Jinghpo hpaji景颇文化

UP JA WA

爱睡的男人

时间:2019-01-02 09:53:59 来源:德宏团结报

  (Shata 12 nhtoi 26 ya na matut ai)

  Yup Ja wa go rai dai ni hpai nna, bai hkom mat wa yang, gahtong langai mi ko bai wa du sai. Shi go shat nau ko si nna, nnan wa du ai nta ni ko shat sha pyi shang hpyi sha na nga, shi dohkrong lang ai mang shalau dohkrong hpe lakang nhpang e shanat kau da nna nta madu ni hpe wa shaga yu yang, n dum ma nna, shi hkrai shat dap e shat shang masop sha la rai, shat gumhpro ton kau da ya nna bai hkom mat wa nu ai.

  Dai shana shi go nta du wa jang, shat hkru hkru lu sha la sai re majo, apyo sha wa yup la nna, hpang jahpot jan grai long sayang she dum pru wa yang, shat mala la kosi, hpa sha na go bai n lu rai nna, shong shana shi la wa ai dibu hpe dum dat nna, dibu sho ton rai, shaman chyam yu yang, hpa simai shaman yang hpa pru wa, hpa shan shaman yang hpa shan pru wa rai ra ai.

  Shingrai matsan jahkrai Yup Ja wa go dai ko nna, hpa ra yang hpa dai dibu hte shaman la la rai manu mana nga pyo mat nu ai.

  Ndai lam ni dai mungdan na hko hkam wa na lu nna, hko hkam wa go n-gun ja la ai hpyen mali manga dat dat nna, Yup Ja wa a dibu sa gashun la shangun dat nu ai. Hpyen dai ni Yup Ja wa ko sa wa nna, “Dai nang a dibu lawan la dat u, hko hkam wa a aming re!” nga sa makan jang, Yup Ja wa go masin nang pot let, “Sumri e pru wa rit” nga jang, shi gun wa ai mang gyit sumri wa mi shi a nhpye ko nna gayan pru wa nhtom, hpyen dai ni hpe chyup di shara sha gyin ahkang ton ra ai. Dai hpang, “Dohkrong e nang ko du sai” nga dat jang, mang shalau dohkrong dai mang she rai hpyen la ni hpe dup shagyo ton nu ai.

  Shingrai Yup Ja wa go hpyen dai ni hkum ting hpye mat jang, dat kau dat nu ai. Hpyen dai ni go labye layot rai htenhtu wa nna, hko hkam wa hpe byin ai lam azin ayang wa tsun dan jang, hko hkam wa masin manu mana pot let, “Shi zon san ai hkrai chyap sha wa mi ngai hpe roi ai go, ngai nan she sa yu na, ” nga, shi go gashun yang n mai byin ai go she sa masu hkalau la na re nga, myit nna, ra na woi lang rai yup ja wa ko sa wa nu ai.

  Hko hkam wa go yup ja wa hpe, “Nang ngai hpe di bu ya jang, ngai nang hpe ngai a mungdan ya kau na.” nga sai, shaloi Yup Ja wa mung, hko hkam wa a hpaji chye ya nga ai majo, , “ E, hko hkam wa e, n mai na re, ngai dibu sha lu jang ganing wa re ai mungdan mung lu shaman la ai, ” nga n hkro ya, shaloi hkohkam wa go, “Ngai a sut gan mung ma hkra ya kau na, hko hkam aya mung ro ya kau na,” nga ra ai, Yup Ja wa mung, “Nang teng ra na rai yang go, nang a mungdan, sut gan hte hko hkam aya shong no ya ton rit, ngai mung teng sha dibu ya na,” nga htan ya nhtom, dibu mahka ko nhtu hte atsom sha n chye yu na hku loi ahka kau nna ya dat nna, shi go dai mungdan ko hko hkam tai rai nga pyo mat nu ai.

  Bai dai hko hkam wa go, dibu lu la jang, dibu dai hte shi a mungdan bai nhtang la na myit yang, dibu dai wa mi ma- hka ko ahka hka mat sai majo, hpa shaman tim n pru sai, ma- tsan kongkang tai mat sai da.