Jinghpo hpaji景颇文化

Jinghpo Wunpong amyu ga lakying Zi Maru Lashi Lisu ni ka ji dum wa ai lam

景颇族跳嘎志舞的由来

时间:2020-01-20 16:17:12 来源:德宏团结报

  Anhte Chyurum ai Jinghpo Wunpong amyu sha ni go majan hta grai nington ai amyu re, shing rai moi jiwa ni hkai ai maumui mausa hte anhte ni mu dep ai do, mu hti ai laika ni hta ka da ai labau hta mung anhte Chyurum sha ni majan hta ram ram nington ai hpe chye la lu ga ai. Shingrai chyurum Jinghpo amyu sha ga lakying Zi, Maru, Lashi, Lisu hpunau ni ka ji dum wa ai lam mung ndai ko nna byin wa ai re hpe chye lu ai.

  Moi shong de Shapong yong wa a prat hta anhte a gaji gawa ni ginru ginsa sat yu wa ai shaloi hpyen majan hkrai gasat nna ndai daini anhte nga shanu ai ga ginru ginsa yu hkrat wa ga ai. Dai ten hta, daini anhte Chyurum sha ni ton kau da sai ginra Sinkyang, Tipyet, Yinnan Sishon ko nna daini na Gala mung na, Jinghpo ginra Sam ginra, Myen mung na Mandale du hkra lu bunghkup lai wa saga ai da.

  Rai yang, dai ten hta ya na hpunau ga lakying ni go Tibyet ko nna Yinnan hte Sishon ginra ni na kaga amyu ni shong sa nga ai ginra de sa ginru ginsa sat du nna sa lu bunghkup nna dai ginra ni hta dai amyu ni hpe up nga sai da, shing rai shu mashi nga nna nga mat wa sai hpang, dai ginra ni hta sa nga ai anhte a daini na ga lakying chyurum hpunau ni hpe ginra masha ni go ra mari, ganon pyo na matu numjo num ya rai laihkau laina shu mashi nga hkra jom nga masai da, rai yang hpang e dai ginra ni hta anhte amyu ni n lu bunghkup mat ai ten lado mi bai du wa sai majo anhte a chyurum hpunau ga lakung ndai ni go mayu chyasam amyu ni a aga ga nang mat sai madu jan ni, gashu gasha ni hpe woi nna anhte a ginjo gaba Hka hku ga de bai nhtang wa mat sai da. Shingrai anhte a ginjo gaba Hka hku ga de n htang du wa ai hpang, shanhte ni mayu ni ko nna la wa ai ka manot hkrang ka ji ndai hpe anhte a jiwa ni jaiwa gumhkong yu wa ai jaiwa manong hte galo jahtuk la nna grau pyo hkra daini na zon nga ai ka ji manong mahku hte ningrai dingshon e dingshon ka ji nga nna ahting htingrong shakon kungdon hkri on ai kaji hpe grai hkrak hkra ka manot jom mahkon kungdon ai labau lu saga ai rai. Shanhte ni Zi ga hku nna, Maru ga hku nna, Lashi ga hku nna, Yauyin Lisu ga hku nna chye ka chye hkon ma ai rai.

  Ka ji hpe nta madu ni a akyu ara sut gan yamnga wunli hpyi ai lam, Manam hkap hkalum ai lam, Dodap salang ni hte chyahpung gumgun ni hpe hkungga ai lam, Htauji shaga ai lam, Dinghput htingra tam mat wa ai lam, Ndai gahtong na dugyi salang ni hpe wa shangui ai lam, Mi na dinghput htingra de n htang wa nna asut a gat wa la ai lam, asut agan hte go gan n-go htot yu wa ai lam, laring Gumrang asut agan yong gahkyin ton sai lam, nta madu ni a ahting htingrong mying gang nna hkri won ai lam, hpun kawa tam sa wa ai lam, dum nta galo na hpun kawa tam sa wa ai lam, dinghput htingra tam ai lam, manam chyadam ginghka ai lam, nbung gaja tam ai lam, nbung kaga shaga la nna asut sharing ai lam, wudung wa dung yam nga sut hte hkaili asut sharing shachying bang wa ai lam, lupmoi matsi tam mat wa ai alm, nta dingshon marong jahpu ai lam, mare mying gang nna dingshon gajai marong matsa lahkon shabon dat ai lam, ga bo ndai hte hpe shana tup nta ningnan nhku madin hkumbang shinggrup, do dap, hko dap hku ta hkindun nna ka mahkon gayin ma ai.

  Ka ji dum yang shong e ka ji ganu wa ai nta ko nan shat lit gun nna sa shaga la ra ai, nta ningnan ko ka ji dum hpang wa na rai yang mung shada hkungga hkat nna dingshon htongka shong woi shang ka kau ngut ai hpang ka ji gawa wa hpe tsa hko ton nna, madu gahtong na mahkon lahkong atsom mon lang nna ka ji ganu hpe hkachyi sa gali la nna, shana tup tsa dinghkru hpai rai jom shado woi ka ma ai rai, ngut ai hpang jahpot mung ka ji man myit ai, ka ji shat sha ai htunghking lamang ni hpe no galo nna she hpungdim dat ma ai rai.