Jinghpo hpaji景颇文化

Ngai chyenan sha shang gayat ai

我只是通个电话而已

时间:2018-01-02 16:22:43 来源:德宏团结报

  (Shata 12 nhtoi 27 ya na do)

  Ma Li Ya shi a tengman ai lam ni hpe Sa Htu Ano e tsun dan nu ai. Shi a la nnan wa go gasha n lu ai shingkra rai u ai, noku jong ko hkungran poi galo nna prat tup jo lup rau nga na hku myit da ai re, Ma Li Ya hkungran buhpun mon sumli la rai noku jong ko du ai shaloi, shingra la dai hpe n mu mada sai. Ganu gawa yan hkungran poi galo shakre ra ai nga ai majo, sharang let la nnan n lom tim shi hkrai mano manang ni hpe hkap shaga tau la rai, tsa mung agying na nu ai, myit malai yon n ra to ai majo, shana yuptung e Sa Htu Ano hpang de sa wa ai re da.

  Sa Htu Ano nta n nga ai raitim, chyinghka lam makau hku na nampan kok gata na zosi mu tam la nna hpo shang wa u ai, shong de shan galoi mung zosi hpe dai ko ton da ma ai.Ndai lang go Ma Li Ya madu kon hpa ntsun ai nhtang shang wa ai rai lu ai.

  “Ndai lang gade na hkra bai tso lu na kun?”Sa Htu Ano san ai.

  “Sumtso sumra ding yang byin to ai ten hta go htani htana mai ngu ai”Ma Li Ya go Wui Ni Si Su. De Mo Lai Si a ga shagop hte htan u ai. Lahkong ning lai mat wa sai, shan a sumtso sumra ding yang ngangkang to nga ai.

  Ma Li Ya myitsu mat ai zon rai sai. Shi datshin pya sha na n myit mat nu ai, myit lom lom hte magam bungli gun hpai ai hta n-ga, yup ku na mu kon hpon, madu hpe Sa Htu Ano e ap kau nu ai. Maning na shaning htum wa de, shan Hpuihpyi n i-ang ko myokle pya poi sa lom la nna n htang wa ai shaloi, Pasai- lona myu hku lai wa hkrup ai majo, myu dai hpe yu sharong mat nu ai. Shingrai, shan Auahta gat lok ko nta langai mari la rai, grai ngui pyo ai hte shata 8 nga lai wa sai. Myu lok garu gara nga ai hta lai nna, chyinghka lam gaba mung n rong ai raitim, ma marai manga go lu rong na tai ai. Shan a matu nga yang, ndai mung ngui pyo gabu hpa lam rai nga malu ai, dai laban shani Ma Li Ya modo langai shap got rai Salagasa de jinghku sa gawan na nga rai mat wa u ai, laban langai ya shana de hkying sanit a shong e nta de bai n htang du wa na nga tsun da ai. Laban bat mali ya jahpot hkying mali du tim, Ma Li Ya a shiga gachyi mi pyi n lu nga ai.

  Matut nna dai laban langai ya hta, shap la ai mado dai a ama hkam rung ni nta de chyenan gayat dat nna Ma Li Ya hpe san pru ma ai.

  “Ngai hpa mung n chye ai.”Sa Htu Ano go:“Salagasa dde sa tam mu.”Ngu chyenan ton kau nu ai.

  Laban bat mi a hpang, balik la langai nta de tam pru wa ra ai, shi hpe mado mu tam sai, raitim masha ni e lagu hpya kau nna, Kyadisi myu hte loi ni ai hka kau ko gabai da ma ai nga sa tsun dan u ai, dai shara go Ma Li Ya mado ruk byin mat nhtom, ton kau da ai shara hte deng jahku gang ai shara ko rai nga ai. Balik wa ndai mado lagu ai amu lamang a lam hpe Ma Li Ya gade wa chye ai kun nga san mayu nu ai re go, Sa Htu Ano nyau shat jo let bo pyi n sharot ai, ndai ko ten hkum shama nga sa, ngai a madu jan nta kon pru mat wa sai, gadai hte gara hkan nga hkom nga ai hpe shi mung n chye ai, ya ganang ko rai nga ai mung n chye ai ngu tsun gama jo nu ai. Sa Htu Ano a laikyang ma- nong nsam a majo, balik wa mahtang gade n yong ai zon nga yak mat u ai, shi a ga san a matu tongban kau da nhtom hkom mat wa sai, amu lamang dai a lam hpe n shakre ai dai hkuton kau masai.

  Ma Li Ya galang bai shi hpe gabai kau da na zon non ai myit go Hkada kesi myu ko hkrisamat shong shana na pron poi na masa hpe dum dat nna agajong sha gan myit tak ai rai nga ai. Dai shaloi, Losa. Lui kya Si shanhte hpe sanghpo got nna panglai de sa woi chyai ai. Anhte“Panglai lam hkom ai ni”ngu ai tsa seng ko dung chyai let tsa lu ga ai, dai shara go Hpulangge nnan uphkang ai ten hta kunghpan pai maga hpung ni hte hpaji maka masha ni zup ai shara rai nga ai, shara matsut matsat re hta n-ga, matsat shabat rai nga ai. Shaloi lahkum ma hkra go hpri hte shachyo galo ai hkrai re, marai kru dung lo sha re shara ko, anhte marai hkun ting jom shachyat dung nga saga ai. Dai shani na malut htuk lahkong lu ma ai htom, Ma Li Ya wanhkrat ma mat sai hpe mu nu ai. Dai ten hta ta langai mi garu gara gaming gamong re saboi ntsa hku nna wanhkrat ladon dat ya sai. Lasi grom grom woimun tsung tsung re ta ko magri lahkon langai no hkon da nga ai. (Bai matut hti ga)