Shiga masa景颇新闻

第四届边疆语言文化暨第六届中国周边语言文化论坛在我州举行

Ningdo 4 lang mung htingrep aga kunghpan hpaji hte Ningdo 6 lang Miwa mung grup-yin na aga kunghpan hpaji dinglun hpong Sakhkung ko hpo sai

时间:2019-11-07 16:08:10 来源:德宏团结报

  Shata 11 pro 2 ya shani, ningdo 4 lang mung htingrep aga kunghpan hpaji hte ningdo 6 Miwa mung grupyin aga kunghpan hpaji dinglun hpong Sakhkung sara dakkasu jong ko hpo sai. Lachyum go hpaji jo hkat pinra galo nna, grau lo ai laksan hpaji sara gaba ni jarit tot lai ai nlo amyu ni a aga hte kunghpan hpaji hpe maju jung nna, amyu aga ni galo sok shinggyin, makop maga hkrat wa nhtom, jarit tot lai nna nga shanu nga ai amyu ni a aga ni hpe grau nna akyu jashon la lu, mungdan ko nna galo hkrat wa nga ai “Hkarang panglai hpaga lam”tara ni hpe galo shatup hkrat wa rai nna, Miwa mung Myen mung sutgan hpaga lam hte Miwa mung Myen mung jarit hpaga gahkan ni jom hpo galo ai asat ni lawan dat rai na.

  Hpo masat hpong hta, Bekyin aga dakkasu jong Miwa mung nlo amyu aga laika lang shatup sumru daju mu madu Hpung Hen Li sara usa wa madun shapro ai, dinglun hpong a lachyum madung go Miwa mung grupyin na mungdan ni a aga lang ai masa hte aga a nsam, jarit tot lai nna aga lang hkrat wa ai lam, aga laika kunghpan nhtong makop maga na hte hkan dagro lang mat wa na re hpe madung nga ai. Sara usa ni mung amyu kunghpan shawum shaja sharot zinghka la wa na hpe alit shatai nna, kunghpan laili dagro, buga aga hpe n malap, Miwa gumsan mungdan amyu kunghpan maka npot shangang la na hta akyu ara galo shapro rai na.Sakhkung mung do sara dakkasu jong pati rapdo mu madu Hkung Lagam go Sakhkung mungdo hte Sakhkung sara dakkasu jong a lam ni tsun shachyen dan nga u ai. Shi myit mada lam tsun ai, laksan sara usa ni galoi raitim, Sakhkung na nlo amyu ni a aga laika sharot zinghka la na hta madi shado nna, sak no ram ai sara ni mung grau nna shakut shaja nhtom, amyu aga laika sumru hkrat wa ai hta grau gaja ai yi-ngam nsi galo shapro na.

  Dinglun hpong hta, Fu-tan dakkasu jong Nari Byilige sara usa, Kong si amyu dakkasu jong pati rapdo mu madu Bye Chin Lin sara usa,Miwa mung hpong shingra logadat hpaji dakkasu jong amyu hpaji hte shinggyim hpaji sumru dap ningbo Wang Fung sara usa, Kong si aga hpaji sumru hpung hpung up Wui Mau Fan sara usa, Miwa mung shi ga dakkasu jong Li Ta Hkyin sara usa, Ginjo sara dakkasu jong Hong Shu Sen sara usa ni go, zuphpong hta ahkyak mungga ni shon shana dan ma ai.

  Chye lu yang, ndai lang na dinglun hpong go Bekyin aga laika dakkasu jong hte Sakhkung mungdo amyu makam masham mu gonhkang dap ni madung nna galo ai re,Sakhkung mungdo sara dakkasu jong, Bekyin aga dakkasu jong Miwa mung grupyin na aga kunghpan jom shalat daju, Miwa mung amyu aga laika lang sumru daju ni hkam galo ai rai nga ai, zuphpong aten go 2 ya re.