Jinghpo hpaji景颇文化

Wunpong sha ni a yon hpa

景颇人的悲哀

时间:2016-07-04 16:15:28 来源:德宏团结报

  Ka ai: Maran Gum Ja

  Atsa chyaru ndai wa,

  Wunpong sha ni a yon hpa.

  Nhpa rai in ngu a ta?

  Byin ai lam ni yu yu ga:

  Jahpan n lo ai Wunpong sha,

  Tsa lu jahpan go jat wa.

  Sak prat gaba sai nu wa,

  Tsa yin grau lu grau gaba.

  Sak prat no ram ai ramma,

  Tsa chyaru hpe n hka hkra ahkyak la.

  Shadon sharam na n chye,

  Shoi chyum na go nang she re.

  N mu yang go gaman dung nga,

  Lu jang go ahtan lu la.

  N hkrup yang ganing ndi,

  Hkrup jang masin mi asi.

  Manang tsun na go n ra,

  Gat hkan mana bai hkan pya.

  Ngam ton tim myit n gut,

  Lu ai hte ma-hkra atut.

  Ahkying aten n masat,

  Tsa seng de chyu kagat.

  Gat ya gat lam hkan tsa lu,

  Kaga myu ni e tsun hpu.

  Mu htam ten hta tsa bat wai,

  Nang tsun jo tim ga n shatai.

  Aten n tam tsa lu chyu hpong shara,

  Hpang jahpot bungli mung bai n kam sa.

  Akan gaman tsa lu bang,

  Loi mi lung jang atsa nang.

  Sutgan madang hpe malap,

  N lu jang go hkan hkoi shap.

  Manang shada lu shingjong,

  Grau lu lu yang she arong.

  Matsan wa she kunmi hku,

  Nhkrit nkang lu dagru.

  Atsa hpe chyu yi-ngam la,

  Myu a lam hpe go malap kau ton da.

  Grau lu grau sha ai go kaga,

  Mying gun ai go Wunpong sha ni.

  Labau gun ai nu wa ni,

  Tsin-yam makau e hkrai kri.

  Wa-ja wa-ngan myit su ni,

  Tsin-yam a mayam lit chyu li.

  Majan hta lot sai ni,

  Tsa htinggap ko shang lim si.

  Myit rai n su ramma ni,

  Malut chyaru bai ka-ni.

  Gaji gawa hte gasha,

  Hka tso won tso shingjong hkat ra.

  Ndai zon re lailen wa,

  Atsom myit son sumru ra.

  Ndai zon re hkrit hpa hpe,

  Madu myu nan n dum chye.

  Jum mu nna shanang nga,

  Dum ai shani hpang hkrat na.

  Dum nga ninglen ten sharen,

  Amyu ting hpe hkra jahten.

  Kunghpan amyu byin lu hkra,

  N htuk lailen lai kau ga!