Jinghpo hpaji景颇文化

Ngai chyenan sha shang gayat ai

我只是通个电话而已

时间:2018-01-12 17:24:30 来源:德宏团结报

  (2017 ning Shata 12 nhtoi 29 ya na do) Ma Li Ya yu pyi n yu ai wanhkrat hkap la let chyeju gaba sai sha nga tsun u ai, rai yang Sa Htu Ano atsom sha yu la nu ai. La dai go nhka mun pyi rai n tu ai brangji gasha rai nga ai, lasi gromgrom rai, myiman nsam asit baba raitim, kara go grai chyang u ai, shingdu de gyit majo ton ai kara go nshang she du nga ai. Htingra bungga tsa seng na pat ni hpe ganyi ganga rai hkra bung ahpot da ai ten hta, la sha dai hkum ting wang wang re buhpun palong hte mazut mazat rai na zon re gyepdin sha din da u ai.

  Shanhte galang bai hkrum ai shaloi go htingra ta htum wa de rai nga ai, Pasailona myu mare na panglai lusha seng ko rai nga ai, la sha dai dingyang shong de na zon awung awang re buhpun palong sumro da u ai, ndai lang kara hpe galu lo hkri dumpyang da nu ai. Shi go galoi mung chye hkat ai mano manang shada zon shan hpe shaga u ai. La gasha dai Ma Li Ya hpe pup ai kumla masa hte Ma Li Ya shi hpe htang ai lai kumla ni, Sa Htu Ano agajong sha shan hpe dingyang nla lagu pran ntsen shadu na zon rai nga ai. Hpang e, Sa Htu Ano go Ma Li Ya nta na chyenan matsing buk ko ka da ai masha mying ningnan hte chyenan nambat hpe mu nu ai, manon masham matsan mayan n chye dum ai n tsen myit e shi hpe dai go gadai re hpe chye la shangun nu ai. Shan a lapran hta sumprat tai nga dum ai masha dai a hpong shingra masa grau nna shi hpe pot jahtau hkindit na zon ngu nga sai: sak 22, lu su nta na la sha shingtai, dum nta hkalap satsom jahtap sama hpaji sara, yong chye ai masha chyahkro no re hta n-ga, dinghku num ni hpe hkrai tam gasup ai“Wa hkyem”bai no rai nga ai. Raitim, shi dingyang hkam sharang nga u ai, Ma Li Ya kon so shaga ai dai shana du hkra sharang sai. Shi shani shagu chyenan dai gayat bang wa nu ai, nnan do e hkying hkum masum dang ko galang gayat, jahpot hkying kru kon hpang jahpot du hkra gayat, jahtum e go makau ko chyenan to ai sha mu jang, nhkring nsa htim gayat yat rai nu ai. Chyenan hta ai masha n nga magang, salum wan hkru magang rai nga nu ai.

  Mali ya ngu na shani, nsen kaga nga ai num langai chyenan hta madat sai, shi go dun sa ye ai sha re nga tsun let,“Shauye shinggan pru wa sai.”Nga u ai. Num dai a maum maa nga ai ga hpe na nna, grau mana bu na zon ngu nga ai. Sa Htu Ano ndang sharang wa ai majo, Ma Li Ya mung n nga to ai n rai, ngu san dat nu ai.

  “Ndai ko hpa bo Ma Li Ya ngu ai num mung n nga ai.”Num dai htan let,“Shauye go shabrang she no re.”Nga htan u ai.

  “Ngai chye ai”ngu let,“Shi dai ko n yup tim, galang lang sa wa wa re n re ni?” Ngu bai san dat sai.

  Num dai grang maron let:“Lasa si na, nang gadai re?”Nga hta wa sai.

  Sa Htu Ano chyenan ton kau sai. Num dai a ningdang ga kon grau shi ntsen ai lam ni ma hkra go teng man ai mabyin masa hku she shadu la nga nu ai. Shi ganing di nan n lu sharang mat nu ai. Shing rai, matut nna lahkong masum ya ting, chyenan hpe laika ganu npot sharot la hkra rai, Pasailona ko na chye ai masha ni yong hpe Ma Li Ya nang ko n nga a ni ngu langai hte langai hpe chyenan gayat san ya u ai. Gadai mung shi myit ai hku n myit nga ai, shingrai chyenan gayat shagu shi hpe grau nna nga yak shangun nga ai. Ndai nsin nhtoi n ginhka ai pyo chyai chye ai kunghpan pai hpung ni go Sa Htu Ano galoi mung masha hpe n tsen ai kyang rong ai hpe chye da ai majo, chyenan mu hta ai ni yong go shi hpe mahtang nhtang de bai shala asang chyai ai hkrum hkrum rai, shi grau nna nga yak u ai. (Ya na lang bai matut hti ga)