Jinghpo hpaji景颇文化

Ngai chyenan sha shang gayat ai

我只是通个电话而已

时间:2017-12-22 10:37:10 来源:德宏团结报

  Numri pan (Dem ai: Mu No)

  (Shata 12 nhtoi 20 ya na do)

  Nnan shana, Ma Li Ya hpe yup shangun na matu, shanhte shi hpe yup pyo tsi htu ya masai. Nhtoi mahka e, malut kut nna hprang mat nu ai, hprang wa yang, ta hte lago lahto ni go ku shado ko gyit dun da nga la ai, shi hkrai gade jahtau yu tim, gatsi gatsang gadai mung n sa yu nga ai. Lahkong ya jahpot, pasailona ko nga nga ai madu wa go shi ganang ko ganing rai nga ai lam gachyi mi pyi n chye ai ten hta, shi go jamjau jamhko re jangbrok nhkun ko ndum ndam rai nga ai majo, shanhte shi hpe tsi mawan mu gok de sa bang da sai.

  Gade na mat wa sai mung n chye, Ma Li Ya bai dum wa ai ten hta, mungkan ting tsora myit shingwang ni hpring tsup ai zon rai nga la sai.

  Shi a ku makau ko hkumhkrang galu gaba re dingla langai tsap nga ai, lam hkom atsang awang, mani sumsum rai, sat lawat ni mung masha hpe myit n-gun atsam jo lu nga ai. Shi go ndai sai hten tsirung na ningbo gaba wa rai nga ai.

  Ga lahkun mi n shaga, shakram ai lam mung rai n galo ai, Ma Li Ya go dingla dai ko malut shachyi la rai ya ai hta n-ga, rai pyi n hpo lu yu ai ngu na daram re malut makai mi hpe Ma Li Ya e kumhpa dat ai hte Ma Li Ya sharang n lu aja awa jahtau hkrap dat nu ai.

  “Ya aja wa hkrap la u.”

  Tsi sara a yup ngak atsam rong ai zon nga ai nsen hte“Myiprui si hta grau nna ningma shamai lu ai hpa n nga sai.”Nga tsun u ai.

  Ma Li Ya hkrap mayu ai hte hkrap la, hkrap hkru hkru re hpang, asan nga nu ai. Shinggan la ni hte gan se sha la ai htom raitim, ndai daram n nga pyo yu nga u ai. Tsi sara go Ma Li Ya tsun ai lam mdat let, ta latsang hte kara masit ya rai ai sha n rai nsa sa pyo na matu shi a bunghkum ni galo sharai ya rai u ai, nyan hpaji hte Ma Li Ya yupmang hta pyi n mu yu ai daram pyo ai manong ni hte shi a dam wam nga ai n tsen myit shingwang ni hpe maitau ru maling kon woi pru wa nu ai. Dai go shi sak prat hte nambat langai lang ngu na, la langai mi shi a krowang hpe htai ya chye, hkap garum nhtom, hkum shan hte chyeju n htang ra ai rai nga ai. Tsi sara myit alom sha hkying hkum mi madat mara ya ai hpang, Ma Li Ya tsun shali ngut ai hte, tsi sara wa hpe chyenan langai gayat shangun na hku hpyi shon dat nu ai.

  “Ya n mai ai, ngai a hkohkam jan e.”nga tsun shapyo let, yat sha shi a shingyo myiman masop ya u ai, Ma Li Ya galoi mung ndai daram si mani hte masop ai n hkam sha yu nga u ai.“Hpa mung shi a aten ngu ai nga ai.” Nga tsun da nhtom, chyinghka lam makau ko tsap let, kyu hpyi ai hpung up wa zon rai ta lalam kau nhtom, pru mat wa sai.

  “Ngai hpe kam rit.”

  Nga sha tsun da ai. Dai shana, ndai sai hten tsirung na ni Ma Li Ya hpe mying hta bang la ai sha n rai, matsing nambat langai mung ya masai, shi ganing rai ndai shara hta du bang wa ai lam hte shi a lam hpe aloi sha ka shadan da let, makau ko na rungdu ningbo wa nan:“Myit kro lawang gahtet gamot lawan ai.”Ngu dodan ka matsing da sai.

  Ma Li Ya tak ai hte maren, madu wa go nayi hkying hkum chyen hpang hkrat nna she, shan nga ai Auehta byak shalak re gat lok shara kon myok le pya madun sa wa nu ai. Ndai go lahkong ning ngu na laman hta shi nambat langai lang ten man man n du pru wa ai rai sai. Tsun gadi da ai lam n nga tim, shan shada garum shingtau hkat ai lam hta galoi mung nshut nshai yu nga ai, shing rai, madu wa go laban shani na mungdo gaba tung htu gaba nga ai marang a majo, hpang hkrat mat ai rai jo sai ngu myit la u ai. Shi nta na pru wa na shong e, chyinghka lam ko maisau pa langai ko dai shana pya madun na zat hte ahkying aten ni hpe ka shakap da nu ai.

  Nambat langai pya madun na ginsup lamang ni go, ma gasha ni yong buri hkaduhka(Daishu) tai rai, shi“Hkrang makau nga” tai rai pya na hku re, Ma Li Ya n lom ai majo, shi hkrai sha n mai pya in ton kau sai. Nambat lahkong sa pya na shara go, sak 93 ning du sai, lahkum ko dung ai gumgai langai a nta ko rai nga ai, shi shaning shanang na shi a daido nhtoi hta n bung ai myokle pya sara ni hpe shaga la rai madu a daido poi hpe kungdon lai let arong satang la u ai.

  (Bai matut hti ga)