Jinghpo hpaji景颇文化

MA PRAT TEN(3))

童年(3)

时间:2017-06-06 17:13:56

  Shapre shat jat sha jang grai myit htum

  nngai, shapre kung wa jang shat ma shagu

  shapre shat jat hkrai sha ra nna, laning mi

  go sun ko hkai ton ai shapre ru yong sa dan

  di se ai, hpang shani hkai sun sa yang sa mu

  nna, maichyu kawa lasik hte hkan shachyut

  gayat ai mana sha kau sai. Dinghku nkau

  hta jat sha na hpa nan nlu mat jang, lagum si

  hte lamai si pyi jat sha ra ma ai. Nta masha

  ni gat rai la shani grai grai puba nna sa tam

  wa ai gat rai go, gat shani ta maga mi singga

  hpa-na manat, ta maga mi go dohkrong

  lang rai hkra gat de gun sa wa yang, ajum

  majap mari ai hta lai nna, n-gu asing mi lu

  mari wa ai shani go grai gabu rai sai. Dai

  majo n-gu go nta ting a asak matut na sumri

  rai nga ai. Shing rai dui annau ni shat hko ai

  mu jang grai daru ru re. Ashan sha na ngu ai

  go myit pyi n myit gui ai bungli re, galang

  lang dui gadu hka gap wa, sharu htu wa rai

  jang chyu she shan mu sha ai. Dai prat hta

  go-nyen hkan wa langai mi sat sha yang,

  kungsi de chyen mi no sa gyau kau ra nga

  ai, wa rem yang mung masum mali ning

  rem yang she sat sha ram nga ai. Naimam

  mung ya na zon rai ai nli gaja n lu ai majo,

  mare masha ni shaning ting ting jom shakut

  tim, n lo sha hkro nga ai, laning mi shakut

  nna jom shu la lu ai mam go, shata manga

  kru du wa ai hte sha ma sai, hozoshe na

  mam hkai kyin ai hte rai nga yang she,ahku

  hku nna shat mung bai gawat sha rai grai

  jamjau nga ai. Raitim nta ko ajum majap

  sha lu jang go, simai simo go nau nmyit pu

  nga ai, sun hkan hkai ton ai simai ni di sha

  ai hta lai nna, nam de shabying, wa-lai ni

  mung grai jong nga ai majo myit nhtum ga

  ai.Ngai mung gumra tam sa let u gap wa

  nna si htu htu sha, ginhtong ta du jang

  hkauna hpaze gata hkan na shu hkui wa rai

  ai hpe ya daini du hkra marit shingran no

  mu to nngai.

  Jong lung ai ten hta, hpun hta wa shat

  di rai ai mu ni go bungli madung rai nga ai.

  Bum ga hpun hta go loi ai, raitim, washat go

  krung de sa di la ra ai majo, lapu hpe hkrit

  ra ai, htingra ta shang wa ai majo, lapu hpe

  hkrit ra ai, htingra ta shang wa jang, lapu ni

  maling gata hkan agatsi sha hpum rong nga

  ai, n dum ai sa hkra dat jang achye mana na

  tsang ra ai. Bai lam mi go krung hkan magui

  tsamat nau jong nna grai sadi yak ai. Lani

  mi ngai Shong yan Bok hte Hka-htum krung

  de wa shat di sa yang,tsamat maling de

  hkon bang mat wa nna,man ting bum mat

  nngai. Nam hkan hkom yang ahkri gawa na

  mung tsang ra ai, ngai go ahkri hta grai n

  ram nngai, ndum ai ahkri hpun hkan sa jum

  hkrup jang, lahkong masum ya du hkra man

  hkan aron to nga chye ai. Ngai krung de

  shang hkrit jang, Zau Hpan yannau ni hte

  Hka-la hkyet makau na prang kong hkan

  hkrungmu makrung sa di, dai mung wa ni

  hpe ayan jo jang nsha ya maai, dai majo

  ngai go wa shat di ra jang grai myit htum

  nngai.

  Gumra rem ai ten na jang dingsi ngoi

  ai nsen ko sha pyi nta na gumra re chye ai

  hta n-ga, lago hka ko yu dat ai hte gumra gara

  maga de yong mat wa ai re hpe chye ai,

  gumra hkyi ko yu nna mung madu a gumra

  rai nrai chye yu shapro ai hte rau, hkom mat

  wa ai gade daram na sai hpe mung chye lu

  ai. Gumra rem yang, galang lang go n yak

  sha mu tam ai, galang lang go mu tam tim

  nta de n lu gau wa hkro ai, gumra hte gasat

  hkat nna gade lang she hkrap kau yu sangai.

  Gumra ni ganing nhten non ai shani go, nam

  maling de hprong mat wa, tsam mari lu gau

  shapro la jang, lagat kong lam numshe de

  bai di gumtong mat rai n wa hkro ai. Laban

  du jang Num salun yang de nga mung sa yu

  nngai, nga sa tam yang marang htu jang maling

  gata de hkrai lagyim mat chye ai, ajan

  ja jang go lahkyot gata de walu sa hpun ai

  majo tam loi nga ai hte maren, galoi mung

  ajum sa jo ai makau hkan she nga ma ai.

  Mangai ta du jang u mung gon sa ra ai.

  Madung go laban du jang she sa ai, nye a

  dui yi hkan mahkam grai hkam ton ai, nam

  u amyu myu re grai lu hkam nu ai, madung

  go mam, hkainu lagu sha ai yu hpe hkam ai

  ga re, gaja wa yu n lu hkam ai lani mi pyi

  nnga yu ai. Ngai mayu e yu shan hpe grai

  matsat ai, dui yu hpe ahpyi hte akan la kau

  nna garap ko noi jahkro ton ai hpang, ju sha

  yu yang manu mana mu ai wa she rai nga

  hka.