Jinghpo hpaji景颇文化

Ngai chyenan sha shang gayat ai

我只是通个电话而已

时间:2018-01-12 16:16:53 来源:德宏团结报

  (Shata 1 pro 10 ya na do) Chyenan ton kau ai hpang she gasup chyai ai zon non nga nu ai. Hkom mat wa hkyem ai shaloi, agajong sha madu chyenan gayat na ginjang gaja ganoi lahpot kau ai hpe gan myit dum dat ai hte, tin shapun ma ma ngu let chyenan nambat kru dip shapro kau dat nu ai, nambat dai ni madu a nta na re n re pyi n dang chye nu ai. La dingda to ai masin salum go jahkro ko du hkra gumlot pru wa ai zon nga nga sai, loi lawan lawan nga nna yon yon nga ai chyenan nsen ni galang, lahkong, masum lang bat nna ngoi ai hpang, shi a sak hkrung ten hta na la wa a nsen hpe na lu sai, shi hkrai garen gari hte shi n nga ai dum nta ko nga nga ai.

  “Hkam ja nga nni?”

  Chyahkring na lapran matsut pru wa ai myiprui si ni a majo, jahkro ja mat rai, gan hkring la ra mat sai.

  “Tsora ai, brangtai gasha.”Nga nsa galang bai sho la nhtom shaga matut dat nu ai.

  Myiprui si ro she rai hkrat wa sai. Chyenan hta madat ai Sa Htu Ano gajong nna loi hkring re hpang, nhprang wan gapo ai zon nga ga lahkun mi makan shapro dat nu ai.

  “Gui ganu!” Chyenan hkrok nga hkra ton kau nu ai. Dai shana.

  Ma Li Ya sai hten ai zon mana galang bu la nu ai. Shat gok ko kap ai hkohkam wa a sumla hpe amya di la nhtom, rong marong n-gun ma hkra hte nampan sun maga de na hkalap pat de gabai agrop kau dat ai hpang, hkum ting sai hkrai hkrai rai ga ko hpum hkalui shanong to nga nu ai. Pot mayu ai myit rai n kop ai majo, shi hpe dip gamu rim ai ni e lago hte htong, lata hte ahtui rai tim, shanhte hte no htek ganong hkat nga ai, Hehkyu Li chyinghka lam ko ta lahpum lahkong sha ahpum ginsu kau rai shi hpe sa tsap yu nga ai mu dat jang she, shi kon sum hkam mat nu ai. Raitim shanhte go Ma Li Ya hpe myit gatu la ai machyi masha gok de garot dun hkrat wa nna, pyun hte hkum hkan hka lagyi jo bun rai, jo lagyo mana ton nhtom, labop ko marau sau htu bang ya ma ai, marau sau htu ai ningma hka hpye yat rai Ma Li Ya hpe lam n mai hkom shangun nga sai. Ma Li Ya myit hprang sai, ngarai ginra ndai kon sha lot lu na rai yang, n galo gui na lam hpa n nga nga ai. Matut nna dai laban kon, Ma Li Ya shawa yup gok de nhtang wa ai hpang, yat yat sha shana shanhte hpe sin ai Hehkyu Li a chyinghka dinggrang hpe gang malo kau nna hpo shang wa wa rai nu ai.

  Ma Li Ya go shanhte hpe yu sin ai num dai jan hpe madu wa Sa Htu Ano hpe ga lahkun mi shana ya na hku tsun gadi ton sai. Gun ja num mung wom htan ya nu ai, ahkyak madung go mu dai grai shim ra ai nga, Ma Li Ya ta layung hte Hehkyu Li gun ja jan hpe madi ton let:

  “Masha ni sha no chye kau yu u ga, shaloi nang go si chyalu sha re.”Ngu sadi jo u ai.

  Laban bat kru ya shani, Sa Htu Ano myit ana tsirung de du pru ra ai. Ginsup pya modo hpe a ningnan di satsom kau rai, Ma Li Ya hpe hkap tau la na myit nga ai.Tsirung sara wun ningbo wa shi a rung gok ko Sa Htu Ano hpe hkap woi dung u ai. Rung gok dai grai sanseng ai hta n-ga hpyen sanghpo daram dam gaba nga ai. Sara wun Sa Htu Ano hpe Ma Li Ya a lam tsun dan nga u ai. Gadai mung shi ganang nna sa wa ai, ganing rai sa wa ai, galoi sa wa ai hpe n chye ai. Shi hte seng ai rai ni pyi tsirung ko shang ai hpang shi hpe nan san jahkrup nna ka matsing da ai hkrai re. Dai shani jep sagon yu tim, hpa matu n mu sagon shapro nga ai. Rung ningbo wa go Sa Htu Ano hpe gadai e madu jan ndai ko nga ai lam tsun dan ai kun ngu mau nga nu ai. Sa Htu Ano mung tengman ai lam n tsun dan u ai.

  “Modo dai a ama hkam rung na ni ngai hpe tsun dan ai re.”Sha ngu htan masu sai. Rung ningbo wa kam tim n kam tim ga htan dai hpe hkap la nu ai majo,“Ama hkam rung ni n chye ai hpa n nga nga ai.”Nga tsun let, asan awan re rung gok saboi ntsa ko mara to ai rung laika ni hpe yu nhtom, tsun u ai:“Shi ana grai nan laja nga ai.”Rung ningbo wa go Sa Htu Ano hpe shi sha kam yang, tsirung de Ma Li Ya hpe galoi mung sa mai gawan ai, raitim, Ma Li Ya asai bai hten wa na hpe hpang maja ra ai, grau nna Ma Li Ya a hkamja lam hta myit tau ya ra ai majo, rung du wa matsun ai hku hkan shatup ra ai nga tsun u ai, ndai lapran grau nna ru nga ai, shing rai, grai maja ra ai nga u ai.

  “Mau hpa she rai sai, ”Sa Htu Ano matut nna tsun ai:“Shi kyang gade htat ai nga tim, masat masa go chye ai, madu a masin hpe shi madu lu dip da ai.”

  “Lai kyang nkau go shaning na na makoi up to nhtom, lani mi na nhtoi hta agajong sha chye ok ai.”Rung du wa tsi sara wun gaba ni a lai nsam lang kau hkra rai tsun ai,“Ganing rai tim, shi a matu nga yang, n myit madom ai ndai tsirung de du shang wa ai go akam she rai to nga sai, hpa majo nga yang, ladat ja ja hte yu gon tsi lajang na go anhte a laksan hpaji rai nga ai.” hpang jahtum, rung du wa Sa Htu Ano hpe Ma Li Ya mau na zon rai chyenan hpe myit grai jung kap ai nga tsun shadum nu ai. (Ya na lang bai matut hti ga)