Jinghpo hpaji景颇文化

MA PRAT TEN(2)

童年

时间:2017-05-28 11:35:57 来源:德宏团结报

  Latek go shani ting ting nten ta samum ko hkrai rong nu ai, Chyanye nyek go chyinghtong pu pu ten du jang she gasu pru wa ai. U ni lo malong go sun na pa sa si hte ndu si hkrai sa sha ya nna, dui ai wantsi sanat gatut sha ai she lo malong re.

  Ngai chyai pyi rai n lo ai zon nga yang, jonglung ram ten du mat wa sai. Nye nta go jong makau na lu ai hta lai nna, jongma ni anhte a nta makau ko sha rai nga ai majo, shani shanang jong bau nsen na lu ai hta lai nna, jongma ni anhte a nta makau hku lai wa ai hpe mung mu mada ai.Ngai go jong sa wa ai ni hpe grai yu manon nngai, yu manon ai lam go, jongma ni hpen la nhpye kau rai sa wa nhtom, jong yu jong bai jom grau mat wa re hpe grai yu masa dum nga ai. Ngai kru ning jan sha no rai yang jong sa sai, ngai go moi Dim hpe jong lung mayu ai ngu nna hkrai aput satsang jang, jonglung na hku sa wa yang, sara ni ngaihpe asak nau no gaji ai, htaning lung na di u nga nna nhtang wa kau shangun hkyem ma ai, ngai nlung na hkro nga jang, hkra ta hte bo ntsa hku shalai nna maga na ana bai masop shangun yu ma yang, ngai gade shakut yu tim n dep hkro to nga sai. Shing rai jang sara hpang shaning she lung shangun na hku bai hkyem wa sai, jahtum e ngai do shapro ai nyan hpaji go hkrap chyu sha chye mat sai, sara ni ngai matsan mayan nga nnahkrap nga jang, lung shangun na hku hkro sai.Jong garai nsa yang,jongma ni hpe grai yu masa dum ai wa, hkrak nan lung jang she gajong nga ai, shana shanang laika ka ra ai hta n-ga, jong gok ko mung shamu pyi nmai hkra dung nga ra ai. Nkau go jit ji mayu tim sara hpe hkrit nna ntsun wam ai majo jit pyi tat ma ai. Sha na de jan no rong nga yang gasup nau mak ai majo shana laika pyi rai n ka ngut yang yup nga mat sai, hpang jahpot hkrap let laika bai rot ka dung nga rai, hpang jahpot hkrap let laika bai rot ka dung nga rai, ganing di nna n ka ngut ai jahpot go, nta de shat pyi nmai wa sha mat sai, laika sha n ka ngut dingsa sara e jong gok ko rong ton ai chyu gatut sha nngai.

  Lana de mi hta, jong yu ai hpang, jonggata na hka nong ko manang ni hte hka htok bun hkat chyai ga ai, shana laika ka na ngu nna laika nhpye tam yang, yupku hpu hkan du hkra ashap kau yu tim, laika nhpye nmu mat sai.Ngai go myit htum mat nna shana ting hkrap jin ai hpang yup mat ni ai,. Hpang jahpot go jong ganing di sa wa na lam myit htum to nga sai, moi Dim ngai hpe yu matsan dum nna, shi a maisau hhkedan ni garan jahprai rai jong de woi lung wa sai, jong wang shang wa na wadang ko du yang, ngai na laika nhpye go numri hkrai shu shu rai gumhpan ko noi nga sai.Ngai go shong shana de hka gasup ai shaloi nhpye hpe gumhpan ko ro noi kau da ai lam gachyi mi pyi nshai mat nga ai.Shingning tup jang sara anhte lang ai laika buk jep yu u ai, Maji Ba hte an a laika go manang gaga ni hte nbung to nga sai, laika nau je nna din din she rai mat wa sai.sara pot nna laika gundindai hte bo hkan gayat ya ai hkrai gatut sha ga ai. jong tsang masum lung ngut ai shaning. jong sara bai galai mat sai, sara dai jan go pot nau n chye ai majo, anhte ni go woi wunnong ni hkainu yi maling de shang ai hpa she rai mat sai. Shana go lahpo singgyin gyin, jahpot jan lum wa jang, sra shinggan gan pru mat ai lapran hkalap hku man pru wa nna u gap matb wa rai, jong mung atsom nkam lung mat sai. Sra ni mung jong de ndu ma ai, sara n nga ai shani go, anhte jongma ni chyahkyi langai mi lu gap ai hta pyi grau gabu ga ai, bum de hpun chyaga si, ga chya ga si, braknon si, ga-wom si, saring si, hpun lagung si, prang si re ni tam sha mat wa,shing nrai masha so gahkyin la nna, ga tong, makok si, nlung re hte baihkat, gabai hkat ai sha n ram dum jang, lahpo hte gap hkat rai ga ai. Shana du jang go jong lapa lang nna shu sa nan hkom rai, laika na yu ai hta lai nna, laban nga kau ai aten mi n nga yu ai. Dai ten hta, ja gumhpro grai no yak ai ten re majo, jongma manang ni nkau jong sa yang gyepdin pyi nlu din ai she lo malong re, anhte a labu palong mung gapa ai ko bai gaoa, lago lahpan go nbung ju gabye hkra tim she matin nga wa ai, kinsa ju ntsa hkan go majoi she gabye lai lu ai. Jongma malang dai ni hta na Sam Tu a lago grau lapyin nga ai,shi a lago go galoi mung nshin yu nu ai, shi tsun yang lago shin kau jang gashung ai da, shi go gagat chyang ai hta n-ga, hpun lung mung grai byin ai, gade tso gade lung yak ai hpun ko rai tim gumtsun man lung lu nga ai. shannau ni nau lo ai majo, nga sat nga sa lam magup hta mung grai ruyak nga ma ai, raitim shi laika hpaji grai shakut kam ai majo, jong sara ni loi nnhkring shakon mana ai hkrai hkrum nu ai.

  Ma prat hta na lu sha hpe ya nhtang myit dat yu yang, n-gu hkrai san di sha ai nhtoi mi n nga yu ai, ya na ma ni na yang go nau na re. Shat ma mi shadu sha yang, n-gu kok mi dang ko hkainu shing n rai wandu si, sandu si, shapre re ni jat re ni jat nna shadu ai ntsa ko aya bai ningdap shalom ton re hkrai re. Ntsa ko ningdap on ai aya go, shat di hkyet ai hpang e she ningdap ton ai re majo, ntsa de n hkut hkro nga ai, shingrai jang, digap ntsa ko wan- bai mara ton di jang she hkut lu ai. Ngai go wandu si, sandu si re jat sha ai hpe go lu mayu bang dat ai, she pre shat jat sha jang grai myit htum lu ai.