Jinghpo hpaji景颇文化

Ngai chyenan sha shang gayat ai

我只是通个电话而已

时间:2017-12-20 10:54:29 来源:德宏团结报

  Ka ai: Ma E Hke Si

  Gale ai: Bok Tong

  (Shata 12 nhtoi 15 na do)

  Ma Li Ya kaga num hpung ni ko hkan nang let asin nyipnyip nga ai nta htingwung hku lai wa ai hpang, shawa yupra langai nga ai shara ko du sai. Masha yu sin ai num ni, yong hpun dagup ton ai nba hkan la kau ngut ai hte, yupra hparan bang wa masai. Num langai kaga ni hte loi n bung nga ai, Ma Li Ya yu dat yang, grau myitsu ai zon re hta n-ga, aya mung grau tso na zon re ai num jan, hpalen len ai masha wahpung ni hpe yu jep let, ya nnan shang wa ai masha ni a gata palong ko chyui shakap ton ai maisau pa na mying hte shi a ta ko ka ton ai jahpan hpe langai hte langai jep shabung yu u ai. Ma Li Ya a makau ko du ai hte shi grai gajong mat nga ai, hpa majo nga yang, Ma Li Ya a hkum ko hpa sakse lakmat n nga nga ai.

  “Ngai chyenan shang gayat ai sha re.” Ma Li Ya shi hpe tsun dan sai.

  Ma Li Ya matut nna tsun dan ai, shi a modo lam ko ruk byin mat ai, shi madu wa go myokle pya sara re, ya yang Pasailona ko shi hpe la to nga ai, chyenan hte shi hpe daina yuptung shong e pya hkyem ai ginsup lamang masum hta n wa lu lom sai ngu shana mayu ai, ya hkying sanit lau du wa sai, manit shi lai ai hte shi nta kon pru wa ra sai, shi n du wa nna ginsup dai ni n mai pya mat na hpe shi tsang nga u ai. Aya loi tso ai yu sin masha dai Ma Li Ya tsun ai ga hpe atsom madat ya ai zon go rai nga ai.

  “Na mying ganing ngu ai re?”nga san sai.

  Ma Li Ya madu a shingteng amying tsun dan ai htom, nsa loi hpoi ngu nu ai. Rai tim, num dai mying ka matsing da ai jahpan hta gade tam yu tim, shi a mying n mu tam nga ai. Num dai loi mau gajong ai nsam hte makau na kaga yu sin masha hpe bai san yu ai shaloi mung, gahpa ladu sha sharot dan nhtom, n chye ai ngu ai kumla madun dat sai.

  “Ngai teng sha chyenan shang gayat ai sha re.”Ma Li Ya bai tsun sai.

  “Ngai chye sai, hkon tsom e.”num dai Ma Li Ya hte shi a matu san ya ai ku makau de madun nga sai.

  “Lama nang shaga madat jang, chyenan gadai hpe mung mai gayat ya ai, raitim, ya n mai ai, hpotni yo.”Shi a manong lai nsam ni nko nlo rai nna, majoi galo masu ai hpe Ma Li Ya yu shapro nga ai

  i agajong sha galam pru ai zon nga sai, hpa majo manam modo gata na num dai ni shamu shamot rai yang, hka yam htumpa zon ali ahti re lam hpe chye nu ai. Teng sha tsun ga, dai go hpam tsi a majo hkrai rai nga ai. Bai nna ndai ahtat awat rai tso gaba ai nlung shakum hte gatsi gatsang nga ai htingnu ni mung myit masin kro ana lu ai, sai hten mat sai masha ni rong ai tsirung langai she rai nga ai. Ma Li Ya gajong let chyinghka lam maga de rot hprong kagat mat wa sai, rai yang chyinghka lam gaba ko pyi rai n kagat du ai shaloi, labu go lago kon hkum tingro di bu dagro ton ai, hkum ngau galu gaba ahkop ahkap re num langai mi e, galang ta magra ton ai hte, aloi sha di shi hpe ga ko dip gale ton da sai. Ma Li Ya hkrit gajong ai majo kya gari let, myiman n gyem hku nna shi hpe magra da ai num dai hpe mada nga u ai.

  “Garai e, nye n nga mat sai chyinghkai nu a mying ningsang hte dagam nngai, ndai de chyenan shang gayat na ngu nna shang ai sha rai nngai.”

  Shi a myiman mu ai hte chye yu shapro sai, hkum kon lago du ai labu bu ton ai num dai a man hta, hpyi shon ai lam ni yong gaman lila sha rai nga ai. N-gun ja dik ai majo, shi hpe gun ja jan ngu shamying da ma ai, chyahkring chyahkra gajong gaja re mu pru ai shaloi, shi hpe hkrai la jang shangun nga ai. Masha lahkong go shi a dingdung dan ga na tsap lahpan zon re ta gata ko si hkrum yu sai. Shi a ta go“Shut lai masha sat”shaman yu sai zon rai nga ai. Bunglat langai go hkala nba mu re ngu, n gon nson majoi shangut kau, bai langai hpe go pyada ni e, ya na lang shing re mu bai pru jang n hkyem sa sai ngu sadi sha jo ma ai. Yong grai tsun kam ai mu go, gun ja num ndai go du ahki nta na masha re hta n-ga, Siping sai hten tsirung shara hkan mu htam hkom ai shaloi, ntsen na zon re bunglat manghkang amyu myu grai shapro yu sai ngu ai lam ni rai nga ai.

  (Bai matut hti ga)

  Tso hte ta gindun let hkom chyai yang grai pyo na wa (Dem ai: Nhkum Ma Chin