Jinghpo hpaji景颇文化

Shi sok masha hte salang ni a san htai

委员、代表心声

时间:2020-01-20 10:32:55 来源:德宏团结报

  Shi sok masha san ai: Salang wa na hpa bo gasha mying ganing ngu ai re ta?

  Lahpai Ting htan ai: Ngai go Lahpai gasha re, shaga mying go Lating nga ma ai, dai majo Lahpai Ting ngu ai re.

  Shi sok masha san ai: Salang wa nang ndai lang zuphpong wa lom ai go hpa bo hte seng nna shon shana mayu ai kun?

  Lahpai Ting htan ai: Ngai ndai lang zuphpong ko tang madun mayu ai lam lahkong nga ai. Langai mi go ruyak madi shado magam bungli hpe ya 2019 ning hta go shangut wa do de rai sai, raitim mung ya no mu mada ai, hpa bo no ra ai ngu ai ga bo langai mi. Lahkong go makam masham hte magam bungli ngu ai ga bo lahkong gun sa wa ai hku re. Ya nambat langai hta ruyak madi shado magam bungli ndai hpe 2020 ning hta matsan gumchyop ro gabai kau lu hkra, ongdang lu hkra masing masa hpe galo to nga sai hku re. Raitim ya anhte a buga hkan wa du yu yang, magam bungli galo sa wa ai shaloi, galo n du ai lam loili no nga ai, magam dap ni woi galo ai bungli go hkrak sa, raitim bungli sa galo ai wa atang n du ai majo rai na re ngu myit lu ai, dai magam bungli hpe atang du hkra galo ya yang grau myit dik na nhten ngu myit du ai hku re.

  Shi sok masha san ai: Ya lam lahkong hku nna go?

  Lahpai Ting htan ai: Lam lahkong go, makam masha hte magam bungli re, maning ko nna go anhte mungdan na Makam masham Miwa mung na masa hkan ra ai, Hkrisatsan makam masham hpung Miwa mung masa hkan ra ai nga nna woi galo nga sai hte maren, makam masham hpe Miwa mung masa hku, myit ra ai lam hpe hkan nang hkan sa ra nga saga ai, anhte Miwa mungdan na tara hta hkrak tup htaphtuk hkra no shakut na re, makam masham lam hta sha nre, mungdan a magam bungli hpe galo shakut ai hte rau, mare gahtong a matu, tinang a buga a matu, n-gun atsam hta hkan nna, madu maibyin ai shara, kam mai ai shara ko tsap let, atsam htum hkra, hpaji htum hkra galo shakut ga ngu mayu ai, ngai hku nna go dai hku hkam la nngai.

  Shi sok masha san ai: Ya salang wa go gara buga na gadai rai nga ai kun? Ndai lang na zuphpong ko hpa bo shon tsun hkyem nga ai.

  Lahpai Zau Yo htan ai: Ngai go Shuili ko nna du sa ai re, amyu hte makam masham hpung ni a dat gasa rai nga ai, shaga mying go Lahpai Zau Yo ngu ai re. Nai lang na mungdo mung masa bongban rapdo ningdo 12 salang rapdo nambat 3 lang zuphpong ko wa du lom ai go, ya ten hta a hkyak ra nga ai go, Sakhkung mungdo ko shanu nga ai amyu bosang shagu, mungdan asuya hte pati hpung ni woi on ai gata ko, grau nna myit hkrum mang rum let, magam lam shagu ongdang lu hkra, grau mai gaja wa lu hkra jom shakut sa wa ga ngu mayu ai.

  Shi sok masha san ai: Ya salang jan go gara buga na du sa ai re ta? Shaga mying go ganing ngu ai re ta? Ndai lang na zuphpong ko hpa bo shon tsun ai rai kun?

  Ho Shu Fang htan ai: Ngai na mying go Hu Shu Fang ngu ai re, mungdo kunghpan hpaji hte bu hkom dap ko nna sa wa ai re, ndai lang na zuphpong ko anhte Jinghpo Wunpong amyu ni a htunghking hpaji hte seng nna tsun shon mayu, ya ngai mu mada ai hku nga yang, anhte Jinghpo Wunpong amyu ni a htunghking hpaji nkau mi mat mat wa nga ai, dai hpe atsom no hkan sok shinggyin, ka lajang ton, dat sumla hkrung hte dem ton re bungli ni hkan galo ra nga ai, Jinghpo Wunpong amyu ni masha hkum shagu lit la nna, n-gun no jom dat ga ngu mayu ai.