo Hkungrang wa go:

  ”Ngai mung ju maka sha mi go kap na nngai.“nga sai da.

  ”Ugo bo wa shala,

  Hkungrang bo jahta:

  Ju lai maro shaloi,

  Shinggam nau shai dinghko jahkoi na.“nga sai da.

  ”Nau shong gadai bai tai?

  Kumto gadai bai rai?“nga yang,

  Utong wa go:

  ”Nau shong ngai rai.“nga sai da.

  Lanung Sinwa hte Samui Yit ula go:

  ”Kumdo an tai na.“nga masai da.

  Utong wa nau shong tai,

  Lanung Sinwa hte Samui Yit ula wa go,

  Kumdo tai rai masai da.

  ”Sut rudung gadai shara?

  Gan naura gadai shapa?“nga yang,

  Chyabyen Bye ula go:

  ”Sut rumdung ngai shara,

  Gan naura ngai shapa na.“nga sai da.

  ”Aju hpajau gadai rai?

  Manau hpajau gadai tai?“nga yang,

  Hkongsek u go:

  ”Aju hpajau ngai rai,

  Manau hpajau ngai tai na.“nga sai da.

  Mateng ya du:

  ”Sek sek ,sek sek“nga shaga nga ai da.

  ”Shingtung Aju hpareng gadai rai?

  Shinggam Manau hpareng gadai tai?“Nga yang,

  Jingling u go:

  ”Shingtung Aju hpareng ngai rai,

  Shinggam manau hpareng ngai tai na.“nga sai da.

  Mateng ya du:

  ”Tik tik,tik tik“nga shaga nga ai da.

  ”Lamun damyin hpe gadai sharu?

  Latsa damyin hpe gadai shagu?“nga yang,

  Sumshi Mali Shi u go:

  ”Lamun damyin hpe ngai sharu,

  Latsa damyin hpe ngai shagu na“nga sai da.

  Mateng ya du:

  ”Sumshi mali shi,sumshi mali shi“nga shaga nga ai da.

  Shingtung Aju chyin num wa,

  Shinggam Manau maka go hkum wa sai da.

  “Shingtung Ju shat gadai shadu?

  Shinggam Manau shat gadai shadu?” nga yang,

  Nji Chyaroi u go:

  “Shingtung Ju shat ngai shadu,

  Shinggam Manau shat ngai gapru na.” nga sai da.

  Mateng ya du:

  “Lau di mu lo, lau di mu lo!” nga shaga nga ai da.

  Amu shabrai go:

  Latsun bansho mi ya,

  Mateng ya du wuban shabyi ka ai da.

  “Aju ntsin gadai ja?

  Manau ahka gadai ja?” nga yang,

  Hkumtai u gum wa go:

  “Aju ntsin ngai ja,

  Manau ahka ngai ja na.” nga sai da.

  Mateng ya du:

  “Um hum,um hum.” nga shaga nga ai da.

  “Aju hpunlum gadai mai?

  Shinggam Manau hpunlum gadai tai?”nga yang,

  Hpun-ya Jung u go:

  “Aju hpunlum ngai mai,

  Shinggam Manau hpunlum ngai tai na.” nga sai da.

  Mateng ya du:

  “Brok brok,brok brok.” nga shaga nga ai da.

  “Aju n-gu gadai wu?

  Shinggam Manau nhpang mam gadai htu?” nga yang,

  Nmoi Mam Htu u go:

  “Aju n-gu ngai wu,

  Shinggam Manau nhpang mam ngai htu na.” nga sai da.

  Mateng ya du:

  '“Yoi si lu!” nga shaga nga ai da.

  “Aju latsun gadai ye?

  Shinggam Manau ningnam gadai hte?” nga yang,

  Hpotsong Sok U go:

  “Aju latsun ngai ye,

  Shinggam Manau ningnam ngai hte na.” nga sai da.

  “Aju latsun gadai sa?

  Shinggam Manau ningnam gadai sa?”nga yang,

  Uhkroi u go:

  “Aju latsun ngai sa,

  Shinggam Manau ningnam ngai sa na.”nga sai da.

  Shingtung Aju chyin num nna,

  Amoi Hkrang Sin-yang Hku Shatung e,

  Namji namchyoi u ni go,

  Gatzi Asi mahkon,

  Gat rai Asi kungdon,

  Shingtung Aju rai,

  Shinggam Manau shai rai wa masai da.

  Utong go nau shong shong,

  Lanung Sinwa Samui Yit ula go kumdo tai;

  Sut rundung sa shang,

  Gan naura sa wang yang,

  Lamun Unong wa Nang,

  Latsa Utong wa shang,

  Gatzi lakung laron ai hpe go,

  Sut Ninggum shamai,

  Gan Ga tong shingkron shatai;

  Gatzi Kumdung hpe go,

  Sut dingnu shamai,

  Gan dingtsang shatai;

  Hto Gatzi ningdung,

  Gatrai bunghkum hpe go,

  Sut rumdung shamai,

  Gan naura shatai sai da.

  Shaloi Sut Wa Madu hte,

  Ninghkong Jaiwa Gumtung Tu Hkra go:

  Gatzi ninghpang sa tsap,

  Gatrai ninghpang sa tsap nna,

  Sut Wa Madu e:

  “Gatzi ningdung de e,

  Shingtung Aju rai ai, Ju madu gadai re?” ngu yang,

  “Shingtung Aju madu go,

  Shingtu U ra.” ngu sai da.

  Shingtu U bai san:

  “Le Gatzi Ninghpang sa tsap ai go gadai re?”

  “Sut wa Madu re.”

  “Da da na yu mu lo!

  Hto de na shingtung Ju madu Shingtu u,

  Nang de na ngai Sut Wa Madu,

  Wunchyen amying go rum,

  Noigong magyep go hkrum;

  Wunchen amying na-shang ra,

  Noigong magyep na-shang ja ai.

  Hto de na Aju Jaili gadai rai?

  “Ningngon ura re.

  Le Gatzi ninghpang e,

  Gola ninggum sha nyit,

  Sinwa maihtong sha htit re gadai re ta?”

  “Ngai Gumtung Tu Hkra Ninghkong Jai wa rai nngai!”

  “Da da na yu mu lo!

  Hto de na Shinggam Manau Jaiwa Ningngon Ura,

  Nang de na Ninghkong Jaiwa Gumtung Tu Hkara;

  Wunchyen amying na-shang ra,

  Noigong magyep na-shang ja sai.”

  (Lajang ai Alat Gun Ong)