Jinghpo hpaji景颇文化

Gyin Gye soi ai sumla

点进来,一边看画,一边了解景颇文化

时间:2017-12-07 16:45:33 来源:德宏团结报

  Moi prat e, ginding ga nai byin tai wa ai hpang shinggyim masha mung nga pra wa sai, dai shaloi mam grai gaja ai rai nna, shinggyim masha ni majoi joi sha ma ai. Shinggyim masha ni mu bungli n galo ai shat lu sha ai majo, naimam hpe ahkyak n la mat masai. Yu, u, dusat ni naimam shaza ai mu tim sa shachyut kau pyi n kam ma ai, n-gu ba pa pa la nna, grau gaba grau kya ai hpe go ma ni hpe lahkum shatai shangun ma ai. Sagya wa mu nna, grai pot pet tsun ai go, shinggyim masha ndai ni nau hpyau sai, n-gup ko hte sha, dangkang hte dung, mala la rai sai. Sagya wa pot wa sai hte maren, naimam numla hpe lamu ntsa de nhtang la kau nu ai, naimam numla lamu de lung mat wa jang, ginding ga na naimam n gaja mat wa sai, dai lam hpe gui e mu chye nna shani shana wau chyu wau nga ai, shing rai tsam mari sha mam numla hpe ga de bai lu shaga la sai, dai ko nna go, Jinghpo amyu ni hkai ai naimam gaba bong tsom wa sai. Dai hpang e go, Jinghpo ni gui hpe grai hkungga nna, nam ningnan sha poi hta, gui hpe shong jo sha ma ai.

  Mam ningnan sha poi nhtoi shong shani go, nta madu ni hkyem shajin bang wa sai. Shanhte go nampu nampan ni hte mon sumli la ai shingnoi gun ton nhtom, nbo mam shapoi bo bang la nna, nta de gun wa nhtom, nat chyinghka makau ko wa ton ma ai. Dai hpang, htingbu htingpyen ni hpe hpang shani nam ningnan sa sha na matu so shaga dat sai. Hpang shani e, htingbu htingpyen ni gabu gara rai let du sa wa jang, nta madu ni go magyep tsa hku hte hkap hkalum tau la ma ai.

  “Manau poi”go Jinghpo amyu sha ni a hkringhtong poi re, Jinghpo ga lachyum go “Yong ka ga” ngu ai re, “Nga galun sat” ai go Jinghpo amyu ni manau poi na masat langai re, Jinghpo amyu ni a ahkyak dik ai jojau masat mung re.

  “Manau poi” hpe shaning shagu na hkru ta nhtoi 15 ya shani ko galo ai re, manau manau ai ni go Jinghpo bu hpun mon sumli lang, nhtu layit hte mong rai, naushong naupa ni a hpang ko hkan nna ka manot nang nna, mana maka pyo a nga ai.

  ai go Jinghpo amyu ni hkungran poi galo ai hta galo ra ai ahkyam masat re. Num ningnan sa tau la na shong e, la ningnan ni nta ndo yang ko kumba mahkrai galo da nna, lahkong maga kumba jung ton, gumba lapran ko go galu de mida 2-3 du, pa de limi 15-20 du ai hpun mahkrai hkrai ton nna, dumsa wa sa dumsa to nga sai. Kumba mahkrai ko nna lai mat wa jang go, num ningnan dai go la ningnan wa nta na masha mai son sai, dai hta n-ga num ningnan go madu nta ko grai kung grai kyet ai re hte maren, dama ni nta ko du jang mung mana maka shakut shaja let dinghku gun sha ai shayi num langai tai wa ra ai.

  Jinghpo amyu ni a rida maka go mayu na nga sat nga lam na masat masa ni hpe da shapro ai rai nga ai. Shi go lam magup hku nna Jinghpo amyu sha ni a hpong shingra masa lam ni hpe shadan dan hkrat wa nga ai. Ta hte da la ai ri da maka ni go amyu lo ai hte maren pungzan mung pu shagu nga nga ai.

  “Htung hking lu sha” go Jinghpo amyu sha ni hkringhtong htunghking lu sha ni rai nna, makyin jinghku mano manang ni hpe hkungga jo ai lu sha rai nga ai. Simo simai Jinghpo bumga na namlo namlap si mai ni hpe machyu nna, Jinghpo amkyu sha ni a ju ai, shadu ai, gangau ai, yen ai ladat hte galo la nhtom, lahpo hte atsom makai nna sha ai re.

  Jinghpo amyu ni mi moi ko nna mahkon hkon kap ginsup ka kam ai amyu ni rai nga ai, Jinghpo bu ga hta, “Lam sha chye hkom sai hte go ginsup chye ka sai, ga chye shaga ai hte go mahkon chye hkon sai” ngu ai ga malai nga nga ai. Aten na na re galo lu galo sha, nga sat nga sa lam hta alak mi re amyu mahkon mangui hte ginsup ni shalat la mat wa lu sai. Hkringhtong mahkon mangui go jo jau, nga sat nga sa, bungli galo re myu masum hku garan da nga ai, shing nrai nna, nga sat nga sa lam hte, bungli galo, majan gasat, jo jau re lam ni hpe shadan dan lu nga ai.

  Dai majo Jinghp ni go n htu hpe grai kam hpa nna “Asak a nhtu” ngu shamying nga ai. Gahtong buga hta, mi moi ko nna ga malai langai nga ai: “Jinghpo bum ga na lam go nhtu hte hkyen shapro la ai, lahpan hte gabye shatsom la ai re”. “Shadang la ni nhtu hkyen nchye yang, sumtsan ga de n mai sa ai.Shayi num ni labu nchye da yang, num n mu wa ai” nga nga ai, shing rai nna nhtu hpaji kung ai shadang la ni hpe go shayi num ni yu ra sharong at shajang nga ai.