Jinghpo hpaji景颇文化

JU JU KAU AI

景颇故事——被刺伤了

时间:2018-12-05 16:17:04 来源:德宏团结报

  Nkyek wa go gahpu ganau ni zon, galu gaba n rai, gaji gadun hkak hkak rai mat ai majo, nta ting e shi hpe “ Nkyek wa” ngu shamying kau ma ai.

  Nkyek wa go shi she gaji gadun tim galu gaba re ai num sha lata hpyi hkungran la nu ai. Num nnan jan go Nkyek wa nau gaji ai majo, myit hta yu n krem nna num bru brau bang wa nu ai.

  Lani mi hta, num nnan dai jan go ntsin sa ja masu nna, ntsin nhtung hpe go hka lam e makoi kau da nhtom mayu ga de hprong mat wa nu ai.

  Nkyek wa go num nnan jan hka sha sa ja yang grai na hkra n pru wa jang, numbrau brau sai dum dat nna, hka lam de sa tam yu yang n mu rai jang, hkre hkre lam dantok sa tam yu dan nna mayu ga de num hkrau nang mat wa nu ai.

  Nkyek wa go mayu nta makau na lam hkingau ntsa e sa makoi nga nhtom, num nnan jan lai re ai hte, shingma e tsat kap rai ba noi nga sai. Num nnan jan go gajong ai ja e n-gun hte ahpre di yu yang, Nkyek wa go la-gang a hpun lakying noi ai hpa rai noi nan to nga jang, ganing nan n chye di nna, mayu nta du jang go she n yu mat u ga ngu ba shanan mat wa nu ai.

  Mayu nta ndo du ai hte, num nnan jan go masha ni mu kau jang, shi hpe la nnan ba ai nga kau na tsang nna, madu wa hpe lawan yu mat u ngu gahte yang, Nkyek wa go n na masu su nna chyit chyit ba nan to nga, shali num nnan jan go ganing n chye di nna, nta nhku de gadai n mu na hku agatsi ngu ba shang wa kau we ga ngu myit nna, mayu nta de ba shang wa yang, chyinghka lam e le re ai hte ganu mayu gumgai hkap mu dat nna, asang arang hte, “e, ya nan go, la nnan hpe she ba i” nga hkap san dat jang, Nkyek wa go, madu jan a shingma ko nna,“Mi lam ko Nbung ju gabye ju kau nna go e, shi hpe n ba ra ai ngu yang she ba na nga ai majo, ba nang ai rai nga ai, ya shi mung gade mi ba mat sa ”ngu gan tsun shapyo kau nu ai da.