Jinghpo hpaji景颇文化

JINGHPO LAILA HTE MUNG TSO MYU TSO MYIT

执着的热爱景颇文,爱国之心

时间:2019-01-08 16:35:26 来源:德宏团结报

  Anhte Jinghpo Wunpong amyu ram rot shayi shadang ni, Myitsu lasang, nu num wa la ni, mung tso myu tso mungga chye hko tsun ai mung lo malo rai nga ga ai sha n rai, Jinghpo Wunpong htunghking labau lara manat ai mung lo lo re, Jinghpo Wunpong hkrisatan chyum laika buk manat ai mung grai lo nga ai, ginwang shagu na Jinghpo Wunpong htunghking sharot hpung hta shang lom ai ni mung grai lo ai, lo malong go,“Jing- hpo Wunpong htunghking sha- rot ga!”nga ai hkrai re, rai yang ya daini na Jinghpo Wunpong amyu mare buga lo malong hta, tinang madu amyu a“Jinghpo laika”hpe shingdu dat kau wa ai hte, Jinghpo yu-ngui shalat, hkon ai ni yom mat wa ai lam yi dum nga ai kun? Ngai du hkom yu ai Jing- hpo amyu mare lo malo ni hkan na shawa zuphpong nta hta, Jinghpo laika sha pyi n kam shakap mat ai hta n-ga, asi apoi, dingshon poi, hkungran poi, ji ga kumhpa matsing ai pyi go Jinghpo laika hku n ka ma ai, zuphpong mungga laika mung Jinghpo laika hku n ka ma ai,《Myithkrum shi laika》, 《Wunpong》 laika htet hti ai masha mung n lo ai, mare gahtong langai mi ting rai yang, masha langai lahkong ram sha pyi n htet hti ai lo ai. Ndai zon hkrai rai yang, anhte a Jinghpo laika go mat mat chyalu re,“Dum nga ninglen hka yong ai”ngu ai bo galo nga ga ai, ndai zon re hpe mungtso myutso myit mai ngu ai i? Ngai go asuya rung no lung ai ten hta, rung hku htet ton ai, 《Myithkrum shi laika》yu ai, 2003 ning asuya magam hkringsa mat ai ko nna go, ngai madu laning mi gumhpro lap 10.20 shapro nna htet hti ai go, ya du mateng re hte maren, gade kyin tim ga bo sha pyi go yu la nngai. Ngai go ndai zon galo ai majo, aga wure dat gui ai rai nngai, dai rai htom hpang de mung dangam no htet hti na. Amyu sha ni, nang mung tso myu tso myit rong ai rai yang go, n-gup aga sha hkum jahta nga sa, 2019 ning ko nna Jinghpo Wunpong buga hta, ka ra ai, tsun ra ai aga laika ni hpe ka lang shaga lang sa wa ga, Jinghpo amyu htinggo mi 《Myithkrum shi laika》 langai ngai htet hti ga, Jinghpo laika n chye ai rai yang, lawan wan sharin la ga, Jinghpo ga yungui ka shalat ai hte Jinghpo ga yungui shayi shadang ni hpe n-gun jo ga, Ya ko nna shajin da saga ngu mayu nngai. Ndai go Jinghpo laika hte Jinghpo yu-ngui hkrung nga lu, wumja wa na matu re. Anhte ndai zon galo du jang, mung- chying asuya a myiman pa nna, anhte amyu ni mung rot prat pra ningsang grin nga lu na re ngu myit lu nngai.