Shiga masa景颇新闻

DATNU HKU HKRON DUT AI MAHKAM KO N HKRAT BANG NA HKU SADI MAJA RA AI

时间:2019-09-26 16:58:12 来源:德宏团结报

  Hkron dut ai lam yong go, “Chye hkat ai masha hpe masu hkalau”, “Chye hkat ai masha hpe yubak tsin-yam jo”, “Chye hkat ai masha hpe nyap sha” re hkrai rai nga ai. Shang lom masha ni hpe, shanhte a jinghku jing-yu, mano manang ni mung hkron dut lom na hku masu hkalau gang bang shangun rai, jinghku jing-yu mano manang ni hpe jahkrit masu sha kau ai yubak tsin-yam hkrum sha shangun nga ai, ndai zon re lam go hpong shingra sari sadang hpe jahten, masha hte masha kam sham hkat ai lam hpe jahten sharun kau ya nga ai. Dai majo shawa masha ni yong, ndai zon re hkron dut ai mahkam hta n hkrat bang na hku sadi maja ninghkap kau nhtom, tsan tsan koi yen kau ra ai.

  1.Ganing re hpe datnu hku hkron dut nga a ta?

  Datnu hku hkron dut ngu ai go, shawa masha ni ja gumhpro marin ai myit hpe asung jashon nna, datnu hku masha gang bang, lawu de na matut hkron dut masha shalo jat bang rai, shang lom jahpu, shang lom ginra makop jahpu, shing n rai shang lom ahkang jahpu re ni hta sha ai hpe tsun ai re, ndai zon re lam go gat ya sutgan asat asa hpe jashuk, hpong shingra ngangkang lam hpe jahten ai laikyang rai nga ai. Datnu hku hkron dut ai lam ladat kumla myu lahkong hku byin nga ai: Myu mi go datnu ko laksan ginra hpo masat ton nna hkron dut ai shiga shabra nhtom, datnu gasup kam masha ni hpe masu hkalau gang bang nga ai. Shiga dai ni go, “Gumhpro shachyai lang”, “Datnu hku hpaga yumga”, “Datnu hku dut sha”, “Datnu hku shang lom”, “Mung masha hpung hku gumhpro lahkon”, “Arang bang hpaga galo”, “Datnu hku tengtok dut sha”, “Datnu hku sharin shakyang”, “Ndau laika sa hpo yu ai hte akyu lu” nga ai ni rai nga ai. Myu mi bai rai jang, datnu ko hkron dut ai ahkrang galo ton nna hkron dut ai mu galo nga ai. Datnu hku masha gang bang nna, gumhpro loi bang shangun, shing n rai rung rai mari shangun, amat matsing ya, amyat nhtang jo rai nga ai, dai hte rau masha ding-yang gang jat bang shangun, shing n rai lawu de na matut hkron dut masha gang bang shalo jat shangun rai, masha grau lu gang bang jang, lu la ai gumhpro mung grau lo nga ai. Ndai zon re lam go datnu hku hkron dut ai she rai na re. (Bai matut hti ga)

  (Gale ai: Zinghtung Ma Sam)