Shiga masa景颇新闻

Naushong buga madum wuntung ginra daido manau poi hkik pong dik sai

中国瑙双之乡再现传统目瑙纵歌

时间:2018-03-19 09:10:49 来源:德宏团结报

Hong Yi hte kaga du gyi salang ni manau manau ai.

  Yinkyang Ginwang Nhkum krung Naushong buga madum Wuntung ginra daido manau poi hpe Yinkyang ginwang Jinghpo Wunpong amyu sharot hpaji sumru hpung ni poi madu tai, 2018 ning shata 3 pro 9 ko nna 11 du hkra grai hkik pong ai hte Nhkum krung Hkai bang yang hka nong buhkom ginra naura pa ningnan e manau lai wa sai.

  Naushong buga madum wuntung ginra daido manau poi hpe Yinkyang ginwang Nhkum krung ginwangdo shingwang gata Hkai bang yang hka nong gaba buhkom ginra gata naura pa ningnan grai hkrak hkra, mungdo naura hkrang hku galo da nna, dai naura pa ningnan e grai hkik pong hkra, moi na htunghking hkringhtong shachyo ai hkrang hku nan htunghking manau poi gaba galo lai sai. Htunghking manau poi hta Yinnan mungdo gaba mung masa bongban rapdo ningtau ningnyang up Hkong Yi hte kaga rung dap hkan du gyi salang ni mung sa du hkalum ma ai.

Mungdan gata, Yinnan mungdo gaba gata na hpaji sara wusa ni hte maigan mung hkan na hpaji sara gaba ni mung Jinghpo Wunpong amyu sha ni a lam sa sok maram masam hkom ma ai. Htingbu Myen mung gata na Jinghpo Wunpong myu sha ni alum ala rai grai lo hkra sa du hkalum ya ma ai. Sakhkung gata ting na Jinghpo wunpong amyusha gahtong ningchyong shagu de na ni amyu sha ni hte kaga amyu ni yong sa gabu hkanum manau ma ai.

Manau poi hpe moi na ju manau hkrak wuju wulang galo matso ningtsang gumgun gumhpai nau, madai shayu rai nna manau jaiwa wa hkra galo ma ai.

Nhkum krung buga go moi jiwa ni ginru ginsa sat yu wa nna Nhkum amyu Gumchying gumsa du ni up hkang lai wa ai ginra rai, Miwa mung Gungshan tang asuya ni uphkang ai shani ko nna Htungbyi kon ginwang do ngu masat nna uphkang ai ginra re. Ndai ginra na Jinghpo Wunpong amyu sha ni go amyu a htungghking ningli ni hpe grai tsora nna, Sumhke Jinghpo mare hpe mung mungdan atsang amyu htunghking hkring htong gahtong ngu ai shingteng amying hpe lu da sai, ya go Naushong buga madum wuntung ginra shingteng amying mung ai lu la sai, shing rai ndai buga Jinghpo wunpong amyu sha ni sharin la ging ai buga Jinghpo Wunpong amyu sha ni rai nga ma ai lo.