Jinghpo hpaji景颇文化

SHONG DE NA JINGHPO GAHTONG ZAT HPUNG ZON SHAPYO NINGHKONG

昔日景颇寨文艺气氛浓烈

时间:2016-12-31 10:50:42 来源:德宏团结报

  Marit maroi ningtsing lai mat wa

  Dingla dap de shang dung ra

  Dingla dap kon myit sumru

  Wunpong buga hpe dum lu

  Marit maroi let ningtsing wa

  Yu-ngui n-gun lu jat la

  Wunpong buga dum dat shagu

  Marit sumhtang lu na zon ngu

  Shong de na Jinghpo gahtong

  Zat hpung zon shapyo ninghkong

  Jinghpo amyu gahtong langai

  Zat hpung langai hku na rai

  Mare bo de hturen ngoi

  Mare htumpang wunpong mahku shoi

  Sinpro maga ka-la mahku sho

  sinna maga bum lang mahku gayo

  Gasho yi-nam magam shang wa

  Yi-nam dumba dum let sa

  Mam magang magam ten bai du

  Mam magang dumba dum let ru

  Nhprot shingnom hkyen bang wa

  Pyihtot pyi tai dum let sa

  Htong seng mangai du shang wa

  Mangai ningchyun hte yin wang sa

  Wa hpu masin pali shit bang wa

  Hkring sa ten pyi man dum shaya

  Wa hpu htem lem mahku rung

  Ugon machya mangai dumba dum

  Mam shu mam dan ten bai du

  Hkana shagu madum nsen pru

  Yi bo de mangai dumba ngoi

  Htumpa de hturen nsen shoi

  Nhprot shingnom maga de wa

  Mangai n mut ningchyun ngoi gara

  Nmut tom nna nta wa

  Lam dingdung sumpyi ngoi gara

  Gahtong numshang du shang wa

  Mare bo de hturen ngoi gara

  Mare htumpa na nta lai

  Pyi lang dum shapyo nga ma ai

  Lagat tu kong ko bai du

  Dingshon htongka ka ai mu

  Wu ra hkyet ko du shang wa

  Gabu oh lo nsen hpe na

  Jan mai kong gata hku lai

  Pyiman roizo shapyo ai

  Machyang hkyet ko bai wa du

  Larung sumhkran nsen bai na lu

  Jinghkang hkyet makau hku bai lai

  Hkungran poi shapyo nga ma ai

  Dumbu baja nsen ngoi

  Prat dep yu-ngui nsen shoi

  Lauban kong hku lai wa yang

  Mam nnan sha poi ko bai ang

  Hpo mi hpo mang nsen shoi

  Pauka ka ai mahku ngoi

  Htingnu Kong ko bai wa du

  Majan laka ka ai hpe bai wa na lu

  Kaidu hkran hku bai lai wa

  Jaiwa nsen mung bai na

  Maibau kong ko bai wa du

  Mam htu yoilu bai na lu

  Nga rem brang ni a nga gau

  Hturen nsen hte she rau

  Gahtong gaang de du shang wa

  Ramrot yu ngui ngoi gara

  Dumbu ba ja pyirong ngoi

  Wunpong sumpyi nsen shoi

  Ginsup ka ai ni mung nga

  Da-go go ai ni mung pra

  Gahtong dingdung yu-ngui hkrai

  Hpuntang nsen nhtum ai

  Ram rot gaji gaba n-gai dingla

  Yu-ngui mahkon hte rau sha pra

  Htunghking manau mung tut manau

  Manau ohra mahku hte she rau

  Rai yang ya daini aprat lado lai

  Yu-ngui shingran gatsi sai

  Shingrai ya sumhtang mabai ba

  Ahkang zin ya bai no hta

  Hkringhtong yu-ngui lau shachyo

  Wunpong mahku lau she sho

  Rai yu ga oi!