Jinghpo hpaji景颇文化

TSO HTE AN A MYIMAN

诗歌

时间:2018-02-13 16:50:53 来源:德宏团结报

  N;

  E goi lo...

  Hkon a singgun brang wa e

  Sung sung sumu yu ga le

  Moi na an no ram ai ten wa

  Brang nang tsom htum shadang rai nga

  Shing yan hkum gu tsom kat rai

  Myiman gumdin tsom la ai

  Galu gaba lam ndut n dang

  Sumhtang lahpum grai ngang kang

  L:

  E lo tso hkon e...

  Moi an no ningtsing ai ten

  Gadai mung nang hpe kam shachyan

  Brang la ni nang hpe tsom gara

  Shingrai ngai gaja let nga

  Dai ten na na shing yan wa

  Shata mahkon ngu na zon rai hkra...

  N:

  E Brang e...

  Moi nang no tsom ai shaloi

  Hkon tsom latsa nang hpe madoi

  Nang du hkom ai shara shagu

  Hkon ni nang hpe tsom hpu garu

  Shingrai hkon go masin salum gahpra

  Nang hpe dun ton na zon nga....

  L:

  E... Shang goi ya...

  Moi na lam hpe hkum tsun sa

  Ya na lam hpe she tsun saga

  Daini hkon hpe yu dat yang

  Dui num ngu na zon she ang

  Sak go sumshi sha no rai

  Myiman woi kin-yu zon rai

  Agrop tong yang sik sok nga

  Shingnom de lahkat sit kau da

  Dai go ka-ni lu ai majo

  Gadong si na La nu yo...

  N:

  E...

  N kam madat nngai

  nang mung moi na hte go shai

  Myiman rapding hkala zon rai

  Myitok myiwak wahkyu kak

  Shinglang ninggren zon nan hkrak

  Hpyi go wong wong nra brong

  Myitum mung male wa na zon

  Agrop tong jang n lu rot

  Lamai do ai lapu zon gumrot

  Dai go nang ka-ni lu ai majo

  Nsa hti na la nu yo...

  L:

  E... She madat yu lo...

  Moi go hkon hpe jom yu chyai

  Ya go hkon hpe koi ai hkrai

  Moi hkon go manam pyo ban gya

  Ya go jit hkang hkrai manam wa

  Lago go sharo hpun zon rai

  Lata mung htingra lahpri zon rai

  Shani shana mare htungwan gahkrang

  Nhkut ganang mong yang ganang shang

  Dai go nanghpam ka ni a majo

  Mohpyi gale mat sai yo

  (Ya na lang bai matut hti ga)