Jinghpo hpaji景颇文化

Ngai chyenan sha shang gayat ai

我只是通个电话而已

时间:2018-01-02 16:14:26 来源:德宏团结报

  (Shata 12 nhtoi 22 ya na do)

  Nambat masum ngu na go shana shanang pya ai rai nga ai, Lanbu hkyi gat lam langai ko na ga-hpri seng ko, myit n lom let Fa- ransik bu hkom masha ni hpe pya madun dan nga u ai, shanhte madu mu mada nga ai myokle hpe n kam nga ma ai, hpa majo nga yang, shanhte myokle hpe n kam kam ai ni rai nga ma ai. Lamang mi pya ngut shagu nta de chyenan gayat dat dat rai u ai, myit mada lam n nga tim Ma Li Ya hta madat na hpe ala nga u ai. Hpang jahtum pya ngut ai hte gaju galim nga gahtet wa ai myit hpe n dang dip da wa sai, ganing nga tim Ma Li Ya mu lama mi go pru jo sai ngu myit nga nu ai.

  Pyin gram galai yu sai zat pya modo got let nta wa lam ko hkom nga ai shaloi, Gelasiya gat lam gaba makau hkan na laisi hpun lap ni htingra lado a marang gata e ningtsing nga ai hpe yu nga ninglen, Ma Li Ya n nga mat ai hpang, myu gaba ndai ganing rai mat na lam hpe gan myit dum dat ai majo, nshung si hte hprui nga nga nu ai. Shi shakap da ai maisau pa mi na hku chyinghka lam ko no kap nga la ai hpe wa mu dat ai hte, hpang jahtum na myit mada lam ni du hkra gom mat sai. Shi nta na lanyau hpe shat jo na she malap kau hkra myit chyat shanut to nga sai.

  Laika ndai ka hpang wa ai kon, ya du ngai shi a mying hpa ngu ai re hpe n chye nga nngai, hpa majo nga yang, Pasailona ginra hta, anhte yong shi a ningka mying Myokle sara Sa Htu Ano ngu ai sha chye ga ai. Shi ga nau n lo nu ai, mano manang lo lo hte mung nau n kam garu chyai hkom ai brang up rai nga ai, shi a hkum hta yom nga ai zen let, hpung shingkang shingwang ni yong go Ma Li Ya bai gapa kau ya lu nga ai. Ma Li Ya shi a ta ko dun let ndai mau na zon re wahpung de dun bang da ai rai u ai. Ndai wahpung hta, shana yuptung yuphka e gadai mung manang wa hpe chyenan gayat nna, ngai sha ganu ganang rai nga a nga gadai n chye tam san hkom ai. Nnan shang ai ten hta, Sa Htu Ano mung dai zon re mana mu galo yu ai, shi ya she n kam shalai u ai. Shingrai dai shana, shi Sa La Ka Sa hpe sha chyenan gayat u ai, yupsu yupma nga ai gumgai jan hpa tsun ai pyi atsom n dum ai, Ma Li Ya shat sha la nna hkom mat wa sai ngu sha htan nu ai. Nhtoi htoi sayang she myet ngu na-yi hkying hkum mi dang lu yup yang, yupmang hkrai bai mu, yupmang hta Ma Li Ya ashep alap sai hkrai re hkungran palong hpun ton ai mu nna, dum wa ai hte masin gahpra htukhtak nga sai, ganing nga tim Ma Li Ya galang bai shi hpe gabai kau ton da sai ngu myit la nu ai, ndai lang go prat tup, ndai dam lada ai, shi n nga ai mungkan hta kau da sai.

  Lai wa sai manga ning laman, Ma Li Ya la masum gabai kau yu sai, dai ko Sa Htu Ano mung lom nga ai. Shan chye hkat ai shata kru du ai hpang, Ma Li Ya shi hpe Mosigo myu ko gabai kau da ai hkrum yu ai. Dai shaloi, shan Ansuluisi shara na rai marai ton ai gok ko tsora marit tun let n dum n dam, gumpyi gumpai nga hkra yup sha ma ai. Lahpot mi hta, gadai hpe n mai tsun dan ai bo shana na mu lagu galo sha la ai hpang e, Ma Li Ya nta kon rai mat wa sai, shi a rai ma hkra ton da ai hta n-ga, shong la hte na hkungran ta chyop du hkra ton kau da u ai, shakram langai ka da ai, wanglu wanglang re sumtso la-ing ko shi ganing di n lu hkam sha nga sai da. Sa Htu Ano go shi hpe shi a shong la wa ko wa mat ai shadu u ai, la dai go Ma Li Ya a lapran tsang jong na jongma manang re, shan sak no gaji ai kon lagu hkungran mat ma ai. Lahkong ning daram jom nga yu ai hpang Ma Li Ya la kaga a n hkan e jongma manang wa hpe gabai kau da sai. Rai yang, Sa Htu Ano myit shut nu ai, dai shaloi mung Ma Li Ya ganu gawa ni a nta de wa mat ai she re. Shi ja gumhpro hte hkying ten ma ai hpe n tsun hkra hkan mu tam ai htom, grai shagrit shanyem ai myit hte hpyi nyem u ai hta lai nna, shi pyi n lu hkan galo shatup ai ga sadi ni du hkra jo yu nu ai, raitim, Ma Li Ya galang mi myit dodan kau sai majo:“Sumtso sumra langai ngai go ngangkang galu ai, langai ngai go gadun ai.”Ngu tsun ai sha nrai,“An a sumtso sumra go gadun ai.”Nga ga ja ja hte tsun shakre kau ai gata hta Sa Htu Ano htingnut mat sai. Shing rai laning mi jan zim mat ai hpang na hkrisamat jahpot, brang la ni hkrai nga ai shi a shara de wa ai shaloi, Ma Li Ya dodap na lahkum hta yup nga la sai, bo ko ahtoi re nampan shanghkong dagro da, ahpro wop wop galu lo ai hkrungran palong mung hpun da rai u ai. (Ya na lang bai matut hti ga)