Shiga masa景颇新闻

Yinnan Shuili na namsi tun 270 go Hube Senlin Jinju de garum jo dat sai

云南瑞丽270吨水果驰援湖北咸宁、荆州

时间:2020-02-13 16:13:04 来源:德宏团结报

  Sinwop ana nnan hkron mong ai mu go shawa yong tsang dik ai mu rai nga ai. Shata 2 pro 10 ya shani, Shuili myu Wandin Changho hpaga dap ni Hube Senlin, Jinju de namsi tun 270 garum jo dat ma ai.

  Shaning nnan shaman kungdon ai hpaujang nsen a gata, Wandin Changho hpaga dap ni go tun 270 modo 9 tup re gyinshau si hpe Hube de garum jo dat sai.

  Ana byin pru ai hpang, Wandin Chang ho hpaga dap ni Hube de namsi garum jo na hku kyetshop matut mahkai la ma ai. Shata 2 pro 9 ya shani, Hube Senlin alu mahkong hpung hte Jinju myu tsi mawan hkamja sanseng rapdo, Jinju myu rungrai gonhkang wunhpom dap ni hte matut mahkai la nna, gyinshau si tun 150 go Hude Senlin na tsin-yam hkrum masha hte ana htang tek garum masha ni hpe shalai jo, tun 120 go Hube Jinju na mare masha hte ana htang tek garum masha ni hpe shalai jo na hku gadi htu masat da sai.

  Shuili myu Wandin Changho hpaga dap na Chin Shan ning nga ai: Ngai mung manang lo malo ni hpe garum la shangun ai re, Wuhan ko go garai nlu matut ai, dai majo Senlin hte Jinju ko shong garum jo na hkyem ga ai.

  Shuili myu Wandin Changho hpaga dap na lit gun masha Chin Ji Yin tsun ai: Gyinshau si ndai ni go anhte Myen mung ga na hkai masha ni hte jom hkai ai re, maga mi jamjau hkrum yang shara sha- gu na ni garum la, anhte a tsora myit re. Miwa mung Myen mung garum shingtau wunhpom hpung ni hto garot jahpu shapro na hku re.

  Dareba Go Hon Yung tsun ai: Mana ngai wuisin grup ko Hube de gyinshau si garot na modo ra ai nga ai mu dat nna, Hube na manang mali hpe so la nna mying bang dat ga ai.

  Hube Sang yang na Go Hon Yung go,2010 ning ko nna Shuili ko nna Kongju lapran rai garot mu galo nga ai, nta yong go Hube ga ko re, ndai zon re ladat hte buga de tsam dat na myit da nu ai.Hpan Chin Leng mung Hube Sang yang na re, 2012 ning hta Shuili ga sa nga hpang sai,buga de rungrai hto sa na shiga na ai hte jang, mying sa bang ton nu ai.

  Hpan chin Leng tsun ai: Ya mungdan tsin-yam hkrum nga ai, buga hta tsin-yam hkrum nga ai, buga de atsam n-gun loi sha pyi dat garum na ga ai..

  Dareba ni 7 ya tup na lusha ni hkyem gun nna, pro 10 ya shana hkom hpang nhtom, nhtoi 14 ya jahpot son ton ai shara ko du, namsi shayu kau ai hte modo gaman Wandin ko nhtang du wa na hku rai nga ai. Hkom na shong e, Wandin Changho hpaga dap na muhtam masha ni dareba yong hpe N95 n-gup magap 2, tsi sara ni lang ai n-gup magap 8, ta dagro, marang palong ni hkyem ya, modo lai lakmat, kanghta dap lakmat, garum jo laika re jahkum dat ya rai ma ai.

  Hkyem ngut ai hte, shaning nnan shaman kungdon ai hpaujang nsen a gata, tsora myit tup bang gun ai modo 9 go Sakhkung ga na mungchying shawa masha hte myen mungdan na mungchying sha ni a shaman chyeju garot gun nna tsora ninglum sa mat wa, Hube ga ana tsin-yam lau hkoi u ga ngu myit mada nga ma ai. (Lajang ai Nhkum Bok)