Jinghpo hpaji景颇文化

HPU HKAN AI NUM NAT HPE HPU JA HKAP JO AI DUMSA GA

娶亲礼节

时间:2018-05-14 10:35:49 来源:德宏团结报

  Ningru dai nga en nai

  Awun hkungga ningru shagu

  Wuhkrung wundo tanta mazing du sana

  Hkringwa yusi tsup let ya sana ya

  Awun hkungga nungru

  Mating adong sinwa gat lagong dai nga en

  Hkatsu hkayong ngai gumgun yu yang

  Hkatsu hkayong

  Wuhku lamun lagong shalat lu ai da

  Lawu ginding wat arai hpungwang sat

  Latsa gumhpai lu

  Reng

  Daini wuhku gumgun ni

  Nungru sharing lu ai da

  Hkanji e gumgun yu

  Hkanji wuhku lamun gumgun shalot lu

  Samyin e gumgun yu

  Samyin gasha lamun brat

  Htungkoi htungja e gumhpai yu yang

  Htungkoi htungja gasha latsa brat

  Lawu ginding wat

  Arai hpungnong sat

  Lawu ginding tup

  Arai hpungnong sup

  Htungkoi htungja gasha lamun

  Gumgun yu yang

  Htungkoi htungja

  Wuhku lamun gumhpai shalot lu

  Lamun nga bong gumhpai lu

  Latsa nga hpa gumhpai sut su ai

  Awun shagu wuhkrung wundo

  Hkungga wumai wusa ya shakyet ya na

  Reng

  Mating adong

  Sinwa gat lagong dai nga en let ya

  Wurat wutsang ngai gumhpai yu yang

  Wurat wutsang wuhku wa mung gumhpai

  shalot lu ai da

  Latsa gumhpai shapot lu ai da

  Reng

  Lamun nga bong wuhku lanon yu

  Wuhku lanon pot

  Wuhku lanon mayat wa

  Latsa nga hpa e gumhpai yu

  Latsa nga hpa latsa lamun brat

  Awun hkungga nungru mating adong sinwa

  gat lagong wa go

  Le

  Hkungga nungru mating adong

  Sinwa gat lagong dai nga en go

  Lamun nga bo wuhku gumgun yu

  Lamun nga bo brat

  Lawu bading wat

  Arai hpungwang sat

  Lawu bading dup

  Arai hpungwang sup

  Tu kungdam zinghka wa sai da

  Le

  Mating adong sinwa gat lagong dai wa go

  Shakroi hpunggam mai no yu yang

  Shakroi hpunba aru ron aban hkron

  Hpunmyi hpunrong hpunman maku gungli

  hpo gabong

  Machyang hpring alap chying

  Apu pu asi gung yau si

  Gadan jinghkang tup yin yang maron sup

  Tu kungdam zinghka wa sai da

  (Ya na lang bai matut hti ga)

  (Shata 5 pro 9 ya na do)

  Anhte amyu ting a donghkon mahkon

  re majo, yong go ra sharong ai myit hte jom

  gabu mahkon nga ga ai. Dai re ai rai yang,

  anhte jut shagu hta nga shanu ai Chyurum

  Wunpong Jinghpo amyu sha ni madu a

  htunghking shakut shaja sa wa ai yi-ngam

  go gara hku wa byin to nga ai rai kun? She

  jom yu yu dat ga, mahkon htuk ai wa/jan a

  myutso myit hpe i go jom shaging shadan

  ya nga ga ai rai kun? Mahkon ndai hkon

  shapro ai ko nna madu a myutso myit i go lu

  shatso la nga ga ai kun? Yu dat jang, gadai

  mung n-gup hta go jom garu nga ga ai, madu

  amyu a htunghking hpe galo sa wa ai

  yi-ngam go shade n pru nga ai hpe chye lu

  ai.

  Myutso donghkon ga mahkon ndai hpe

  hkan nna htunghking shakut sa wa ai lam

  hta n-gun grau lu na rai yang, shada shadum

  jahprang hkat ai lam go ahkyak madung

  gaba langai mi re hpe no jom chye la ra ga

  ai. Shingrai shali laika ndai hta kaga

  lachyum ni hte galang ta shalom di nna ka

  shapro shana shabra dat mayu ai hku mung

  re. Ya anhte shani shana n-gup hta htunghking

  shakut ga ngu go jom garu jahtau tim,

  masha nkau go hpa bo hpe htunghking ngu

  ai asan sha shade wa n chye lu na re, ndai ni

  hpe asan sha chye jang she hpa hpe sa

  shakut la na chye lu ai, ganing re hpe htunghking

  nga ma ta ngu ai npot nhpang mung

  chye ra ai, shaloi she shakut sa wa ai n-gun

  mung grau lu ai.

  Myu bosang yong a labau hte htunglai

  ni hpe maram sumru yu yang, htunghking

  ngu ai go labau hte maren sha rai nga ai,

  labau hta madu a htunghking hpe moi prat

  gadai mung gadai a gaji gawoi ni hpan

  shalat shapro nhtom prat shanat rai lang

  hkrat yu wa ai, moi amyu bosang ngu ai

  nnan sha no masat jasan ginhka wa ai aten

  ko na madu a nga pra hkrunlam hpe hkan

  nna galo lang hkrat wa ai amyu myu hpe

  htunghking ngu tsun nga ai hta n-ga, htunghking

  shong hpan shalat wa ai nnan e akyu

  rong tim n rong tim jiwoi ni dai hku nan no

  shong lang yu, dai hpang na labau hta, lang

  hkrat wa ai laman e sumru sumrat ngu ai

  mung chye wa ma ai majo, galo lang

  magang bai ginchyum la yu yu rai kram

  shajo la, shingrai lang hkrat wa, dai rai

  jiwoi jiwa ni prat shanat aban hte aban rai

  hkringhtong hpe dagro yu wa, ndai ni hpe

  htunghking nga ma ai ngu nna sumru chye

  la lu ai, htunghking ndai ni hta“Madu myu a

  labau ginru ginsa lam ni, madu myu a

  hkringwa dumsa jaiwa hpaji ninghkring lam

  ni, madu amyu a galo lu galo sha lam ni,

  madu amyu a ja sut gan lam ni, madu amyu

  a hpyen magam lam ni, madu myu a sharin

  shapan lam ni, madu myu a numbon numla

  lam ni, madu amyu a laika hpaji lam ni,

  madu amyu a sha-ngon shapyo lam ni, madu

  myu a ka manot hpaji lam ni, madu

  amyu a madum sumhpa lam ni, madu amyu

  a hpaji hparat ninghkong lam ni, madu

  amyu a makam masham lam ni, madu

  amyu a buhpun da maka hte mon sumli

  lam ni, madu amyu a hpan shalat lam re ni

  hte mung masa lam ni rai nga ai.

  (Ya na lang bai matut hti ga)

  Nhkum La DUM HPRANG SAGA

  Ndai prat na hkonji zalung ni mung shateng

  chye wa sai. (Datdung dem ai: Alat Gun Ong)

  Prat galai sai majo gumgai mahkon pyi n

  chye yu ginghka sai. (Dat dung dem ai: Alat

  Gun Ong)