Jinghpo hpaji景颇文化

HKUNGRAN POI MASHA NAT HKUNGGA DUMSA GA

娶亲礼节懂撒噶

时间:2018-09-07 15:37:20 来源:德宏团结报

  Shata 9 pro 5 ya na do)

  Ali ningchyi ningsu ningnon

  Ajan hka li ana ahkya

  Aju ahkra awun ndo walang ginhtong nsa rip

  Ningnon na hteng shangui yan

  Gasui yin hpyan ya nga masai

  E

  Pahkap gumgun gumhpai wa hkrung wundo

  Yan ganom marang ram shingkang hkam

  Pahkap wa jo mano

  Gumhpai wa ya jahpro

  Marang ram shingkang hkam

  Shi ning hkun ning

  Sharung aja hkri-on nin ring na masai

  Manu hkinchyi ningnam shayi

  Shabrang kunglung

  Gagu gamoi hte e

  Latsa lamun ning

  Shakau hpaga mahkon nin chying na masai

  E

  Numjin numlang n rip

  Chyalau numbrau n dip na masai

  Shatan shawan

  Sha-i go-i ru-ningro ga n rip

  Hka hku asin n rip

  Hka nam marong n dip na masai

  Shatan shawan ga n hkra na masai

  Wa hkrung wundo wom ran shalat

  Yan gumnom tup rai sai

  Wa mai wa sa

  Tsom tsan hpyan gabom mun grup

  E

  Hkkringwa e

  Pahkap gumgun wa hkrung wundo lau let rit

  Gumhpai wa mai wa sa kyet ningda

  Pahkap gumgun hkring yu de

  Wa hkrung wundo no ninglai

  Wa mai wa sa no kyet ningbai

  Wa hkrung wundo

  Pahkap gumgun hkring yu de tu

  Shi ning wa yo wa lanu yang

  Hkun ning manu hkinchyi ningnam shayi go

  Akun maka kap

  Dinghku maka htap na sai

  Hkun ning wa hpyem

  Latsa lamun ning

  Gagu lung ninghkrun wa lung

  Gamoi dung tingnyang ya wa dung ngin

  Gamoi ya shingra maka su na sai

  Reng

  Pahkap gumgun gumhpai

  Wa jo mano marang ram

  Wa ya jahpro shingkang hkam

  Reng ya

  Wa hkrung wundo let malai malu nga

  Wa mai wa sa kyet adan tu sai

  Hkringwa hpajang wa ju manat

  Mahkan sainu shan madat ya

  Hkringwa hpajang wa ju manat

  Mahkan sainu shan madat

  Wa ju sangau mahkoi mong

  Wa htam shalai marang n ram na e myit

  Hkringwa hpajang wa ju manat

  Mahkan sainu shan madat yang

  Ningnam shayi manu hkinchyi ye

  Bu marong ro ningran ram

  Apai bungdan bunghkong

  Hkrohkran hkam mai

  Ningran ningrai nga lu nga mai

  Manu hkinchyi

  Shabrang kunglung

  Gagu gamoi hte

  Nga lu nga mai mahka hpunmai rai yin pra na masai

  Sinpro sinna but wang ngin nga na masai

  Hpaga dingga hkat hkrang ngin pra na masai

  Shakon na-li lu na masai

  Reng

  Hpajang wa ju manat reng

  Mahkan sainu madat

  Hkinchyi wa htam

  Mayu lanu pungsan hka hku ni

  Adong wunlang yon lata en

  Hkinchyi wa htap shamon wunli lu

  Lagong wunlang su wai

  Hkinchyi wa htam ya

  Wa du gadoi wa bong gamoi

  Wa hkrung wundo lat

  Wa mun pun

  Wa hpyin wa hpya arai sai

  Wa pu malo wa hpya ashai

  Wa kan sho

  Wa mun run wa ba apun

  Wa ju shangut wa hkyen jahkut

  Wa hpyin arai wa hpya ashai

  Hkinjong lamyin wan hkinlai latsang san

  Ahpro Zaibron Nong Wunbu Wa Kong nga

  Pahkap wa jo mano

  Mahkan sainu

  Gawun gawa

  Mahkan mahka shan

  Shadu shangut magum manrap

  Hpoda mazing hposi hponan gahtap ya na

  (Bai matut hti ga)