诗歌 Numla ahkang hpyi ai dumsa ga - 景颇文化 - 景颇文-德宏民语文网

Jinghpo hpaji景颇文化

Numla ahkang hpyi ai dumsa ga

诗歌

时间:2018-02-12 10:35:59 来源:德宏团结报

  (Shata 2 pro 7 ya na do)

  Gumgun hkring yu wun htang rai

  Gumgun hpun lung shanang

  Magam ajang dung magang

  Wa hkrung lahkan sha en reng

  Wa jot ahpang hti lu en reng

  Wugang Mu Nu Hpan Ninggon Du

  Ganam shinggyim shalu asin si ai

  Dinghkun mayu shatu na ahkang hpyi

  Gauru rumdung doi

  Gauron ningmong sat na ahkang hpyi ai

  Reng

  Wa hkrung wundo let n nyem

  Wa mai wa sa kyet n krem ai

  Hkring yu wun htang

  Hkringdat yin htang rai

  Gumgun hkring yu lung shanang

  Hkinchyi mado hta loi

  Gumgun ahpun sot

  Gumhpai jahpan hta hkroi

  Gumgun hpun lung shanang

  Magam ajang dung magang

  Gumsi aja let n nyem

  Gumno hpaga kyet n krem ai

  Wa hkrung lahkan sha ninggup wu

  Wa ya matan ahpang chyu numgau jasu

  Hpajang wa ju ngut

  Jingli wa lip wa hkyen jahkut

  Mahkan sainu ngut

  Sainu ashan hkut

  Amang amai gawun gawa shan

  Hkut kyet ai ningda nga sai

  Hpajang wa ju lau let nga sai

  Jingli wa lip hkut kyet ningda nga sai

  Mahkan sainu ngut

  Sainu ashan hkut ai la nga sai

  Reng

  (Sainu nong ai)

  Sumbrut nong sumprang shong

  Wa hkrung wundo lat

  Wa mai wa sa sat nin

  Wa hpyin arai wa pu malo

  Wa hpya ashai wa kan shapro

  Wa ju shangut

  Wa hkyen jahkut nin

  Hpajang wa ju ngut

  Jingli wa lip wa hkyen hkut la ngu sai

  Wa ju shangut wa hkyen jahkut

  Wa hpyin arai wa hpya ashai

  Hkinjong lamyin wan

  Hkinlai latsang san

  Mahkan sainu shan hkut kyet la nga sai

  Laijum chyahpung gumgun

  Wugang Mu Nu Hpan Ninggon Du wa

  N-gup muwo shan man ya sai

  Gawun gawa mahkan mahka shan

  Shadu shangut magum manrap

  Hpoda mazing hposi hponan gahtap sai

  Gumgun salang nga amang ashan man

  Sindin sindai anu anai gapung shangut nin

  reng

  Shanai jahkut din tseng

  Hpoda mazing hposi hponan gahtap sai

  Hpoli ningdung lina

  Magum manrap gaiman ashan sap ya sai

  Gumgun wa gun li gumhpai wa hpai kri ni a

  N-gup muwo shan man

  Sindu sindai sinpyi sinpai

  Ninggyi ninggai shinglet shingnai

  Ningngo ningngai ashan

  Dai mung gapung shangut garai jahkut sai

  Lu ding yong let la

  Nsa sinwa dunghpong kyet ningda sai

  E

  Reng

  Laijum chyahpung gumgun shagu numdu ya

  Mahkan sainu dungrong

  Hkra ton mazing

  Paigam lahpo shading

  N-gu dinggrin gaya

  Mahkan sainu

  Hkra ton mazing

  Bunggoi gungga nang

  Paigam lahpo

  Ninghkrun ninghkyai ashan bang

  Gahpa hkalap marung wuntung ashan nang

  Buyit buwai bang

  Salum ningdung lep

  Hkra ton mazing

  Sabon ningchyan hprep

  Paigam lahpo shading sinwop sinja nang

  Salum bang sade sadai nom

  Lawu singkoi nang lahta sinja bang

  (Ya na lang bai matut hti ga)