Jinghpo hpaji景颇文化

Si wa hkyem ai machyi ana

临终前

时间:2017-05-28 11:30:40 来源:德宏团结报

  Ndai lang tsi rung bai rong yang, Tu Mai tsi rung loi n hkring rong nu ai, ana go shawoi machyi ai dai hkrai machyi bu wa wa rai, makyin jinghku mano manang ni sa gawan na pyi lagon mat sai, tsi rung nau rong jang grai garen wa da nu ai.

  Ndai lang tsirung bai rong yang, Tu Mai kaga lai mi laklai ai zon nga ai, tsirung lahkong masum ya sha no rong yang, shi hpe sa gawan ai ni pru pru shang shang, mano manang mahkying jinghku ni yong du hkum sai, shawoi nau n ganon ai ni du hkra sa wa mara ai, sha du sai ni go kumhpa hpai nna du ai hkrai re, shi rong ai shara ko she n shang hkra sa hpai shajong ton ya ma ai. Atsom tsi la u, mai wa na ra ai nga ai hkrai. Tsi rung na ningbo ni du hkra ganing di tsi lajang na lam sa hpareng nga ma ai, tsi sama ni shi hpe nau hkungga nna nshang du hkra machyi wa nu ai.

  Tu Mai go myit htum mat sai, shi myit ai go, ndai lang go si hkyem jo sai, si jang go gade wa ai bo rai kun, atsu ga mi rai na, gatsan ga de mi rai na, sumsing lamu de mi rai na, shing nrai go jiwoi jiwa ni nga ai de mi she wa ra kun, gade wa na mung n gui nna myit htum mat nu ai…

  Shinggan de asuya bungli galo nna shaning ting ting nta n wa ai gasha Gam Hpung mung du wa ra ai, shi myit ai hte ro sha, gasha wa shi hpe hkan sa dat nga nna nsa garai n hti yang kagat du wa ai ga rai sam nga ai.

  Tu Mai gasha a ta gang let san ai: “Ma e… Wa hpe tsun dan rit, wa gade ya dang no nga lu na re ta?”

  Gasha go Tu Mai a ta galo jum let tsun ai: “Wa, nang mana mana shum nga le, hpa n ra ai! Tsirung ningbo wa tsun yang, na hkum na machyi ana n song ai da, lahkong masum ya mi tsi jang mai sai.”

  Gasha shing nga jang, myiprui si pyi ganoi sha hpo ahtu gumtong pru wa sai, shi grai sharang let tsun ai: “Ma e, wa hpe shum masu sha lo! Ndai lang na tsirung rong go masha nde wa ting sa gawan ai, nang mung bungli gade kyin tim shalo tsan ai ko nna du wa ndai, ngai si ten du sai rai nga ai!”

  Gasha go mani sum rai, gawa a ana ko gahte tsun ai: “Wa, ngai ndai myu mare na ningbo gaba lit gun na matu nhtang wa sai.”

  5-12,3