Jinghpo hpaji景颇文化

2020 ning lamu kap shata shaning ningnan bai du ra ai

2020年春节又来临

时间:2020-02-05 10:36:22 来源:德宏团结报

  Lamu kap shata hpe moi jiwa ni a prat hta go, ahkru, ara, awut, shala, jahtum, sa- ngan, shi mari, gupshi, guptung, kala, maji, maga ngu hti nna ahkru ta hpe shata 12 ngu ara ta ko shaning ningnan shang ai hku hti ma ai, ahkru ta go yong ni mu lu mu sha hkru ra nna gabu gara rai shaning ningnan shang wa ai hku ngu ara ta hpe shata langai ngu hti ma ai.

  Ndai lamu kap shata go yin hkyen sha ai prat hta hti ai rai sam ai dai majo shata 2 hpe go awut ta ngu ai go yihkyet awut awat nga ai ten re nga ai, shala ta go shata 3 rai nna hkai ningmai shalat ai ten hkaili ni tu ala wa ai ten re nga ai, bai jahtum ta go shata 4 rai nna ginhtong jahtum sai, hpungdim yo nam shang wa sai, yi magang wa ai ten rai sai, sangan ta go shata 5 rai nna yi magang an ai ten hkai ningmai ni tu tsom lali wa ai ten rai sai, shi mari ta go shata 6 rai nna yinam gaba rai sai, gumshi ta go shata 7 rai nna yi-nam tong wa, hkai ningmai ni gabong wa ai ten rai sai.

  Guptung ta go shata 8 rai nna hkai ningmai ni gabong wa, shingchyo chyo wa ai ten rai sai, kala ta go shata 9 rai nna hkai ningmai ni yong nsi naisi mu mada wa nna yong ni myit la nga wa ai ten rai sai, maji ta go shata 10 rai nna nsi naisi ni si maji wa ai ten rai sai, maga ta go shata 11 rai nna hkaili ni yong nsi naisi myin wa nna U gon ai ten rai sai. Raitim 1970 jan ning hta hpaji sara ni ko nna ahkru ta hpe shata 1 ngu bai hti lang ai go ya du mateng rai mat wa sai rai.