Shiga masa景颇新闻

Mang-ya nhton ni yang-yi hkai nna lusu nga mai wa masai

芒牙村民种马铃薯住洋楼开汽车

时间:2019-12-13 10:13:46 来源:德宏团结报

  Mangshi Sen-gang ginwangdo Mang-ya nhton ni ndai lahkong masum ning hta nta shagu ningshung yang-yi hkai shakut nna, lusu nga mai wa gajang masai.

  Shata 11 na Mangshi go, loi gashung wa sai raitim, hkai hkai an ai lado no wa rai nga ai. Sen-gang ginwangdo Mang-ya nhton hta, hkaimu masha lo malo ni go yang-yi nli lata kyin nga ma ai.

  Ndai lahkong masum ya hta, Mang-ya nhton na hkaimu masha ni go hkauna pa de bungli sa galo kyin nga ma ai.“Ndai lahkong masum ning hta yang-yi dut sha pyo nga ai majo, hkaimu masha ni yang-yi grai hkai kam nga ai, ndai lapran lamu hpong tsom ai nhkan yang-yi lawan wan hkai kau nga ma ai.”Mang-ya nhton na ningbo Kyin Sai tsun ai.、

  Ndai lahkong masum ning hta, Mang-ya nhton ni yang-yi hkai shakut ai nga yang, hkaimu masha ni a ngasat ngasa lam mung grai laklai shai mat sai, hkaimu masha lo malo ni nta ningnan gogap la, modo mari got, num hkungran la lu rai nna, sutsu nga mai wa gajang masai.

  Hkaimu masha Shang Ai Hton nta ni go yang-yi hkai sha nna lusu nga mai wa ai kasi a malai rai nga ai. Shang Ai Hton ni a nta de shang yu yang, dat hking hku ni hkum hkum lu nga ai sha n-ga, nta mung grai hkrak hkra shatsom ton nga ai. Shi shi sok masha hpe tsun dan ai:“Anhte nta ni yang-yi mu 35 hkai ga ai, laning mi ja gumhpro amyat 80000 jan lu la ai, dai hta yang-yi shu garum re bungli ni bai galo jang, laning mi gumhpro sen mi jan lu nga ai,ya ja gumhpro lu wa nna, dinghku mung grai nguipyo wa sai.”

  “Yang-yi hkai shakut nna, hkaimu masha lo malo ni modo mari la lu sai, modo go shanhte mayu na hkrun lam hking rai rai sai.”Kyin Sai tsun ai.

  Ndai lahkong masum ning hta, gatya manu grin ai majo, Mang-ya nhton na hkaimu masha ni yang-yi hkai na myit grai rot nga ma ai.“Ya daini nta lo malo ni go yang-yi sha hkai nna ja gumhpro mun gade lu tam la nga ai, shinggan de bungli tam galo ai hta grau jo sha nga ai.”Hkaimu masha Shang Ai Hton tsun ai.

  “Anhte nhton ni htinggo 253 du ga ai, matsan jahpan ko lom ai htinggo 10 sha re, yang-yi hkai shakut ai hpang, ya go htinggo 2 sha matsan mying no gun ai, daining htum de go yong ro kau lu sana.” Kyin Sai tsun ai.

  Mang-ya nhton ni go yang-yi mai hkai ai lamu ga mu 2000 jan ko mahkra yang-yi hkai kau sai hta n-ga, Funghpyin gat mare,Mangshi gat mare, Jahpang gat mare,Nshon, Lengho re shara hkan lamu ga shap nna yang-yi sa hkai nga ma ai.Mahkra n son ginhkyom yu yang, ya ten hta Mang-ya nhton ni a yang-yi hkai ai lamu ga go mu 8000 jan du sai, mu mi hta tun 2.5 hku son yang, tun 20000 du nna, ja gumhpro ri 4 jan lu la nhtom, amyat ri 2 jan du nga ai.

  “Anhte 2003 ning hta Mang-ya nhton ko ningshung yang-yi hkai sha hpaji wa tsun yang, hkaimu masha nkau mi n kam hkai nga ai, anhte hkaimu masha ni a lamu ga gayin shap la nna, yang-yi hkai dan, ja gumhpro 20000 la shapro nna nli mari, kumshu yi ko yang-yi bai hkai jat di dan jang, hkaimu masha ni gaungui nna myit hkrang wa masai hta n-ga, yang-yi hkai kam wa masai.”Mangshi hkaimu hpaji sharin shachyam ginju na mu madu Hu Yau tsun ai.