Jinghpo hpaji景颇文化

SAUYI HPUN AI “MAU HPA RAI” HTE NINGMAI GALU TU AI “DINGLA”

民间故事身披蓑衣的老人

时间:2017-11-05 21:22:19 来源:德宏团结报

  Moi lani mi hta, nga rem ma langai go shi grai tsora la ai nga langai shamat kau nu ai. Shingrai, shara magup tam hkom ma sai. Raitim nga dai a shingna pyi n mu mat ai majo, n htang wa nna nta ko wa hkrap nga nu ai. Ganu yan gawa go, ma dai manu mana yon hkrap nga ai mu nna shi hpe myit shapyo ya ai:“Ma e, hkum hkrap sa, nang a hkrap nsen sharo na jang na anga dai sa dun la kau ya na ra ai, shum hkrap sa, da kau sanu, hpot ni anhte rau sa nna mu hkra sa tam la na re.”ngu ma hpe tsun asong shapyo nga ma ai. Ganing ngu tsun asong tim, gasha dai go aja wa sha no ahkrap nga nu ai, hkrap let:“Ngai ningmai galu ai dingla hpe hkrit ai.”nga nna tsun u ai.

  Hpang shani, shanwa nam maling de dai mat mat ai nga hpe sa tam ma ai, hkom nga hkom nga rai yang, agajong sha“Sak sak, htik htek”nga ai nsen na dat masai, ma go ngai hpun lahkung dingshan ko gasot hkra nna ngoi pru wa ai nsen shadu nga ai, dai nsen ngoi ai shara de tam sa wa yang, sharo langai mi n-gup ting sai hkrai ahkye rai nga wuhkum langai makrut ashep sha nga ai hpe mu dat manu ai. Shaloi, dai ma a gawa go, hkrit nna gasha wa a n-gup alawan sa gan magum kau dat ya let:“Hkum hkrap sa, sharo na kau jang go n mai sai re lu!” ngu gasha hpe lagu gahte tsun u ai. Raitim, gawa ta sha no dom la kau dat yang, gasha bai hkrap dat sai, hkrap ga hte tsun ai:“ Ngai ningmai galu ai dingla hpe hkrit ai lo!”Shaloi, gawa go grau hkrit gari mat nu ai. Gawa nau hkrit mat ai majo, gasha hpe:“Hpa zon re ningmai galu dingla rai a ta? ”ngu yat yat sha san dat u yang, gasha ta shingnat let: “Ningmai grai galu ai, hkum hkrang grai gaba ai re, ngai atsom sha n gui yu ai.”Nga nna gawa hpe tsun dan nga ai.

  N myit mada ai, shanwa a ga hpe dai nga mang makrut ashep sha nga ai sharo e na la kau nna, sharo bai myit la ai:“Hpa bo ningmai galu ai, hkum hkrang gaba ai rai go gara hku nga tim ngai hta grau byin ai rai lama ma rai na re, ngai alawan hprong mat ra sai. ”nga nna myit la let, dai shi ashep sha nga ai nga mang a nga bo hpe ton kau da n na gaja lawan rai hprong mat wa nu ai.

  Sharo gagat tik tik, hprong tik tik rai, jan do mi ting agying agang hprong gagat kau nna nsa pyi n lu sa ai zon nga hkra ba mat nu ai. Raitim sharo go hpa mung n mu ai hprong gagat kau ai majo, shi ram ram pot mayu mat nu ai. Shi tsun shi wom rai: “Oh shinggyim masha go masu ga tsun nna ngai hpe jahkrit nga a hka! Ngai go dusat dumyang hta na hkohkam langai rai nga n ngai, ganing rai ngai hpe jahkrit kau lu na i? Ngai teng sha shanhte a nga langai bai no sa dun sha kau ya na nngai.”ngu myit la nu ai. Dai shana yuptung e masha yup zim mat ai shaloi, sharo go dai nta ni a anga wulong de bai sa du sai. Sharo sha no chyajom dung dat yang, dai ma gasha nhku de hkrap nga ai nsen hpe bai na dat nu ai.

  (Ya na lang bai matut hti ga)