Jinghpo hpaji景颇文化

YUP JA WA

能睡的他

时间:2018-12-26 10:41:41 来源:德宏团结报

  Moi shong de yup ja la ai jahkrai ma langai mi nga ai da, jahkrai ma dai wa go nau yup ja nna masha ni yong e Yup Ja wa ngu shamying kau manu ai da.

  Lani mi hta, Yup Ja wa yup pyo si nga yang, shi a manang langai wa Nga sa hkui ga nga sa so u ai, Yup Ja wa go nau yup mayu nna n sa na nga gade ningdang tim n lu ningdang nna hkan nang mat wa nu ai. Dai she, hka kau ko sa du ai hte Yup Ja wa go bai sa yup mat nu ai.

  Shi manang wa go shani ting hka e Nga hkui nna, shana de jan shang wa ten du jang Nga tsomra mi ting lu hkui sai. Shi go shi manang wa Yup Ja wa hpe nta wa saga nga wa jasu jin yang, Yup Ja wa n dum hkro nna, Yup Ja wa hpe shi a makau e Nga nkau garan majo da ya nhtom shi hkrai nta wa mat nu ai.

  Shana yup tung e Yup Ja wa hprang pru wa yang, shi hkrai rai nga la, shi manang wa hpe shaga jahtau yu yang mung hpa chyik kokkak nga ai shingran mi n na mat nna, gajong let shi a makau na Nga majo sha hta la rai nta de hkan wa nu ai.

  Lam e maling langai mi ko wa du yang, masha ni dai shani mang ju ai wan mang grai chyi tsom nga la nna, Yup Ja wa go mang ju ai shara re n chye ai hta n-ga, nau gashung n dang sharang nna, “Ndai ko wa mi ason sha wan wut da ya ma ai go, Nga hkyep mi ju sha let wan no kra la we ga.” nga myit nna, Nga hkyep mi ju ton rai, wan kra bang wa yang, nau yup shamui si wa nna gan yup ma- lap kau, dum wa ai hte ya Nga hkut na sai ngu rot gajong nna, wanmang de yu dat yang hpa nga shingran pyi n ran mat nga la, shi go shi yup mat ai lapran hkru mat sam nga ai nga, Nga hkyep mi bai ju ton nu ai, shaloi mung nau yup mayu si wa nna bai yup malap mat wa, shi dum pru wa yang Nga bai n nga mat nga la sai. Shingrai Nga wa mi langai ju yang langai mye, bai ju bai mye, hpang jahtum e go Nga hkyep mi sha ngam mat sai. Shaloi Yup Ja wa go, masin n si nna, hpa nat e mi hta sha kau ya ya rai nga ai kun nga pot let, hpang jahtum na Nga hkyep dai ju nna yupnga masu let azi yu nga nu ai.

  Gaja wa Nga dai hkut wa ai hte, shi a shingdu de nna galu lo ai, mun tsung tsung san ai ta langai mi nga ju ton ai de ladon hkrat wa ra ai, shaloi Yup Ja wa go, “Oh, nang wa rai nga nit hka i, nye a Nga lagu sha ai, lok nang hpe mado ju sha kau na de ai!” nga, n-gun hte ta dai gra chyit di manat shakek dat nu ai. Shaloi dai ta mun tsung tsung re rai dai, “Aka lo, ngai shut sai lo, ngai go daini nang ko sa ju kau ai Mang nat rai nngai lo, nau ko si nna nang a Nga lagu sha ai rai nngai, ngai hpe sha go hkum ju sha kau, nang ngai hpe dat dat jang nang hpa ra yang hpa ya na. ” nga tongban si jang, Yup Ja wa mung tat dat nu ai.

  Gaja wa nat dai go, mang shalut ai dohkrong, mang gyit sumri hte nra hta bang ai dibu hta ya nna, “Nang rai ndai ni hte hpa ra yang hpa mai shabyin la ai, ” nga tsun dan nna mye rai mat sai.

  (Bai matut hti ga)