Jinghpo hpaji景颇文化

DUM HPRANG SAGA

醒醒吧

时间:2018-06-12 16:43:23 来源:德宏团结报

  (Shata 6 pro 8 ya na do)

  Tsun ga nga yang, anhte jiwoi ni a htunghking jinat hpe sa kam sham tim bo sha hkrai, masha e sha n shakut yang hpa mu raitim n byin lu ai, dai re go amyu langai mi ngu ai go madu a htunghking lu ra ai, hpa rai ndai hku tsun a ta nga yang, amyu ngu ai go htunghking hpe yu nna she daibo amyu ni wora bo amyu ni nga nna ginhka shamying ai n rai i? Dai majo amyu langai mi ngu ai go madu a htunghking nan lu ra ai. Yu, mungkan ting hta manau poi htunghking galo ai go anhte Chyurum Wunpong myu ni sha re, jinat galo ai shaloi htung- hking hta hpun lakying ninghkri shing nrai kawa mali brak di ga nna ntsa ko kawa da mara re htunghking go anhte Chyurum Wunpong amyu sha ni sha re, gadai amyu a nat galo yang shing re hpe n mu lu ai, dai rai htunghking ngu ai mat jang amyu ai mung htum wa chye nga ai ngu go ga gaja hku yong hpe shadum jahprang ai lam re hpe yong chye ra ai. Mungkan ting a masa hku sumru yang, 2000 ning shong do hta na mungkan masa go makam masham ko na nan mungdan hte mungdan gap rukrak hkat wa ai re hpe chye lu ai, mungdan gata hta rukrak hkat ai mung abo sha re, shong do hta na Rusha mungdan ngu ai go dai hku nan byin nga ai re, madu a htunghking makam masham go madu amyu hte seng dik nga ai majo, gadai amyu mung madu amyu a akyu hpe makop ra ai, shingrai amyu shada a akyu hpe shalo hkra jang, ri nhtu sanat gabrong hkat wa rai sai, Uropa dan hkan hta mungkan nambat 1 hte 2 hpang hkan ko nna byin pru wa ai majan mung amyu hte makam masham lapran na manghkang she re, 2000 ning hpang mungkan shukshak wa ai lo malong go mungdan hte mungdan gadai mung gadai a mungdan akyu hpe makop ra ai majo byin pru wa ai re hpe chye lu ai, htomhpang de na shusha ni a matu hku sumru yu ga nga yang, ndai lam go madung ahkyak dik ai nan rai sai, gade daram wa ahkyak a ta nga yang, anhte amyu ni a sak sumri hte seng ai majo ahkyak ai, amyu htum wa ai bo re majo ahkyak dik ai, dai rai madu amyu a htunghking ngu ai mat jang amyu ngu ai mung mat na go chyalu sha re, ya anhte ndai prat hta htunghking loiloi no lu mazing ton nga ga ai, ndai hte sha pyi n mat na hku jom shakut ton da ya yang, hpang de na shusha ni a matu akyu grai rong nga ai, dai majo ya anhte ndai prat hta shakut shaja ton da na lam lit gaba lu ai. (Ya na lang bai matut hti ga)