Jinghpo hpaji景颇文化

Lamu ganghkau ntsa pyen ai wa

景颇小说

时间:2017-11-26 16:35:32 来源:德宏团结报

  Shana yuptung e, Ma Hka go mare de tsa sa lu hkru la nna, ndi nda rai nta bai nhtang shang wa ra ai. Shi go nta makau ko du wa jang,“Ngai Ma Hka nang sai lu… Nang sai lu…”nga ai mahkon hkon nna shang wa ra ai.

  Ma Hka chyinghka lam ko shang wa hkyem nga yang, chyinghka gadun ko ahtu nna, ga ko“Buk”nga hkra galau to mat sai. Shi tsam mari lu rot tsap nna:“Ning nu! E ningnu……”ngu nna gade maron yu tim, gadai nhtan ya nga ai. Mahka grai na hkra masop yang she dodap na wan dat sumri mu masop nu ai, wan gang shatu dat nhtom, yup gok de du she nhkyeng hkra wa lagu yu yang, madu jan apyo sha yup to nga ai. Madu jan go Ma Hka shaga ai na chyalu re, shi nkam htan ya nga ai.

  Ma Hka go palong ninghpu hkrai hkrai re pyi n ro kau ai, madu jan a makau ko galeng bang wa sai, chyinghkring yup gok gok yang, nta pyi ganan wa ai zon nga hkra yup gok gok bang wa sai. Bai madu jan go, Ma Hka tsa bat hkrai wa wa nga n dang hkam ai majo, bunghkum hta la nna yupku lago de bo shayon nna yup mat sai. Jahpot nhtoi mahka yang, madu jan shana tup yup shakrang kau sai majo, kan chyabung mat nna, grai ngoi galu ai nsa hpe lasi nuk she lom hkra shamong dat nu ai. Tsa bran wa sai Ma Hka go shi hpe shaga ai zon nga ai mi na dat nna:“Nhpa do oh?”ngu galo gahte san u ai. Madu jan nhkap htan ya ai hta n-ga, sun sun nga ai mi manam pru wa ai majo, masop dat yu yang, madu jan a maidang wa mi chyu she masop hkrup u ai. Shaloi Ma Hka go:“Sa-wa ndang e garot na num mung yo! nga anyam la nna bai gale yup mat sai”. Ma Hka galang mi bai dum pru wa yang, shinggan de jan pyi mai sai, madu jan galoi rot mat wa ai re pyi ndum kau nu ai. Mayu nau hkun wa ai zon nga nna, shat gok na hka gatsi ka-mai gaba mi sa lu kau dat sai, ra ra no nga ai majo, dodap nhtung na dinghkru wa hta sharat yu yang, hting ye sha pyi nrong mat sai. Madu jan ko gumhpro hpyi la nna no sa mari lu na wa rai sam ai ngu tam yu yang, madu jan hpe mung n mu kau nu ai. Shaloi she mare htumpa nta hkungran poi galo ai re shai dat nu ai.

  Ma Hka loi agang mat sai dangpai lawai kau, kara mung zong zong rai, zauhkai mung nhkai ai mare htumpa nta de sa wa sai.

  Hkungran poi nta ko du wa hkyem jang, chyinghtong lap di la nna anyep gatsut kau, ta hte myi hkyi machyin kau rai shang wa sai. Hkungran poi ko bungli sa galo lom ai ni grai mong jong nga sai. Ma Hka go wudang ko lai shang wa ai hte:“Shawa masha ni ngai Ma Hka bai gaprip to nga sai, chyingbau hte lawan hkap tau la marit!”Nga nna jahtau dat u ai. Dai ko nga ai ni yong shi hpe myi jinghtong rai jom yu la nna, yong mani mat masai, nkau go:“Salang hka wa poi bai shalum sa wa ra ai.”nga nna gahte tsun ai mung rong ma ai. Shat gok ko shat sa shadu lom nga ai madu jan Ma Hka a nsen na dat nna, ndo ya de gagat pru wa ra ai, Ma Hka hpe myi grai gaba hkra hpo shachyen dun let:“Sa -wa nang ndai de nhpa la sha sa ai re ta?”ngu nna share dat jang, Ma Hka mani sai sai rai tsun ai:“Ningnu daihku hkum tsun le, ngai ndu yang poi n byin ai go.”nga kau da nna, dodap de hkre shang mat wa sai.

  Dodap ko salang ni sumpum mi dung nga ma ai. Ma Hka shang wa ai mu jang, nhtung maga de hkahku nhko hko kau hkra re dingla langai wa go, myi nda hku Ma Hka hpe hkap yu let tsun ai:“Ma Hka nang daini bai lu yo!”Ma Hka ga dai na jang:“Wa Bok, ngai ganing bai rai wa sa, nga pyi ya she shang wa nga yang.”nga nna gawa Bok hpe ning-hkap u ai. Gawa Bok du lasa she dingkren hkra rai:“Ya shang wa nna she sadi u ngu nga yang!”nnga nna hta dit jang, Ma Hka go:“Um lo, umlo.”nga let gatsi dung mat sai.Ma Hka shara magup asoi yu yang , shi ra sharong ai bo rai nhtung maga de na wan mang makau ko dung nga ai. Shi chyan yu yang n dep nna, gawa Bok a makau ko dung ai salang mi hpe gahte tsun dat sai. Gawa Bok bai na kau nna:“Dai yu dai yu, ya sha tsun nga yang!”ngu jang, dai makau hkan dung nga ai salang ni go:“Wo hta ya mu, shi galoi sha n lu ai ton yu ai. Tsa chyaru mi go shara magup jong nga yang mi, shinggan hkan tam lu yang grau nhtuk ai, ndai ko anhte mu nga yang lu la nu ga.” (Ya na lang bai matut hti ga)

  Zimra.(Dem ai:Nhkum Bok)