Shiga masa景颇新闻

Kyet shop ai gawa Chye chyang ai gasha

父勤脱贫 子勤学优

时间:2019-11-07 15:39:19 来源:德宏团结报

  “Arong kumhpa pa ndai ni go nye gasha jong lung shakut ai hte ngai labri hpun hkai shaja nna lu la ai re, nye a nta na sut rai ni re.”Nshon ginwang Hu go ginwangdo Ho byen gahtong na matsan shatong mu galo shaja nna sut su nga mai mat sai hkaimu masha Du Ta ni a nta de sa shang yu yang, nhku asan aseng rai nna, nban de go nbu hpun hkai ton, chyahpung de go alai rem ai nta galo ton, nhku na shakum hta go arong kumhpa laika pa ni shakap ton gajong rai nga ai. Gawa hkaimu bungli galo shakut, gasha ni go jong lung shakut re lam go maumui zon hkai nga ma ai.

  Du Ta go Lisu amyu shadang la wa re, gaji gawoi prat ko nna Hugo bum hta nga pra nga ma ai, ma lahkong go jong no lung nga ai, zhaugo hkai, hkainu hkai, shinggan de bungli tam galo rai nna sha dinghku maka nga ma ai. Shakon ram ai lam go, Du Ta wa nta dinghku yak hkak nna sha myit n do nga ai, shi go laika hpaji hte masha a prat hpe laklai kau lu na re nga nna kam sham nga u ai, ma shannau hpe jong atsom lung mu nga n-gun dingyang jo nga u ai. Ma shannau mung myit grai su ma ai hte maren, jong lung shakut ai nga yang, arong kumhpa amyu myu lu la shajang masai.

  2016 ning hta, Du Ta nta ni go ginwang ko nna matsan jahpan hta bang la masai. Tara tsun dan, myit sharot ya, ladat sho, mahkrun tam rai nna, labri hpun hkai nna alai shingtai rem bang wa sai, matsan shatong mu htam ganbu ni shi hpe si mani rai tsun dan, hkaimu hpaji masha tam ya re hte rau, Du Ta shi mung seng ang hpaji laika ni yu shakut rai nna, shi madu mung hkaimu hpaji matsun masha langai tai lu sai, labri hpun mu 15 hkai ton lu sai. 2017 ning hta ja gumhpro lap 6380 hpra jan lu la sai majo, matsan jahpan ko nna lot lu sai hta n-ga, dinghku mung lani hte lani grau nna nga pyo wa sai. 2019 ning hta go lamu ga shap nna labri hpun mu 30 bai hkai ton lu sai, shi woi galo ai gata hta, gahtong ting na hkaimu masha htinggo 38 ni yong labri hpun hkai gajang nna, yong rai yang mu 410 du hkai ton lu sai majo, gahtong ting lusu nga mai wa masai. Shi hpe mung Hugo ginwangdo pati rapdo, asuya ni e nining matut nna “Labri hpun hkai alai rem ningshong sho htinggo” Ngu nna shakon shagrau ai hkrum sai.