Shiga masa景颇新闻

Luihkri hkai sha hpaji

种柠檬知识

时间:2018-11-08 17:16:04 来源:德宏团结报

  (Shata 11 pro 7 ya na do)

  Htaphtuk ai hku apu hte asi ni hpe di sharan kau na: Apu hte asi a shadon shadang sharai ja- htuk ya lu yang she asi grau gaja nga ai. Apu nau lo jang namshum gashun hkat nna apu hkrat asi hkrat rai nsi pru shadang grai yom mat chye ai. Dai majo, ahpun a masa hta yu nna apu hte asi kyi hpe di sharan kau ra ai. Ta tut galo sa wa na ladat: Apu majom wa ai hpang, apu pu nna alap n lap ai lakung gasha ni hpe rep lajang kau na, apu majo hpro wa ai shaloi, shingtai sha, ana rong, akyik akok, alap n lap, tu n tsom, apu majo nau lo re ni hpe di jasan kau na, shing rai apu, lap ginsa, lap nnan ni a shadon shadang hpe 1:0.5:0.7 di sharam jahtuk ton na. Apu wai mat ai hpang, tu n tsom, alap n lap, asi n si, akyik akok, shingtai sha, ana rong re asi ni hpe di lajang kau na, shing rai asi langai mi hta tsit tsom ai alap 10-20 daram lap na hku galo ya ra ai. Apu n lo ai lakying ni hpe go Do shau zo (多效唑) ppm 500 - 700 daram gat bun na, dai hte rau maku nnan do kau, maku ma- tsun di kau rai lakying galu jat wa na hpe tek shingdang ton na. Asi kyi ni nambat 2 ngu na lang hkrat ai hpang ko nna shata 9 du jang, shingtai sha, ana rong, htingkyi, akyik akok re asi ni hpe di lajang kau na, dai hpang hpun a tu masa hte hpun gaji gaba ko hkan nna asi bai di sharan lajang kau na. Hkai shachyip ai rai nna asi nnan sha no si sharin wa ai namsi hpun hpe go, hpun langai mi hta gaba tsom ai asi 50-70 daram madat ton jang ram sai; Asi grai si sai hpun la- ngai mi hta go gaba tsom ai asi 150-200 daram madat ton jang ram sai, asi gade daram madat ton na go luihkri hpun hpan amyu hta mung no hkan ra nga ai. Shaloi she asi grau gaja grau numnak re hta n-ga, lo si, gat rai gaja mung shatai lu re majo, sutgan akyu grau pru nga ai.

  Luihkri Hpun Shaza Ai Ana Htang Maja Tsi Lajang Na Lam

  Luihkri hpun hta go ana amyu myu chye byin nga ai, rai yang lawu na ana ni go Yinnan ga hta grau chye byin nga ai:

  1. Ano pru ana

  Ano pru ana go luihkri hpun ko grau chye byin ai ana myu mi rai nga ai, Yinnan ga luihkri hkai shara yong mayong hta chye byin nga ai, grau nna go gahtet gamut bam madi ai yi-nam lado hta grau chye byin wa nga ai, hkahkro yi hta ahka ing nga nna, hpun hkrang ni hta ajan atsom bai n lam hkra jang go grau laja sai. Ndai bo ana go Jin gyin yi mui gyin (真菌疫霉菌) hte byin wa ai rai nga ai, shi a byin masa go, hpunmat hte lakying madung ni a hpunhpyi hta hpye yat nna ano lui pru nga ai. Ndai zon re ana byin jang nhtu hte ahpun shan ja ai ko du hkra ahkut gawan kau na, dai hpang 70% re Gya gyi hto bu zin (甲基托布津) ko ahka htam 100 pau bang nna gat bun na, shing n rai 50% re Do gyin lin(多菌灵)ko ahka htam 100 pau bang nna gat bun tim mai ai. Bai nna nshung lado hta Shi lu he gyi(石流合剂)hte pau gayau la ai tsi ntsin hte apa chya ton tim grai mai ai.

  Raitim grau lu htang maja kau ai ladat go: Yi lata yang loi tso, ahka dat bang mase shalui kau manu re shara lata la ra ai; Dai hte rau ana grau lu htang ai bo luihkri jahkai ni hpe hpun ganu shatai nna loi tso ai ko matut la na; Namsi sun hta wahkyi namhpun lo dat bang na, atsom gon lajang, atsom rep lajang, namsi sun ko nbung lu jashon, ajan atsom lam hkra na hku galo ya nna, shingtai e hpunhpyi makret shaza ai lam htang maja kau na.

  2.Yat hpye ana

  Ndai bo ana go luihkri hpun ko grai chye byin ai ana myu mi re, mungdan gata hte maigan hkan grai ahkyak ai hku htang maja tsi lajang ai ana rai nga ai.

  Ndai bo ana go luihkri hpun a lakying, alap, asi re yong hkan chye byin wa nna, ateng apang rai gahpro wa ai hpang ahpun ro chye hkro si mat nga ai. Lap hkinlung, lakying hkinlung, asi kyi re ni hta ana byin wa ai hpang, alap run hkrat, asi yat hkrat rai nna, asi nau n si nau n gaja mat chye rai nga ai. Gahtet gatsi shadang laman 25-30 a lahta de du nna marang bai lo re shaloi grau chye byin laja wa nga ai, abong gasha, hpun gaji re ni hkan byin jang mung, grau laja song nga ai. Ndai bo ana hpe htang maja kau na ladat go, ndai bo ana byin ai shara na abong n sa mari hkai na. Ndai bo ana byin sai abong, matut hpun, asi re ni lom jang lawan wan ju nat kau ra ai.

  Ndai bo ana byin ai shara hta go nong e atsom jep maram yu ra ai, shing rai ana rong ai a -lap, lakying, aga hkan run hkrat nga ai alap lakying re ni hpe atsom masom nat lajang kau ra ai. Ana n rong ai abong ban shara galo nna ana n rong ai abong gaja ban lajang la na. Luihkri hpun maku nnan ku wa ai hpang 20-30 ya laman hta, tai shadang 0.5% daram re Bo e do ye (波尔多液), shing n rai Htui gyin hte (退菌特) ko ahka htam 500-800 daram pau bang nna galang mi gat bun na; Shing n rai tsi shadang 77% re Ke sha de (可杀得) ko ahka htam 1000 pau bang nna gat bun tim mai ai.(Bai matut hti ga)