Shiga masa景颇新闻

Anhte mungdo na lapran tsang jong hte jong gaji ni jong hpo hkyem sai

筑牢防疫战线 蓄力复学工作 我州各中小学校将有序开学

时间:2020-03-24 17:56:38 来源:德宏团结报

  Ana zinli agajong sha hkron bra wa ai majo, 2020 ning ginhtong lado na jong hpo ten sharen kau sai. Shata 3 nhtoi 23 ya shani ko nna go lapran tsang jong na tsang 12 jongma ni jong hpo na hku dodan sai hte maren, mungdo ting na lapran tsang jong sara ni jong hpo na matu hkyem shajin to nga ai, ya jongma ni du sa na sha la nga sai.
Ana zinli hkoi mat wa sai hte maren, lahta tsang de na ni lajin dat ai ko hkan nna, mungdo ting na jong sara ni jong hpo na matu shajin to nga ai. Jong hpo jang jongma ni hpe ana zinli dingyang no woi sadi maja na matu, jong sara ni jongma ni nga ai shara hkan dun ye kau, jong gok, yupgok, shat lu sha shara re hkan ningtuk sat kau re bungli galo ma ai. Shata 3 nhtoi 20 ya shana de, shi sok masha Sakhkung mungdo nambat 1 amyu lapran tsang jong hte Sakhkung amyu lapran tsang jong ko sa du yang, jong na ni mabyin masa  ko  hkan nna wunli makop bungli hpe si mani rai galo nga ma ai.
Sakhkung mungdo nambat 1 amyu lapran tsang jong jong up, pati rapdo mu madu Lu Kyang Yi shi sok masha hpe ning nga nna hkap tsun dan ai: Jong garai  n hpo ai ten hta, anhte dat nbung jinghkri ko jongma ni hpe hpaji sharin ya ga ai, laika hpaji sharin ya ai hta lai nna, sara so shaga la nna jongma ni hpe myit shalan shabran ya ai bungli mung galo ga ai, jongma ni nchye nko nga nna san ai lam hpe nyan hpaji amyu myu do nna htai dan rai ga ai nga ai.
Dai hta lai nna, jong shagu na ni jong wang gata de pru shang ai masha ni hpe aja awa hkap jep ai, hkumhkrang gahtet gamot re ni hpe langai mi mung n shang shangun ai. Jongma ni yup ai shara, jong lung shara, jong de shang wa na chyinghka lam re hkan gan yu jep na shara san ton sai. Jong na shat gok ko mung jongma ni sanseng ai malu masha lu sha, sanseng ai hka mu lu rai na matu sanseng grai galo du ma ai.
Sakhkung mungdo amyu lapran tsang jong jong up, pati rapdo mu madu Yang Wui tsun ai, anhte jongma ni hpe hkumhkrang gahtet gatsi shadang hkap jep yang manu na matu, hpung masum garan nna jong wang de shang wa shangun ga ai, shat sha ten mung garan kau ai, shat sha ai shaloi myiman hkrum rai n dung shangun ai, shat sha ten hta shada n shaga hkat na hku jongma ni hpe sadi jo da ai nga ai.
Jongma ni a nta masha ni n-gup magap ra  gadon ai hte seng nna myit lo ai lam hpe, sho sok masha jong up Lu Kyang Yi hpe san yu yang, Lu Kyang Yi jong ko shajin to nga ai lam tsun htai dan sai.
Lu Kyang Yi tsun ai, lahta tsang de na ni matsun ai ko hkan nna, n-gup magap n dagro n mai n ngu ai, jongma ni jong wang de shang wa jang go n-gup magap n dagro ra ai, raitim jong ko n-gup magap hkyem ton ga ai, jongma ni, shing nrai sara ni hkum gahtet wa jang n-gup magap dagro kau nna,  tsi  rung  de lawan sa sa na hku hkyem ton sai nga ai.
Shi sok masha sagon yu yang, Sak- hkung mungdo jong shagu na ni jong hpo na shong hte jong hpo ai hpang na ana zinli htang tek maja bungli htep lahti rai galo shajin ton sai hte maren, nyan hpaji amyu myu do nna, jong sara ni hte jongma ni wunli lu hkra nga shakut to nga ma ai.
Yang Wui tsun ai, ya jong jong ko lang ai ladat ndai ni go, mungdan ana zinli htang tek hpaji ko hkan nna, ana zinli jong wang de n shang lu hkra, mu ai hte lawan ga kau, lahta de lawan shana rai na matu galo ai re nga ai.
Lu Kyang Yi ning nga ai, jongma ni a hkumhkrang hkamja lam go nambat langai re, seng ang ai htung tara ko hkan nna, jong sara ni hpe galo du ra ai lam aja awa matsun dat sai, n-gun atsam ma hkra hte jongma ni a wunli lu hkra ngu galo nga ga ai nga ai.