Shiga masa景颇新闻

Mangshi nbungli gut ko lai pru shang ai manam ningnan lang wan 2 jan mat wa sai

德 宏 芒 市 机 场 年 客 流 量 首 次 突 破 200 万 人 次

时间:2019-12-17 15:19:33 来源:德宏团结报

  Madu dap shiga Shata 12 nhtoi 12 ya shani, Sakhkung Mangshi nbungli gut ko pru shang ai manam wan 2 jan lai, shagun ai rungrai nambat langai lang tun mi jan lai sai, dai go nbungli hto sa madang labau shang sai ga re. Dai shani nbungli gut ko hpaga matut mahkai hpong mung hpo hpong ma ai.

  Mungdo pati rapdo mu madu ningtau, mungdo up Wui Kang go mungdo rapdo asuya a gong malai ku sakhkung nbungli gut hta pru shang ai manam nambat langai wan 2 jan lai ai hpe kungdon shaman ya nga ai.

  Wui Kang tsun ai, htom hpang de, mungdo pati rapdo asuya ni nbungli gut na hkingrai npot hte buhkom magam dap go maden lam hta n-gun lo dat hkrat wa na re, buhkom magam ndau shabra lam hta n-gun lo dat nna, nbungli hpaga dap ni hta mung mai byin ai daram asuya tara hku madi shado hkrat wa let, anhte Mangshi nbungli gut a ahkyak ai akyu shangang shagrin hkrat wa sai nga ai.

  Yunnan nbungli gut wunhpom hpaga dap hpa-on du ningtau Hu Hkyin Hpyin ning nga myit madun nga ai, Sakhkung nbungli, bu hkom magam gatya gaja wa, majan zinghka shong lam dam lada nga, Yinnan nbungli magam arang dat wunhpom hpaga dap, Yinnan nbungli wunhpom hpaga dap ni Sakhkung nbungli gut hta nambat lahkong ahkyak shara, T2 nbungli hkring shara ni go maden shakut nga nna, nbungli gut hto sa ama hkam atsam shatso shakut nga ma ai.

  Myen mung manam langai ning nga tsun ai, Mangshi nbungli gut a nambat wan 2 masha tai lu ai majo arong grai lu dum nngai, Hkunmyin ni Myen mung de du ai nbungli lam wo sai, raitim Sakhkung ko nna Hkun Myin du,Hkunmyin ko nna Myen mung de bai gayin shang wa yang nlo htum lani mi go ra ai, ya go Mangshi ko nna Mandale, Yanggung de du ai nbungli lam wo ton sai, dai majo anhte a matu grai manu mat sai nga ai.

  Chye lu yang, Sakhkung Mangshi nbungli gut ni go Sakhkung ko ru jung nga,“Mungchying sha nbungli mungchying sha ni hta kyuhtam”nga ai myit shingyo hkan shakut nna, mayak manghkang hparan, ndu ntup ai lam shadu shatup nga nna, wunli wungau hte pyen hkrat wa lu,B737-800 hkrang nbungli pyen hpang lu, A320 hkrang nbungli dingyang pyen nga sai rai nna, nbngli gut maigan hpo zinghka gahkan e mungdan ni jep hkam la sai hte maren, nbungli lam nnan hte maigan nbungli lam hpo lang, Mangshi ko ana Mandale, Yanggung de du ai mung makyin bungli lam lahkong mung hpo ton sai. Ya du yang, pyen nga ai nbungli 16 du sai, dai hta dingtok pyen ai nbungli lam 13, hto sa hpaga dap 8 du nna, lani mi hta pyen ai nbungli 56 du lu, shana pyen ai 2 re, dai hte maren singpro maga, dingda maga, myu kaba ni de pyen ai nbungli lam ni a majo lamu ganghkau nbungli lam wo da lu sai.

  Mungdo htunghking laili buhkom magam dap ni《Nsam 7 rong ai Yinnan pyo la ai Sakhkung ga》nga ai ga bo hku ndau shabra hpong hpo nna, hkumtsup ai sakhkung ga a amyu htunghking maka shadan dan nga ma ai. Nmau nbungli hpaga dap, Tungfang Yinnan nbungli hpaga dap ran, dingda Yinnan nbungli hpaga dap ran re nbungli hpaga dap 8 hte buhkom magam hpaga dap 12 na ningbo ningla ni gahti galai rai myit lu lam tsun nna, Sakhkung mangshi nbungli gut hte Sakhkung nbungli hpaga majan zinghka lam hpaji jo nga ma a.