Shiga masa景颇新闻

Lam magup nhprai hkra shakut nga ai Shauye gahtong ni 一Shauye gahtong ni Jinghpo laika sharin hpang wa ai npot nhpang

扶贫先扶智 挂钩单位送来了景颇文课本

时间:2019-11-07 15:32:55 来源:德宏团结报

  2019 ning shata 11 pro 2 ya shani, Nshon ginwang Hugo ginwang do Yokyajai ninghton Shauye gahtong ko Jinghpo laika sharin hpang masat galo lai wa sai.

  Mungdo amyu makam masham gonhkang dap hte Myit hkrum shi laika dap na magam gun masha ni Jinghpo laika sharin hpang masat hta sa du dung ma ai.

  Shauye gahtong go Lengho ginwang jarit ko ang nga ai, dai shara hta tsit lali tsom ai bum shagong ni shinggrup da nga ai hte rau, san tsom ai hka shi lui nna gatsi pyo la ai shara re. Yokyajai ninghton ko go Sakhkung mungdo amyu makam masham dap hte Sakhkung mungdo hkumsai gonhkang ginju ni matut mahkai madi shado ai shara rai nga ai. Shauye gahtong ko nta htinggo 88 masha jahpan 306 shanu nga ma ai, gahtong masha ni kumshu hkai, labri hpun hkai, hkainu hkai, nbu si hpun hkai, zhaugo hkai, dusat yamnga rem rai ja gumhpro tam lang nga ma ai. 2014 ning hta, gahtong masha ni lu tam ai gumhpro masha hkum mi rap jahpra 1524 daram sha re. 2014 ning ko nna 2019 ning shata 10 laman hta, asuya ni shong hpang Yokyajai ko gumhpro ri 1.3 jan dat nna go maden lai wa sai hte rau, Sakhkung mungdo amyu makam masham dap hte Sakhkung hkumsai gonhkang ginju ni mung gumhpro wan 1.6 jan tam gahkyin la nna garum shado la lai wa sai. 2019 ning du yang, gahtong masha ni lu tam ai gumhpro masha hkum mi rap jahpra 4000 daram du mat wa sai.

  Ya daini Shauye gahtong ni bum ko nna loi kindit ai bum lago de htot yu wa sai. Dai shara hta pa layang de mu mada ai majo alen nga nna grai nga pyo ai shara re. Gahtong masha ni a dum nta galo ai lam hta soi shada htuk ai majo, sa mu mada dat ai hte sa shang chyai yu na zon nga ai myit gatu wa nga ai, nta yan hte yan rai galo ton ai lapran hkan na lam go pyilan ga nyep shatsom kau ai majo lai wa lai wa sa grai manu nga ai, wandat mung hkrang sai, hka pyun go nta ndo yang de htan shang wa nna, hka sa hpo dat yang, san tsom ai hka hpro hpro lui to nga sai.

  Shauye gahtong masha ni asuya ko nna madi shado la ai majo, lani hte lani nga pyo wa sai hte maren, hpaji lam hta no ningra nga ai hpe dum hprang wa nga ma ai, grau nna go Jinghpo laika no sharin hka ja ra ai hpe myit dum ai majo, gahtong salang ni jom bong dup yu nna Jinghpo laika sharin hpang na hku dodan masai.

  Gahtong masha ni tsun ai, gahtong ko lai wa sai ten hta, shana jong hpo nna Jinghpo laika lahkong masum lang sharin lai wa yu sai, raitim ya ten na na n sharin yu mat sai, dai majo sak loi gaba sai ni go loi loi chye hti ai, ya bai gaba wa ai ma ni go Jinghpo laika garai n sharin yu ai. Gahtong masha ni tsun ai, Jinghpo laika grai sharin la mayu ai raitim, Jinghpo laika sharin ya na sara n lu ai majo, Jinghpo laika hpe chye hti chye ka hkra sharin la na lam hta grai no manghkang ai nga ai. Jong hkan mung Jinghpo laika sharin sara n nga ai majo, ma ni madu amyu a laika n lu sharin la nga ai, asuya ko nna jong hkan Jinghpo laika sara hprai dat na hpe myit mada ai nga ai.

  Dinghkung mu madu Si Gyin Hpyin a“Ningnan na myit mang yo shada bandung hpe hkum malap, shangun ai magam bungli ja ja matsing da ga”nga ai madung ga bo sharin hka ja nga ai ten laman hta, mare salang ni gahtong ko Jinghpo laika sharin na hku dodan ai hpang, dai gahtong ko Jinghpo laika chye ai sara ma langai hpe lit la nna sharin shangun na lam bai jom dodan nna, Jinghpo laika sharin hpang masat galo masai.

  Mungdo makam masham gonhkang dap hte Myit hkrum shi laika dap na magam gun masha ni go Mangshi ko nna la yu wa ai Jinghpo laika sharin buk, sumrai laika, hkai rem hpaji laika buk, kum-yai laika, ga shagop laika, maumui laika re ni kumhpa da masai. Jinghpo laika sharin hpang masat hta, gahtong na sak gaji dik ai 5 ning, sak gaba dik ai 85 ning re ji nban yong go, Jinghpo laika hpe chye hkra sharin la nga Jinghpo laika sharin buk sa la masai.

  (Sok ka ai: Lahto Brang Ja, Nhkum Ma Chin, Nhkum Bok Datbung dem ai: Nhkum Ma Chin)